ADVERTISEMENT

This area is available for advertisement. Please contact for details.

Arnivang
Get Adobe Flash player

Hamren angkang akrongtin atovar kaselam ta patangtesi ke-ong

imageHAMREN, Thekar Matijong 9: Parivartan a ratpangri Karbi Anglong Autonomous Council (KAAC) kaparlo Hamren PWD Roads Division angkang atovar akrongtin ta kaselam, kapamithu asai keklem kapangcheng theklong puvoiphit ta non anta ekrong bakta mesen, neilep lapen alon dojot jong dam move detsi thek long.
Kaselam ketang tang ajo leputa selamdet, henodet-det amat selamle det ateng. Ajahak akrong ke kaselam pabenghoi amat ingtonkok, lapusonsi rat thek prong lo.
Hamren hithi barim pen Harlongjove kacheleng PWD atovar, Rongjangphong angden bangso atovar 900 metre bak doji. Kedamtang Arkoi 2018 malom pensi tang-et lo, bonta Rongjangphong pen Soil Conservation Office adak Mtr 200 bak doji ajak kiding ke arlong thok-et amat ington kok pen nonpu anta klem thuthe det lo.
Arlong kethoktang ajo anta kedamtang aningkreng ahut klemkledet ajok barla apor ahut longlor phur etsi nonke gari-motor kacheleng anta phere thu meme anpin lo.
Hamren along S.E (Roads & Buildings) anparta PWD Hamren Division pen PWD Hamren Sub-Division, PWD Rongpangbong Sub-Division Hamren rongsopi along dokok anta tovar mesen kavedet ke manghu meme binong pusi penang-an cheroktok arat atum chethan.
Hamren along KAAC EM Rupsing Teron helo kaike amat kedover, tame alangliphanta kelangrop asonsi thek long.
Hamren hithi barim pen Harlongjuve anathu non asapso kachelengme anta CEM Tuliram Ronghang Hamren kevang ahut PWD asaikam atum longle sangti thok prui ajoine chot lo.
Sorkar pen ke lahei atovar kapaselamji aphan asaideng deng lo lapen asai ta chenglo seta atovar abang non anta kapatangte det ke contractor tong kechokche ma, mate PWD asaikam atumsi kechokche ma ke kelang nangji akenangsot lo.
Hamren PWD asaikam pen 2017-18 abaha asai aphuthak payment kipiji along PWD EM langchari dun asonte mesenji pusi ke-ongdung Hamren arat atum chethan.
Non ateng pulote West Karbi Anglong district arongsopi pu kachekrong pen tovar kemesen ekrongnatta kave det ke ladak kedo atumsi chetherak meme anpin lo. NEC atovar kapatangvekji aphan hamphang asong do an, KAAC kachari CEM Tuliram Ronghang pen chenglok kaprek-kaprek atum nang cheto dun pen tovar kapatangji aphan ardi nang pi dun nangji puta havar arat atum choningri.

Leave a Reply

Your email address will not be published. Required fields are marked *

December 2018
M T W T F S S
« Nov   Jan »
 12
3456789
10111213141516
17181920212223
24252627282930
31  
Archives