ADVERTISEMENT

This area is available for advertisement. Please contact for details.

Arnivang
Get Adobe Flash player

Karbi National Protest Day apharman hamphang asong atum Hanjanglangso pen nang kebar

imageDiphu, Thekar Matijong 9: KSA, SYJ, UKYA, KYDO, HPYA, KNCA, KAWJF, NSM, KYO, AIKSU, KAUPA, AISA, KADA, ULDL, AKASKU lapen SYC kado kave song kre trok chelengpet Bodo alamdon Clause 8 pavir nangji pu aphuthak khekhamkheji aphan Karbi National Protest asaimo deng lo.
March to Diphu asaimo Matijong 8 Bhomti arni pen pangcheng lo. Laso ahut Bokajan LA Constituency angkang kedo atum Hanjanglangso along chingrumsi Bhomti adap porphai 11 apor akeng pen nangbarsi arnikangsam porphai 6:30 apor malom anke Zero Point along nang pale lo. Laso aphi pini Matijong 9 arni Zero Point pen nangbar thusi arnikangsam apor Rongplimplam along nang boha thu lo pusi birta long dun.
Diphu dam lonang (March To Diphu) asaimo along kaprek-kaprek khei kachinghon a okkarjang (Youth) atum cheto dunsi atumi lapen pini nerlosini akeng pen vangsi kekhamkhe angthek chepaklang lo.
Pinpurme, kedamtang Thangthang 10, 2003 aningkan India ratpangri pen klempar asong BLT atum pen lamdon chetok lo. Laso alamdon along kedo Clause 8 along Karbi Anglong pen North Cachar Hills along kedo Bodo akhei atum aphan ST(H) kipi alam kedo kok ajok non 2018 aningkan winter parliament session along laso alam kapachunji aphan ratpangri atum keklem bom pu abirta atengsi Karbi Anglong arlo hurchodutsi angkangpi pen kekhamkhe asai deng lo.
Karbi anglong ke 6th scheduled area pu ha 1947 aningkan Paipai 15 India kejokvan longdet pen ningkan pli aphisi Karbi Anglong district seng lo. MP, MLA, CEM, EM, MAC atum ajakong thedung, latum jongsi arjapthip, ingtangrak, pherere pinpen khamkhe hai lote clause-8 khangchek un “pusi KSA tiri asankur chunbang Thomson Rongpi jai.
“Schedule Tribe order atengke ST(H) ke kapaphihup akhei aphan keroikomji aphan pusi ratpangri pen laso aron kaselam. Bodo atum inglong aso puseta alanglitum thoisi kedo aning kehang lapen thoi kedo aning kehang asonthotsi kaprek inglong aso atum ason alanglitum paphiphe. Laso ajoine Bodo atum aphan ST (P) si thikpi lo. Bodo atum kere set lapen kethek kedo oh pu ajoine IAS, IFS, IPS, commissioner, director, army, military dopik lo, la-an aphita alanglitum aphan anghoi keraipi phant 7.5% do seta ST (H) atum aphan ke phant 5 ansi dochot. Lasi non ke phant 7.5 keraipi (reservation) kelongtang akhei atum aphan puthot phant 5 vet kelong akhei along nang kapachithi dunji aphan BJP atum tovar kangpupi ke chechak un-eh pusi ni ni an akeng pen kevang tang kekhamkhe asai kedeng atum kekhamkhe chepaklang.
BLT atum kachetok Clause 8 paprai dak khangjang nangji, Karbi Anglong arlo non an ST(H) phant 56.3 dolang lapen N.C Hills along phant 70.9 an dolang. Bodo atum aphan ST(H) pipen inglong ahavar along ST(H) aphai pabat lote kaprek-kaprek ratpangri avarsai kipi ta pabat unpo po BJP atum kamatha ke chokche puta hamphang asong atum kejong paso.
Diphu dam lonang pu kekhamkhe asai kedeng atum penap dik Matijong 11 Durmi arni Karbi Anglong arongsopi Diphu along nang palesi Karbi National Protest Day kachesong asai dengji puta birta long dun.
Pini an akeng pen kevang kekhamkhe asai kedeng atum along non amat thangnat akisung ave lang lapen akeng pen kevang atum non amat mesen a ok-pran dolang puta birta long dun.

Leave a Reply

Your email address will not be published. Required fields are marked *

December 2018
M T W T F S S
« Nov   Jan »
 12
3456789
10111213141516
17181920212223
24252627282930
31  
Archives