ADVERTISEMENT

This area is available for advertisement. Please contact for details.

Arnivang
Get Adobe Flash player

Aronre angtan amonit aphai nang kebat ke-ong ajok phere meme

Danielson Bey
Diphu, Matijong 1:
Kedamtang penang an aningkan pen Karbi Anglong angtan amonit atum ke-ong dun aphai pen nang kebat thek long. Aprang pen Bangladeshi Muslim kave pu adim anseta non ke bangso akhei atum nang kedo thek long lo.
    Kedamtang BTAD along kesoluk-kesodak atemon kedo nang kok athe ta Assam along Bangladeshi atum ke-ongdung aphai pen nang kebat ajok pusi BJP asongja po LK Advani ningje. Arni vang lapen aningkan vang ta bangso akhei atum North East along aphai nangbat bom, non ke Karbi Anglong arlo atok ano along ta Bangladeshi akhei do lapen laso akhei atumsi penang an asai ke klem lo. Bangso ajok methang dak Karbi Anglong along hako pen kedo atum ke kachong dat athai kave ajok penang atum Bangalore, Mumbai lapen kaprek-kaprek rongsopi kethe adim along kachongdat aphan dam nang lo.
   Kedamtang 2005 aningkan IMDT a Act India Supreme Court pen angtan a monit aphai nang kebat kepalang ji aphan deng lo, bonta Assam government kachari Congress atum kelang kachari pame kethekthe ajok bangso a Act Supreme Court pen parai det aphi ta Assam along Bangladeshi atum ke-ongdung aphai nangbat lo. Jongsi Assam along lahai asai pen chepajokji pulote Assam a Chief Minister, India Prime Minister mate Congress atum lahai Bangladeshi atum aphan kepangthek asai deng pame nangji. Jongsi lahai Bangladeshi atum aphan pangthek pameme lapen lapusonsi aphai nang bat long bom pulote Assam along lason kesoluk-kesodak atemon kevangji arni ta kedo thuji angring do lang.
    Assam along kedo penang a district along Bangladeshi atum kedo oh ajok kepaphihup akhei atum kedo kethak kachekomrom asonsi thek long lapen methang alongri longpat along kedo ta kaike kaphere pensi do nang lo. Assam along kesoluk-kesodak asai nang kedo ke India along kedo akhei lapen angtan pen kevang amonit angbongsi kachadan pusi LK Advani ningje.
    Karbi Anglong along ta penang an adim ke Bangladeshi a Muslim atum ke-ong dung aphai pen nang kebat thek long. Lasi lason jongsi nang bat bom pulote kevangji arni ke Karbi Anglong kedo inglong aso akhei atum lapen Karbi atum  methang aphan amat ta kaphere meme angthek lo. Lasi laso aphuthak KAAC kachari atum isi kemesen asai kedeng pen kevangji arni lahai akisung kephophe detji aphan non pen sai kedengsi keme. Kedamtang penang aningkan aprang KSA lapen kaprek-kaprek hamphang asong atum Bangladeshi aphan kepangthek asai deng lo. Bonta ke-ot thipthe det ajok puthot la-an sosesi Karbi Anglong arlo Bangladeshi aphai nang batlo. Anparta ta bangso hamphang asong atum kedeng asai along govt atum kacherap dun kave det ajoksi bangso asai pachunthek det lo. Lasi non Karbi Anglong Autonomous Council kachepahemphu atum ta bangso aphuthak kematha parsik pen sai kedeng kenangsot lo.

Leave a Reply

Your email address will not be published. Required fields are marked *

December 2018
M T W T F S S
« Nov    
 12
3456789
10111213141516
17181920212223
24252627282930
31  
Archives