ADVERTISEMENT

This area is available for advertisement. Please contact for details.

Arnivang
Get Adobe Flash player

Clause 8 paprai vek nangji pusi hamphang asong 16 atum kachesong

imageDiphu, Thekar Matijong 11: Karbi National Protest asai dengsi KSA lapen chelang rappet hamphang 16 atum Diphu an ajak kidding akeng pen vansi pini Karbi Anglong Autonomous Council a CEM Tuliram Ronghang aphan kapanong apinpur aloh KAAC secretary Richard Rongpi arideng pajir dam.
Pinpurme, kedamtang nipli aprang Dokmoka, Hanjanglangso heihui ahavar pen KSA lapen chelang rappet asong aro arim klembang atum pini Matijong 11 arni Diphu nang pale lo.
KSA lapen NSM, HPYA, KYDO, KAWJF, SYC, SYJ, AISA anparta kaprek kaprek hamphang asong atum chelang dunsi BLT alamdon clause 8 kapachunji aphan ratpangri atum keklem bom aphuthak kekhamkhe lapen Clause 8 paprai dak khangjang nangji pu angthek KSA (lumding road) lapen kachelang rappet arisangho kachesong angthek kaprek kaprek ahavar pen akeng pen vangsi Diphu nangpale lo.
Laso aphi Karbi Anglong Autonomous Council along pale pen pinpur aloh pajir dam lo, laso aphi Diphu Semson Sing Ingti Memorial Park akimi athengno along mai pangni, mai along KSA ameiphu Simeon Rongphar pen Karbi Anglong Autonomous Council atum pini alangli tum pinpur aloh pajir damji pu arni inutnat a EM atumta Council along kedo de det aphuthak ningkangsamse chepaklang. Lason ahut CEM Tuliram Ronghang ningkan pho KAAC CEM mandetta Karbi Anglong lapen rat apharman thangnat klem thekthe pusi jong. Alangli mesen asai klemthekji bon pusi rat atum aning chepathe bom lo seta alangli non BLT alamdon Clause 8 kekhang dunji aphanta ardi en-eh det asonsi thek long. Lasi lapuson thangnat keklem thekthe det a atum aphan ke ser anghoi kapangni verji ale ave lo puta Simeon Rongphar jai.
Karbi Anglong arat hemprek kehang ajirdingpik lo, seta Karbi Anglong arat atum India kachari aron aloh along ketok dak article 244(A) kachehang kapachunji aphan ratpangri atum aning hanghe seta kedamtang 2003 aningkan kachetok BLT alamdon clause kapachun pen Karbi Anglong arlo kedo inglong aso binong akhei atum a an van nang kethak dunji aphansi klem rong lo. Lasi lapuson India ratpangri atum aning langno pen keklem asai aphuthak kachesong otthip nangji lapen rat kachesong chunchetik ington nangne pusi Nagarik Suraksha Manch ameiphu Mahajon Kro jai.
Karbi Ninso Chinthur Asong a chunbang Pratima Inghipi pen Clause 8 kekhang dun thekthe det aphuthak Karbi Anglong lapen Dima Hasao a MP Biren Sing Ingti aphansi akoi pi. Kedamtang Joyanta Rongpi MP kikhi bom ahutta laso  BLT alamdon Clause kapachunji aphan ratpangri atum klem lo, seta halaso ahut Dr. Joyanta Rongpi arjap dun thipsi khang dun lo. Lasi Joyanta Rongpi jongsi khang dun un pulote kopi apot non kikhi bom MP Biren Sing Ingti khang dun un-eh det lo puta KNCA sankur chunbang Pratima Inghipi mai along jai.
Lason thakthak mai along kachetong dun kaprek kaprek ajabang atum pen BLT alamdon clause 8 chun det pulote Karbi Anglong arlo mate sixth schedule alongri arlo kedo inglong aso binong atum kopipi akisungsi kachetongji alam heihui klardak pen kado kave athengno jai.
Pini kachesong ke kecheng anchot lang jongsi ratpangri atum BLT alamdon Clause 8 papraipre lapen hako pen Karbi Anglong lapen Dima Hasao arat atum aron ateng kachehang article 244(A) pachunche pulote la-an sose ahir katang kachesong asai dengji pusi mai along pangdak. 

Leave a Reply

Your email address will not be published. Required fields are marked *

December 2018
M T W T F S S
« Nov   Jan »
 12
3456789
10111213141516
17181920212223
24252627282930
31  
Archives