ADVERTISEMENT

This area is available for advertisement. Please contact for details.

Arnivang
Get Adobe Flash player

NGADA rong-aje kapachun along kacherap dun atum aphan RNCS kachoro

Diphu, Thekar Matijong 5: ‘Empowering Culture to Uphold Identity’ pu athepi ensi kedamtang Phaikuni 28 arni Diphu Rengma Colony along Rengma Naga akhei atum akethenai arong-aje NGADA arong-aje alir-alon pen talon lo. Ningkan esek katiki pen athe kachirim apharmansi laso arong-aje Naga Rengma atum talon lo pusi RNCS Diphu Zone ameiphu Rega S. Rengma birta pachetak.
Pining aningkan NGADA arong-aje katalon adap porphai 8 apor RNCS ameiphu Rega S. Rengma song alama kapachipur pensi pangcheng lo. Laso along Karbi Cultural Society ameiphu Chandra Sing Kro chetong dunsi Rengma Naga lapen Karbi atum hako pen kedo-kethak lapen hako pen kachelang rappet alam than pajirmi tekang. La-an chot kali non anta Karbi pen Naga Rengma atum kedo rappet bom anparta kachemesen anparta kevangji arni anta lapuson ning isi kedo rappetji alamta alangli jai tekang apot ning arong chepaklang.
RNCS atum pen alohi aman pen kachetong dun Lolita Jeshing, Kanti Jeshing lapen Phenpiga Himbu anparta lamjai sarpo Dagi Sebu atum pen kaprek-kaprek alam kejai pen aning nang kaparung dun apot kachoro pajir lo.
Dagi Sebu NGADA arong-aje Rengma Naga akhei atum aphan ko-an akenangsot ma aphuthak klardak pen than pajirmi lo.
NGADA arong-aje along kaprek-kaprek ahavar pen kachetong jutang aterank atum aphanta kachoro pajir lo. Athe jutang aterank atum pensi kilun-kekan pen rong-aje along alir-alon nangpi dun lo. La-an chot kali jutang akekan kilun lapen kaprek-kaprek jutang akapathu heihuita alangli pensi paklanglo, lasi alanglitum aphan RNCS pen kachoro pilo.
Laso ahut Karbi Traditional Music and Research Institute Lorulangso Diphu atumta chetong dun pen Ritnong Chingdi kekan paklang dun lo. Pini NGADA arong-aje along kado kave bang 16 kilun-kekan lapen kaprek-kaprek ahin kethek atum aphanta archosi isi rong-aje along alir-alon chipi lo. Latum aphan certificate lapen kachoro alamthe pajir lo.
Rong-aje kapachunji aphan CEM Tuliram Ronghang kejalin Karbi Anglong Autonomous Council atum aphanta RNCS ameiphu pen kachoro pajir. La-an chot kali Karbi Anglong a Deputy Commissioner aphan ta keton-kelang ahin kacherap-kacheto dun apot kachoro pajir lo.
Rong-aje kapajut ahut Daniel Jeshing kachoro alamthe pajirsi rong-aje alir-alon pen pachun lo. Laso aphi NGADA arong-aje kachekak ahut West Diphu Town Baptish Rev. Athang Sebu arnam ardomsi ahirjume hangsi pachekak lo pusi Rega S. Rengma birta pachetak.

Leave a Reply

Your email address will not be published. Required fields are marked *

December 2018
M T W T F S S
« Nov    
 12
3456789
10111213141516
17181920212223
24252627282930
31  
Archives