ADVERTISEMENT

This area is available for advertisement. Please contact for details.

Arnivang
Get Adobe Flash player

Autonomy nangji seta autonomy chinine

J. I. Kathar, IAS (Rtd.)
Diphu, Phaikuni 30:
Karbi, Dimasa lapen kaprek inglong arat atum, “Autonomy”, “More Power”, “Autonomous State” lapen “Separate State” nangji pubom. Seta kopi aphan si Autonomy, More Power, Autonomous State lapen Separate State pu kipu ma, la chininedet ason. Sixth Schedule angdengpi 2, angdengso 6 pen 7 pen ajok Autonomous Territorial Council angkang arlo ilitum aphan ratchari ajakong kethetan ekepitang do.
Labangso ajakong ke, emethang si Council, Town Committee, Ser Van Kep, Tulsong Vaisa, Salaiyaro (Village Council) heihui lapen Co-operative Society heihui a kilik kapedo lapen voter list kaselam ajakong. Karbi pen inglong arat atum aning kehang ateng pen keche atum aphan voter list along amen pethap longledet lapen kilik ta parjap longedet ajakong ilitum aphan nangpi et lo. Khasi Hills Autonomous District Council along ke, Khasi pen Karbi atum si Council a election along arjap dun longchot lapen vote ta pi longchot.
Lahei a kilik along vote jok longlok lapen kilik ta arjap longlok apot si, keche atum aphan phere nangkok si longle lapen voreng asai ta keche atum aphan pi varet si, Karbi pen kaprek inglong arat atum ke duk thu varet lo. Abinong ke, inglong arat pen Karbi atum apharman alongle lapen voreng asai keche atum nangkapachithi dun longledet ji aphan si Sixth Schedule kapangni lo.
Lapu-an kethe political ajakong ephan epi tanglo, seta jatsemet Karbi pen Dimasa a muluk atum Jongja kangwai thekthe apot, ilitum asongja atum, election kapedo lapen voter list kaselam ajakong ta Assam state atum aphan chipidet. Assam State Election Commission ke akaprek kali lo, lake Assam government arisim chot lo. Therak meme ong, pulote aning ke-oi atum dokok ji tema, seta alam ke ahok lo. Keche atum ke ekangnekchoi lok lo.
Lapuson methang ajakong kachechinine atum ke jat a “More Power”, “Autonomous State”, “Separate State” ta kehangji athe aveh. Sixth Schedule ke Constitution lo pu chininepin le kopuson si la lar nangji ma lar nangne ma pu kipu thek po ma? Autonomous Power, Autonomous State, Separate State pu kopi aphan si kipu ma, la kachinine atum ke long thu lok seta thang ale pedo thekthe lo. Ilitum thek dak lo. Seta Autonomous State kalite Separate State ke, nangvek lo. Atheke, Autonomous State kalite Separate State ave te, Sixth Schedule ta pichun un-eh. Lapen ingtangkong a Sixth Schedule aveh te Autonomous State pen Separate State anat ke Hills Scheduled Tribe atum aphan rai un-eh, pejok ta un-eh.
Sixth Schedule ajakong kethe alam Karbi pen kaprek ingong arat atum kachinine alam, 05-10-2018 arni Assam Assembly Central Hall along mai tangdet aphi, inut keche thekser a MLA isi sodak alam ningje. Alangli kaningje lapuhelo, “Sixth Schedule ke lapu-an a keme lapen kangtang a ron. Thangta thekthedet a monit atum aphan hodaikok amat si amethang adet chepanahok-i thurong lo”. Bangso keche a MLA kaningje chekhang si, “Throwing jewels in front of pigs” mate “Phak angno mukuta kevar”, pu ningje hoi amat chingtonkok lo.

Leave a Reply

Your email address will not be published. Required fields are marked *

December 2018
M T W T F S S
« Nov    
 12
3456789
10111213141516
17181920212223
24252627282930
31  
Archives