ADVERTISEMENT

This area is available for advertisement. Please contact for details.

Arnivang
Get Adobe Flash player

Chelanglangpet pen Clause 8 aphuthak kachesongji aphan kapangdak

Kapadusi kachesong kado kave chetopet lonang: C.S Kro

imageDiphu, Thekar Matijong 4: Non kangniji Parliament Session along Karbi Anglong pen North Cachar Hills along kedo Bodo atum aphan ST(H) kipi alam kapangdakji mate kacheraiji angring kethetan aphuthak pini Karbi Lammet Amei asaihem along KCS, HTL lapen KLA song thom atum pherangke amai pangni.
Karbi Anglong arat atum kedamtang ningkan 30-40 sose India kachari aron aloh along ketokdak article 244(A) apharman kachesong aphan ardi pipesi panungkuk. Karbi Anglong arlo kedo suri 30-40 anbak a Bodo atum aphan ardi pipe pen Clause 8 pachun pen ST(H) kipiji pu tiri ratpangri pen state ratpangri atum keklem aphuthak KCS ameiphu Chandra Sing Kro ningduk chepaklang.
Lapuson tiri ratpangri pen state ratpangri atum keklem ke Karbi akhei mate Karbi Anglong arat aphan nang kelangrem asonsi man lo. Karbi Anglong kedo lakh 10 sose arat ke monit kali detma pusi alangli ningduk chepaklang. Lasi non aphong Cluase 8 aphuthak kapadusi kachesong ateng lo, athe non jongsi khang dunde pulote kevangji arni kekhang dunji aphan avarsai longle det tahai po, lasi kapadusi kachesong along Karbi Anglong kedo arat do-an atum ning isipet dosi kachesong rappetji aphanta alangli pherangke pen kado kave aphan choningri.
Assam arlo scheduled tribe a list hini, list I pen List II. Laso kethak ke inglong ahavar along kedo vek inglong aso lapen inglong ahavar along kedo aning kehanghe a inglong aso aphansi thak lo. Laso ateng Bodo pen-pen chenglok kaprek-kaprek inglong aso akhei puseta hako pen inglong arlok kedo thekthe mate aning kehanghe atum aphan List II alongsi thap lo lapen inglong aso inglong arlok along kedo vek atum aphan List I alongsi thap lo. Lasi Bodo atum hako penta ST(P) pisi dolo lapen kevangji arnita halaso atengsi do nang po. Ladak kedo Bodo atum aphan ST(H) pilongle pusi pherangke amai along klardak pen KLA ameiphu Suren Kramsa jai. Bodo atum pen kacharli ahin pen chenglok choki chokam amo lapen kaprek-kaprek asai ahin seta inglong ahavar kedo inglong aso atum pen paprang pik khangjang. Lasi latum aphan kaphihup inglong ahavar kedo kilu kelom inglong aso atum a an van kethakji puke kroi un-eh puta Suren Kramsa mai along jai.
Penap pen barsi Delhi rongsopi along kedo National Commission for Scheduled Tribe a chairman Nand Kumar Sai aphan chetong damsi Bodo atum aphan ST(H) kapapipe detji aphan chingki-chethan damji lapen laso ahut pinpur aloh ta pajir tekangji pusi HTL a convenor Saising Rongpi pherangke amai along jai. National Commission for Schedule Tribe hen lo ST komat aphansi lakha nangji lapen komat aphansi lakha nangne angdung kiti alamrai kipi adim lo. Laso aprang Shillong along kedo NCST regional office alongta nelitum damsi pinpur aloh pajir dam lo puta pherangke amai along HTL chairman Saising Rongpi jai. Laso aphi Assam chief minister Sarbananda Sonowal aphanta chetong damsi laso aphuthak chingki-chethan damji.
Jongsi la-an aphita kroikre pulote ahir ingtangrak kachesong asai deng nangkok po puta pherangke amai along HTL chairman Saising Rongpi pangdak.
Kedamtang 2015 aningkan Phaikuni 17 arni NCST Rameshwar Oram Diphu vangsi Bodo atum aphan ST(H) kipiji kipi nangne alam nang tarlip lo. Halaso ahut ta KCS, HTL, KLA lapen kaprek-kaprek hamphang asong atum chetong dunsi kekhamkhe alam chepaklang dun lapen pinpur aloh ta pajir dun lo. Halaso ahut isi ningduk meme alam ke, ‘Karbi Anglong arlo kedo ratchari asong atum pen lamthe isi natta ave’ puta pherangke amai along KCS ameiphu Chandra Sing Kro jai. Laso ajoinesi non lapuson angthek klang lo puta alangli alangli jai.
Penap HTL Convenor Saising Rongpi, KCS ameiphu Chandra Sing Kro, KLA ameiphu Suren Kramsa lapen HTL Convenor Khorsing Teron atumsi Karbi Anglong arlo kedo hamphang asong anparta Karbi Anglong arat apharman Delhi aphan barpo puta pherangke amai along pangdak.

Leave a Reply

Your email address will not be published. Required fields are marked *

December 2018
M T W T F S S
« Nov    
 12
3456789
10111213141516
17181920212223
24252627282930
31  
Archives