ADVERTISEMENT

This area is available for advertisement. Please contact for details.

Arnivang
Get Adobe Flash player

Ongdung kachingthur asai keklemji aphan CEM Tuliram Ronghang kachechak tekang

Ingdeng 8 Kajir Ronghangpi aphan kachikimo

image

Diphu, Thekar Matijong 5: Karbi Anglong Autonomous Council (KAAC), Art & Culture asaikam pen Kahora along ingdeng 8 Kajir Ronghangpi aphan kachikimo amai pangni.
Karcho amai chengche aprang KAAC CEM Tuliram Ronghang arideng pen Soil Conservation IB along kaselam floor ingpu lo. Anparta Ingdeng 7 Kajir Ronghangpi karchikimo lapen kachingduk amai along kachechak tekang atengsi Kajir Ronghangpi Memorial Park along woundary wall pen gate patangsi pini CEM Ronghang arideng pen pangpu lo.
Sonsi ingdeng 8 Kajir Ronghangpi karchikimo lapen kachingduk amai along pacheton dunsi loh charli osomar atum aphan arjan kihi kachepate bi lo. Aphi CEM Ronghang jalinsi Kajir Ronghangpi akumlin along mir alek pa-ihsi kardom asai pangcheng lo.
KAAC EM i/c Art & Culture Rupsing Teron kachepahemphu Kajir Ronghangpi karchikimo lapen kachingduk rat amaipi along alohi aman pen KAAC CEM Tuliram Ronghang chetongdun. Mai along alohi aman KAAC Deputy Chairman Ritesh Inghi pen chenglok Team Karbi Anglong atum chetong dun. Kajir Ronghangpi akai alamo West Karbi Anglong a School Inspector Katharson Ingti si than pachini lo.
Saimo ateng pen Karbi kardom alun kilun bangphu AIR Artist Joyram Phangcho lun lo. Longri along Kajir Ronghangpi amensi irlo, non bang ke Kaziranga pu lo. Kajir Ronghangpi aphan kachikimo asai KANCHANDCOM pen KARSA atumsi pangcheng lo. Aphi KAAC cherap dunsi patirpi dun lo. Kahora angkang kijui kelang adim kangthurji aphan P&RD asaikam pen kim-rang lo. India adet angbong pen Tourist icon ke Kaziranga aphansi hok lo. PM Narendra Modi ta bangso adim kapachingthurji aphan sika Crore 10,000 atangka panong lo. Lasi Kaziranga angkang phant 80% ke Karbi Anglong arlosi do, lasi bangso along pen penang an kachingthur avarsai long dun po lapen lahai kachingthur asai keklemji aphan India ratpangri pen KAAC angbong MoU alamdon chetok po. Kaipholangso Waterfall along kijui-kelang adim kangthurji aphan Finance Minister Dr. Himanta Biswa Sharma pen Special Package kapapiji aphan chingki-chingvai dam po. La an chot kalilang Deithor-Panjan-Malasi (DPM) atovar kaselamji aphan lamtoi pipo. Karbi Anglong arlo eco-sensitive kaparloji pu alam ke KAAC mentune ta chekroi dun thekthe. Lasi KAAC Secretary abitung atum Delhi rongsopi along kedo Green Tribunal along chingki-chingvai dam pasik po pusi mai along KAAC CEM Tuliram Ronghang jai tekang.
Karbi akhei ta kangthimlim lapen jutang-jubat elam-eki ta kechoklim akhei. Hako penta khei keplang, nokbe,  lokhi keplang heihui aphurkimo do lapen hahai adim (historical place) ke chehumrisi man chipi bom nangji pusi mai along KAAC EM i/c Art & Culture Rupsing Teron jai.
Pini klimsomar atum arjan kihi kachepate along kado kave Group-A pen Group-B pangrumpet bang 82 atum chepate dun lo. Arjan kihi Group-A along kechengsi anong-eh Anikaso Inglengpi (The Village School), adunthu anong-eh Aswar Rongpi (Springdal English School) lapen kethom anong-eh Ankita Bhumi (Kahora Banua LP School) atumsi long lo. Sonsi arjan kihi Group-B along kechengsi anong-eh Bhaiti Tokbi (GDSJ College), adunthu anong-eh Suman Karmakar (Kaziranga National Park High School) lapen kethom anong-eh Gulson Ingti (Chandrsing Rongpi Memorial High School) atumsi chepalong lo.

Leave a Reply

Your email address will not be published. Required fields are marked *

December 2018
M T W T F S S
« Nov    
 12
3456789
10111213141516
17181920212223
24252627282930
31  
Archives