ADVERTISEMENT

This area is available for advertisement. Please contact for details.

Arnivang
Get Adobe Flash player

Ratpangri pen kachingvai along Karbi Anglong aratchari atum ardi kipi dunde det ajok KLNLF ningduk chipi

Ingdeng 20 karlitang kachesong apinpo atum aphan KLNLF kachikimo

imageDIPHU, Thekar Matijong 6: Karbi Anglong pen Dima Hasao hini inglong alongri hemprek kangthim apharman risim kangtang pen kachesong Karbi Longri-NC Hills Liberation Front (KLNLF) kedamtang 2010 aningkan Thangthang achiklo 11 arni ratpangri pen monsam kachingkiji aphan hong nangbarlo lapen risim kangtang ta ratpangri athengno chehodailo. KLNLF risim kangtang pen kachesong voi ahut vi-phik kachipi kachesong apinpo lapen non an kaprek-kaprek akisung pen arong kachevoi do-an atum aphan pini ingdeng 20 karli arni chikimo. Diphu Taralangso KLNLF aboha along adap apor pen sai ajaimek dengsi song jabang atum song alama kangthur lapen karlitang atum aphan melur kaisi akarjong chom rongme kaparap ver thekji aphan ahirjume hangpi. Chikimo ajaimek jut det aphi puthut KLNLF song ameiphu P Dili mai chepahemphusi song ahin pen non eprang keklem-kedam nangji aphuthak chethan-chimum amai pangni. Mai along KLNLF dun meiphu Habe Tokbi, sankur chunbang Thong Teron, raikom chunbang Songja Timung, C-In C Prakash Kathar, pachethang chunbang Rijak Dera, Phulok Teron pen danglok ongdung jabang lapen klembang atum chetong dun. Mai along jasemet petke KLNLF tiri ratpangri atum ardi kipipe det aphuthak lapen kachingvai voi ajaimek along Karbi Anglong aratchari atum ardi kipi dunde det ajoine alanglitum ningduk alam chepaklang. Laso ahut alanglitum ketok pen kapangdak ke, hemprek kangthim apharman sorkar pen kachingkiji aphan pura kedamtang 2010 aningkan Thangthang achiklo 11 arni monsam aklam along vangdet aphi KLNLF kemang (Charter of Demand) tiri ratpangri aphan pajir lo. Laso aphi ratpangri pen kachingki-kachethan pining 2018 aningkan an kachingkiso lapen dilung kethom kachingvai aphurun pangrum pet batai 55 an plengtanglo. Non Framework Agreement kevanji anatsi kengkam chejor bom lo. Lasi hemprek kangthim kachepalong dap prangji aphan risim kangtang pen kachesong hong nangkebar KPLT, UPLA lapen hamphang asong do-an atumta isivet alongklam along vangra kachesong rappetji aphansi KLNLF kachoningri alamthe paklang. Hemrpek apharman risim kangtang pen kachesong non kevangji 2019 aningkan There achiklo anke ningkan 25 kepleng mate ruptalin aningkan keplenglo. Lasi laso ruptalin aniningkan katalonji aphanta chisik chedang bomlo puta song jabang atum jai.
Interlocutor AB Mathur non kevangji Thangthang achiklo Diphu arongsopi nangkahumriji aphan lamthe chipi puta KLNLF jabang atum pachinisi KAAC kachari, hamphang asong lapen UPDS atum pensi alangli chingki-chethanji.

Leave a Reply

Your email address will not be published. Required fields are marked *

December 2018
M T W T F S S
« Nov    
 12
3456789
10111213141516
17181920212223
24252627282930
31  
Archives