ADVERTISEMENT

This area is available for advertisement. Please contact for details.

Arnivang
Get Adobe Flash player

Lumbajong Mondal Congress kangdang amai

Kaprek-kaprek asong pen bang 177 atum Congress along kachingbe dun

imageDiphu, Thekar Matijong 6: Lumbajong Mondal Congress Committee atum patirpisi pini Karbi Anglong District Congress asaihem along Congress kangdang amai kangni.
Lumbajong Mondal Congress Committee ameiphu Phursing Rongphar kachepahemphu amai along alohi sarpo aman pen MP Biren Sing Ingti, MLA barim Bidya Sing Ingleng, kedamtang MAC kithur dun abang Phuding Terang, KADCC sankur chunbang Bidya Sing Rongpi, sankur chunbang Surendra Singnar, KAMMCC ameiphu Kasang Terang lapen Rukasen Ingleng atum pen chenglok ongdung Congress asongja po-pi atum chetong dun.
Mai along kedamtang MAC kilik ahut AGP asong pen kilik kachedan dun bang hini atum pen-pen kado kave bang 177 atum pini amethang asong BJP, ASDC, AGP che-ohsi Congress along chingbe dun.
Congress along kachingbe dunmi atum aphan Karbi Anglong Congress ajabang atum arideng pen Congress aphutup lapen Congress apoho pen archosi deng lo.
Laso amai along alohi aman pen kachetong dun alohi sarpo MP Biren Sing Ingti Congress along kachingbe dunmi atum aphan dengsi kachoro pajir lapen kevangji arni Congress along jakong-horang kipi dunji aphan pachini dun.
Mai along BJP atum aphan sorsarsi BJP atum India aphan isi Hindu a det kapinchongji aphansi kabor-i, seta India adet along ke khei kachingvui asonthot, dhorom ta kachingvui adet pinak, lasi ladak kedo ajat a khei lapen dhorom aphan seta kelang pachingbar nangji. BJP atum ke lapuson mathathesi Muslim, Christian lapen kaprek-kaprek adhorom atum aphan panungkuksi Hindu adet kapinchongji aphansi matha rong lo. La-an chot kali kedamtang MP kilik ahut BJP atum det adang kachelar kevanji alam pen chenglok Acha Din kevan lo pu alam ningje lo. Seta pini arni anta Acha Din puke thek longle det lo. BJP atum kachingthurtang adet asonsi kachariji aphan kabor-i seta India a det along ke pini arni anta ongdung atum ke an esan kechoji aphan kamatha kisung atumta dolang pu heihui alam MP Biren Sing Ingti mai along jai.
Meiphu alamthe kejai ahut Lumbajong Mondal Congress Committee ameiphu Phursing Rongphar pen MP Biren Sing Ingti karjapthip pen puthot Congress ajakong kapachelongthu lapen alangli ratchari along kedo kaike ta kithirthip apot kachoro pajir. Laso aphi LMCC sankur chunbang Dorsing Tisso pen mai along MP Biren Sing Ingti, MLA barim Bidya Sing Ingleng atum pen chenglok kaprek-kaprek mai along kachetong dun atum aphan kachoro pajirsi mai ingsamjin pen pachekak lo.

Leave a Reply

Your email address will not be published. Required fields are marked *

December 2018
M T W T F S S
« Nov    
 12
3456789
10111213141516
17181920212223
24252627282930
31  
Archives