ADVERTISEMENT

This area is available for advertisement. Please contact for details.

Arnivang
Get Adobe Flash player

Constitution 123 Amendment Bill kekhang dunji aphan KAAC session ingnisi cherai nangji: Hamphang asong 24+

imageDiphu, Thekar Matijong 11: Non Matijong chiklo winter Parliament Session chengche aprang Karbi Anglong Autonomous Council a session ingnisi constitution 123 amendment 2015 kapadeng longle det nangji, athe la jongsi dengdet pulote India constitution along kedo Sixth Schedule ajakong kaprek ahin tevarphit po pusi pini Ditsrict Press Club of Karbi Anglong along pherangke amai kangni ahut Hamphang asong 24+ atum kehang paso.
Kedamtang 2013 aningkan Karbi Anglong Autonomous Council atum special session ingni pen kedeng Village Council a draft Bill che-en thu nangji athe laso a bill along inglong aso atum a village council, Karbi apharman ser van kep, Rong asar habe, lindokpo, Chinthong-Ronghang Asar, Kuki atum apharman, Tulsong Vaisa pen Haosa, Dimasa atum apharman Salayaro lapen Khonang, Khasi atum apharman Dorbar Shnong pen Waheh Shnong, Garo atum apharman Nokma lapen lason thakthak Shyam (tai), Hmar, Zeme Naga, Rengma Naga heihui inglong akhei ason atum amen jongdakde det lo. Laso a bill along Gram Sabha lapen Panchayat kibiji avarsai aphan ansi jong dun chot. Laso a bill pen ajok kedotang Traditional village Council amokha thi-etpo lapen inglong aso atum apangthek virdet po. Traditional Village Council tame India constitution along kedo Sixth Schedule constitution Paragraph 3(e) ateng pen act pen rule selam nangji pusi hamphang asong 24+ atum kehang paso.
Sixth Schedule along kedo Paragraph 2, Sub-Parapraph 6 pen 7 lapen 20 ateng council kilik aron KAAC pen selam pame nangji puta hamphang asong 24+ atum kehang paso. Drafting Committee atum pen kaselam council kilik aron kaprek kaprek inglong aso akhei lapen traditional Hills tribe Council atum aphan paklang pen chingvai chingsai se aprang paklangkle det nangji puta hamphang asong 24+ atum hang. Meghalaya along kedo Khasi, Jaintia, lapen Mizoram along kedo Pawi Lakhers Mara heihui atum Autonomous District Council asonsi Karbi Anglong Autonomous Council alongta inglong aso atumsi vote jok long chot nangji lapen kilik chedan dun long chot nangji pusi pherangke amau pen hamphang asong 24+ atum pachini.
Non nitrok aphilote Council kilik aphan aron kaselam kapatang nangji aphan  Guwahati high court pen apor kipi ateng kijut lo. Seta drafting committee atum pen nonputa KAAC kilik aron kaselam patangte lang lapen kaprek kaprek inglong aso atum traditional council lapen inglong aso arat atum pen laso aphuthak thangnatta kachingki chethan ave lang, laso ajoine laso aphuthak Karbi Anglong Autonomous Council aphan inglong aso arat atum kahonthe dokok lo. CEM lapen alangli kangvai amonit atum Banga sena aphan kaphere pensi sai keklem ason lapen inglong aso atum abe klemsi inglong aso atum aning kehanghe asai keklem asonsi thek long.
Hini inglong a district along kedo inglong aso atum aphansi wholesale a trading license pi chot nangji puta hamphang asong 24 atum Pherangke amai along pangdak. La-an chot kali jongsi aron ateng klemkle lapen Council kilik aron kaselamji aphan Guwahati High court pen apor kejong ateng patangte pulote rat thurpak kachesong Arkoi achiklo pen ingthur nangkok po. Laso kachesong ahut jongsi kopi kaheno dak angthek dokok pulote Karbi Anglong Autonomous Council atumsi adai che-en nangji puta hamphang asong 24+ atum pherangke amai pen pangdak.
Pherangke amai along Hamphang asong 24+ a convenor Ratan Terang, convenor Semson Teron, Convenor Angtong Ingti Kathar, Jana Terang lapen kaprek kaprek hamphang asong 24+ ajabang atum pherangke amai along chetong dun.

Leave a Reply

Your email address will not be published. Required fields are marked *

December 2018
M T W T F S S
« Nov   Jan »
 12
3456789
10111213141516
17181920212223
24252627282930
31  
Archives