ADVERTISEMENT

This area is available for advertisement. Please contact for details.

Arnivang
Get Adobe Flash player

Himanta Biswa Sarma CM amang kaheman ansi dokhang jangpo: T Gogoi

Kecho panglim le pu a BJP atum konat atangka pensi helicopter pangjar aret lo: T Gogoi

GUWAHATI, Thekar Matijong 6: Ningkan krepho Congress kecho panglim lapen kechari chokche pu akoi vansi BJP asong Assam arat athengno along vanglo. Kecho pangli ajutang angkur aphelong helang lapsi Sarbananda Sonowal kejalin aratpangri Assam along chari bomlo pusi BJP jabang lapen klembang atum ningje bomlo setame non kecharibom BJP aratpangri atum ahok –ahak pen kecho panglimle ma pusi pini pherangke amai kangni ahut Chief Minister barim Tarun Gogoi arju. Alangli kaningje thuke jongsi BJP atum kecho panglimle pulote non kedovoi Panchayat kilik along konat atangka pensi helicopter kapangjar long pop lo. Kedamtang ningkan hini angbong BJP aratpangri atum Congress pen bang ko-an ajabang aphuthaksi kecho panglim akoi kevan unlo puta Gogoi arjusi laso alar Gogoi amethang Titabor Constituency along kecho panglim alamki aphuthak van lo pusi ningje. BJP atumsi kechopanglim nai aratchari asonglo pusi Gogoi akoi pi. Minister Dr. Himanta Biswa Sarma aphanta Tarun Gogoi panosi aphongtin Matijong achiklo damdet aphita Dr. HImanta Biswa Sarma Chief Minister man un-eh lapen Chief Minister kemanji amang kaheman lake amang alongsi dokok po. Chobai chokai amonit aphanke Assam arat atumta Chief Minister paman me. Halapu Bagibill a dolong aphuthak ta alangli pherangke amai along lam vansi Prime Minister barim Atal Bihari Vajpayee lapu-an kacherap dun ave puta ningjesi Bagibill a dolong kedenji aphan kedamtang 1997 aningkansi long-eh somlo lapen laso aphi asai keklem ta paprang thekthe detlo. Neli batai batai tiri ratpangri aphan choningri det aphisi kedamtang 2002 aningkan Vajpayee asai keklem pangcheng lo. Laso aprang Vajpayee aratpangri kopi aphansi sai keklem paprang thekthe detlo pusi Gogoi arju. Vajpayee amen pen Bagibill a dolong ki-irji pu along chedon dunde lapen Lookpriya Gopinath Bordoloy International Airport ta private a Company atum kahodaiji pu along setame chedon dun thekthe puta Tarun Gogoi ningjesi laso ateng dam bom pulote mo arnisi Oil, ONGC aphanta private a Company aphan pajir detpo. Halapu khei longri alam kaningjever BJP aratpangri atum nonke khei longri kejorji aphansi klemlo pusi arbok. Pherangke amai along Tarun Gogoi kaningje thuke kedamtang 2011 aningkan kilik ahut AGP atum Congress atum along pen sika 20 crore atangka kevan pusi Chandramohon Patowary akoi vanlo. Lasi Chandramohon Patowary jongsi neli tangka kipidun pu angthek nangpaklang thek pulote neli ratchari alongklam along pen amatsi che-oh bupji, jongsi paklang thekthe pulote Patowary ratchari alonmgklam pen che-oh non. Alanglitum ajabang HImanta Biswa Sarma jongsi kipidun pulote lake neli chini dunde. AIUDF pen BJP angbong arlo arlo kacheme do puta Gogoi ningjesi BJP asongke Bangladeshi Janata Party puta arboksi Assam along a Congress ke Assam Pradesh Congress Committee setame BJP atumke Assam aneta ir ponpe pusi Gogoi ningje.   

Leave a Reply

Your email address will not be published. Required fields are marked *

December 2018
M T W T F S S
« Nov    
 12
3456789
10111213141516
17181920212223
24252627282930
31  
Archives