ADVERTISEMENT

This area is available for advertisement. Please contact for details.

Arnivang
Get Adobe Flash player

Ingdeng 8 KFA mahang kethek katalon

Methang kachotiki pen kelong ale ke madu aphan choton nangne lo: CEM

imageDiphu, Thekar Matijong 6: Karbi Farmer’s Association (Samsing) atum pini Diphu Club along ingdeng 8 mahang kethek arni katalon.
Meiphu Samsing Hanse kachepahemphu ingdeng 8 Karbi Farmer’s Association mahang kethek katalon amai along chunbang Tingku Ingti alohi kapachini lapen mai kepha alamthe kejai apor en. Laso aphi mai along kachetong dun alohi sarpo CEM Tuliram Ronghang arideng pen KFA ingdeng 8 mahang kethek katalon a him (cake) pangthansi mahang kethek katalon ning arong chipi lo.
Mai along Karbi Anglong Autonomous Council a CEM Tuliram Ronghang KFA atum sai katiki ahin ardi kipi thek lapen rat aphan sai katiki ahin aning kaparong bom apot kachoro pajir.
Sai katiki pen ke lakhui seta ok pran aphan akeme the-oh, la-an chot kali methang kachotiki pen kelong athe kecho pen ning kangsam ta do puta CEM Tuliram Ronghang jai.
Karbi Anglong Autonomous Council atumta Karbi Anglong aphan organic district kapamanji aphansi kaike ta mang lo.
Sai katiki atum, kove, bikron, chek, rubber, theso, parok jangphong pen chenglok hanso lapen kaprek-kaprek asai katiki pen chingthur un. Chokamar anghoi aphan choton ding ke kachingthur aphan sung krung tahai athe Council chot kali state lapen tiri ratpang atum pen ta kado kave aphan ke chokamar anghoi kipi pachetang et un-eh.
Lasi sai katiki atum methang ale kachepalongji aphan ale kedo athengpi ke-eh karcheji atum aphan Council penta cherap-cheto dunji. La-an chot kali Council pensi kove chili pen chenglok kaprek-kaprek achili akejoi pensi ron po. Jongsi laso achili keron ahut komatne tangka kachohang dokok pulote adai tame enji puta CEM jai.
Nelita sai katiki ning kehangpik ajoine neli risomar ahut chiri pharo 3 alongle along rubber chotiki lo, seta meh nang chopidet amat ale longle det lo. Laso aphi laso alongle along amat segun athengpi pen chap athengpi cho-eh lo. Non ningkan 22 sose aphi ke sika crore 10 pen nang kenamji aphan nang kehang atumta dotang lo. Lasi neli jongsi lapuson choklem thek pulote nanglitumta ki-un eh detji alam ave. Karbi Anglong arlo ke anuttin ta do-oh kali seta chiri isi-hini alongle kedo lahai alongle akejoi bibesi sai tiki pen ale chepado nangpo puta CEM jai.
Sai katiki apharman loan avarsai ta do lapen loan ke-en atum aphan phant 33.03 a susidy ta piji pusi ratpangri atum kipi do puta alangli than.
Sai katiki lapen kaprek-kaprek kachingthur asai keklem bom ahutta hemprek hang bom nangji lapen khei isi angbong ning isi dosi hemprek kehangta sangse det nangji anparta kaprek kaprek kachingthur asaita keklem ta sangse det nangji.
Clause aphuthak thangta klemkle puke ahok kali nelitum Clause 8 kekhamkhe alam kedamtang 2016 aningkan pensi session along lamrai deng et lo. Laso kacheparai aloh pen NCST chairman aphan kachetong dun dam ahut pidampo. Karbi Anglong ahamphang asong apharman HTL, KCS, KLA atum Delhi kedam pen Clause 8 aphuthak NCST a chairman aphan kachetong dam ahut Council ahin pen MAC Dorsing Ronghang aphansi chetoi dunsi laso kacherai tang aloh paponpo puta Karbi Anglong Autonomous Council a CEM Tuliram Ronghang mai along jai.
Mai along alohi aman pen kachetong Association of Small & Medium Newspaper a sikdang chunbang lapen Thekar chapbang Longsing Teron penta mai along kachetong kaprek-kaprek ahin pen kevan sai katiki arat atum aphan sai katiki aphuthak aning parung dun. La-an chot kali alangli pen kaike amat rat atum ratpangri aphan chotong prong chot ke chokche, methang akeng pen kacharjapji aphanta bor-i nangji pu heihui alamthe pen sai katiki arat atum aphan aning parung tekang.
Mai kapajut ahut KFA dun meiphu Soronsing Rongpi pen mai along kachetong dun kado kave atum aphan kacho pajirsi mai pachekak lo.
Mai along EM Amarsing Tisso, MAC Ramsing Tisso, Dorsing Ronghang lapen Prabhat Chandra Taro, Diphu Krishi Vegyan Kendra principal scientist Dr. Subal Maibongsa, Rukasen College Asst Prof. Harve Ingti Katharpi, District Veterinary Officer Dr. Dilip Mahanta, KSU ameiphu George Timung, KSYC meiphu Praksh Terang pen chenglok kaprek-kaprek man kedo atum chetong dun. 
Pinpurme, todap porphai 9 apor KFA ameiphu Samsing Hanse arideng pen song alama pachipur pensi katalon asaimo pangcheng lo. Lama pachipur det aphi dun meiphu Dilip Ronghang jalinsi karlitang atum aphan minute isi chikimo lo. Laso aphi porphai 9:45 apor pen pharman bangphu amai ingnisi mai along penang an song aphuthak chingki-chingvai lo. Laso aphi porphai 11:30 apor pen rat amaipi pangnisi ingdeng 8 KFA mahang kethek katalon amai mesen pen pachun lo.

Leave a Reply

Your email address will not be published. Required fields are marked *

December 2018
M T W T F S S
« Nov    
 12
3456789
10111213141516
17181920212223
24252627282930
31  
Archives