ADVERTISEMENT

This area is available for advertisement. Please contact for details.

Arnivang
Get Adobe Flash player

Manja Block along KKSBPA aphuthak Gram Sabha kangni

imageDIPHU, Thekar Matijong 9: BJP kachari aratrpangri along sarpi-sarphu atum aphan kapanong saideng (Scheme) mate Kushal Kunwar Sarbojonin Bridha Pension Achoni (KKSBPA) aphuthak pini Lumbajong Block along Special Gram Sabha Application Mela mate sarpi-sarphu atum aphan than pare amai pangni. Dhansiri Constituency VDC Chairman Dilipsing Bey kachepahemphu amai along alohi aman pen Lumbajong Constituency VDC Chairman Lorence Ronghang, Singhason Constituency VDC Chairman Trinol Rongphar, JE Jit Ingti pen danglok gramsevak-sevika atum chetong dun.
Mai along jasemet petke non Assam along chief minister Sarbananda Sonowal kachari BJP aratpangri kedeng Kushal Kunwar Sarbojonin Bridha Pension Achoni aphuthak sarpi-sarphu atum kosonsi amen chethap dun nangji ma aphuthak VDC Chairman atum lapen Block asaikhi atum than pare. Lumbajong, Dhansiri, Singhason lapen Borjan, la pli a constituency pangrum pet pen kangni amai along VDC Chairman Trinol Rongphar kejai ke, ratpangri pen avarsai nangkipi ason-ason saideng (Scheme) mate ahormu heihui masapsovet setame chodeng dun nangpo lapen laso along kachini dunde-kethekthe atum aphanta than pare ponsi avarsai palong dun nangpo. VDC Chairman Lorence Ronghang kejai ke, khei-dhorom song plakple pin pensi ajat avarsai tame chethak nangpo lapen chipi-chepajir nangpo. Lasonsi non laso KKSBPA saideng alongta arta ningkan 60 kepleng lote pension long nangpo. Ladak khei dhorom song alam vangvelo puta Ronghang asangho ningjesi kedamtang Congress chari ahut keplak-keplek joi-joi pen kipi kapajir dopik setame non BJP ke ajat asonta rat thekprong pensi pajir lo. Lasonsi meiphu alamthe along VDC Chairman Dilipsing Bey kejai ke, ratpangri pen kipi kapajir saideng heihui along ajahak atum kadure rong arat atum along tangka kachohang dodo. Lasi laso asai abangke maduta klem nangne lapen komane jongsi lason klem pulote nelitum aphan nangpachini ik non athe lahai asaimo keklem-kedam ke akejoi pen sika isita rat atum pidun nangne anparta kopene kachinine lapen kethekthe ason do pulote pherere therakre pin pen Block along damra saikhi atum aphan arju dam non pusi Bey asangho rat aphan than pare.
KKSBPA ke arta ningkan 60 pen 79 anke chiklo ejon along sika 250 longpo lapen arta ningkan 80 pen athak lo pulote sika 500 longpo, lasi kedo-an sarphu-sarphi atumta methang-methang kenangsot aloh (document) heihui chirim pamekara lahai avarsai kacho-en dunji aphansi VDC Chairman lapen Block asaikhi atum choningri.

Leave a Reply

Your email address will not be published. Required fields are marked *

December 2018
M T W T F S S
« Nov   Jan »
 12
3456789
10111213141516
17181920212223
24252627282930
31  
Archives