ADVERTISEMENT

This area is available for advertisement. Please contact for details.

Arnivang
Get Adobe Flash player

Ingdeng 8 KFA (Rajesh) mahang kethek arni Joising Doloi along katalon

imageDiphu, Thekar Matijong 6: Kilu-kelom aphansi rat atum kilik tin along vote pi pen kapahai varet ajok pini sixth schedule aron-atang paprai etlo. Contract, chokamar le chohang dunji seta tangka pinangji kalite adon-arap do nangji. Pinpurme, ilitum aphan ratpangri pen sixth schedule alongri pusi district council pen autonomous council pilo. Lasonsi inglong aso pen akhei tin aphan ta alongri pek rep lo, seta non KAAC kachari atum methang ajakongsi chepavirbom lo. Electoral roll akimi selam nangji pu kachesong along KAAC kachari atum kapaplutji aphan nelitum along advocate nangtoisi lam nang pachedan dun lo, seta sixth schedule aron ke-ot thip ajok nelitum hai detlo. Lasi KAAC kachari atum ke Karbi pen akaprek akhei kedo-an ta vote kipi ajakong do nangji lapen kilik kachedan dun ajakong anta pinangji pusi arlo-arlo pen sai keklem do lo, seta laso alam MP kilik nangtebok het lapen vote ajoine ningje haihe, mo MP kilik jut det aphi lote bang akhei anta vote lapen kilik kithur dun long ajakong pi nangji pusi alam pangdak po. Non MoS kachetok ke mepik lapen ason-son kapachingthurji aphan tangka nangle oji pusi paklang lo, seta sixth schedule aron ke avedetsi panchayat kilik abangsi non ke nangle po. MoS ateng pulote kilik along majok akhei ta vote kejok lapen kilik kithur dunji ajakong dokok. Lasi mo arnisi Karbi akhei adim bang akhei atumsi angtong nang kacherai detji angring do. Athe Karbi akhei ke neta kilik thurdun longpo pusi ning cheparong titi, mo apor lote Karbi akhei atumsi Congress, BJP, ASDC, HSDC lapen Independent pu kachethak tap pensi kilik along rem dun detpo. kilik kehaiji ke Karbi pen akhei akaprek atum lo, komatne a Das, Chokroborty atumsi anghoi ingni longpo lapen MoS pen nang kapale ason ason kapachingthurji atangka anta halatumsi cherai etpo. Lason pulote ilitum sixth schedule kapavir ajoine po. Lasi sixth schedule aron abang ilitum khang thip nangji kali pulote ilitum akhei arnisi ke virdetji pusi 24+org. bidisar J.I Kathar jai. Karbi Farmers Association ameiphu Rajesh Tisso kachepahemphu amai along joint secy Durgeswar Ingti pensi alohi pachini apor en lapen sankur chunbang Mohon Bey mai kepha alamthe jai. Bangso amai along JI Kathar IAS (Retd) alohi sarpo aman pen chetong dun. Anparta KRAA ameiphu Dhormo Sing Teron, KSYA ameiphu Sandar Teron, KFA CEC Spok person Hemari Rongpi atum pen chenglok penang an man kedo atum chetong dun.
Saimo ateng adap porphai 10 apor song alama KFA ameiphu Rajesh Tisso arideng pen pachipur lo. Porphai 12:30 apor JI Kathar jalinsi karlitang atum aphan chikimo asai deng. Sonsi arnikangsam porphai 1 apor KFA mahang kethek a cake KFA ameiphu Rajesh Tisso ingthansi ning cheparong lo. Anparta KFA aro-arim 16 angbong keklem-kedam kemesen Phongbirik branch atum aphan nong-e pajir lapen tiri amei (central committee) along keklem kachepaduknai anong-eh Sonju Teron aphan pajir. Laso aphi lunsepo Bijoy Lekthe chetong dunsi arat aphan ason-ason alun parjusi Diphu Joysing Doloi Auditorium hall along katalon ingdeng 8 KFA mahang kethek arni katalon alir-alon pen pachun lo.

Leave a Reply

Your email address will not be published. Required fields are marked *

December 2018
M T W T F S S
« Nov    
 12
3456789
10111213141516
17181920212223
24252627282930
31  
Archives