ADVERTISEMENT

This area is available for advertisement. Please contact for details.

Arnivang
Get Adobe Flash player

Clause kapapraiji lapen Article 244(A) kapachunji apharman Matijong 8 pen sodak chesongji: Hamphang asong

imageDiphu, Phaikuni 27: Atumi Phaikuni 26 Urmi arni Ghonta 12 Karbi Anglong pen West Karbi Anglong kangkir ingsamjin pen pachun det aphi KSA, KNCA lapen kachelang rappet hamphang asong 16 atum pini District Press Club of Karbi Anglong along adap porphai 11:30 apor malom pherangke amai pangni.
Assam along kedo inglong a district Karbi Anglong district hini lapen Dima Hasao arat atum aphan BJP ratchari asong ajabang LK Advani, Rajnath Singh atum pen chenglok Assam CM Sarbananda Sonowal lapen minister Dr. Himanta Biswa Sharma atum pen article 244(A) kapachunji aphan aphong-aphong lamchak pitekang det aphita kapachunche det lapen Karbi Anglong arat atum aron ateng kachehang pachunchesi BLT alamdon along kedo Clause kapachunji pu tiri ratpangri atum keklem bom aphuthak KSA, SYC, KNCA, KAWJF, UKYA, KYDO, SYJ, HPYA, AISA, AKASKU, AIKSU, KADA, KAUPA, NSM, ULDC lapen KYO atum ningkangsamse chepaklang. Lasi BJP atum kachechak ateng chepapleng nangji pu hangsi non kevangji Matijong nerkep arni Karbi Anglong angkang long march kachesong asai dengji lapen Matijong 11 arni Karbi Anglong arongsopi Diphu along Karbi National Protesh Day pamansi sodak kachesong asai dengji pusi pherangke amai along KSA ameiphu Simeon Rongphar pangdak.
BLT Clause 8 Inglong a district along kedo Bodo atum aphan ST(H) kipiji pu alam pen ajok aphong-aphong Karbi Anglong arat atum chesong nang lo. Lasi non kevang Matijong 11 arni pen kapachengji Winter Session along kaike aphan amatsi Clause 8 paprai dak khangjang nangpo puta kehang alamthe pherangke amai Simeon Rongphar pangdak.
Lason ahut ajirdingklui pen Karbi Anglong arat kachehang article 244(A) autonomous state ta laso Winter Parliament session along pachunvek nangpo puta kehang paso. Jongsi kehang ateng pen pachunche pulote KSA lapen kachelang rappet hamphang asong 16 atum kachesong ingtonte lapen laso kachesong ahut jongsi kopene kaheno dak angthek dokok puseta netum aphan akoi nangpi longle, kachari bom BJP ratpangri atumsi adai che-en nangji puta pherangke amai along Simeon Rongphar pangdak. Lasi BLT alamdon Clause 8 kapapraiji lapen Article 244(A) kapachunji apharman kachesong along Karbi Anglong pen West Karbi Anglong arat do-an atum kacheto dunji aphan hamphang asong atum pen choningri lo puta Simeon Rongphar pangdak.
Laso kachesong along so-arlo atum ta ongdung pen nang cheto dun nangji pusi KAWJF ameiphi Beaulet Beypi choningri. Karbi Anglong akisung along so-arlo atumta thur dunpaksi chesong dun nangji, kevangji arni komatne inut bang hini vet kachesong pu kemang ason chunche detji, lasi rat thurpak kachesong along rong kedo sai keklem arlosomar, saihem along chokamar keklem bom atum pen chenglok college, university along loh kacharli bom arlosomar do-an atum nang cheto dun nangji puta KAWJF ameiphi Beaulet Beypi choningri.
Bodo akhei ajabang atum thurpaksi Delhi along kachingki dam pen chenglok kaprek-kaprek asai pen kehang ason mate BLT lamdon clause kapachunji aphan chesong lo, seta ladak Karbi Anglong Autonomous Council atum pen chenglok MP, MLA atum kangsamri aphuthak AISA chunbang Ranjit Kramsa pen pherangke amai along jong. KAAC atumta pherangke atum athengno lam kaningje chot ke chokche, tongsekot session ingnisi BLT alamdon clause 8 pachun pen Karbi Anglong pen Dima Hasao along kedo Bodo atum aphan ST(H) kipiji aphan tiri ratpangri atum keklem bom aphuthak khamkhe alam cheparai nangji. Laso ateng kekhamkhe alamthe Council along kacherai ateng state lapen tiri ratpangri atum along pale serak nangji puta AISA Karbi Anglong a chunbang Ranjit Kramsa pherangke amai along pangdak.
Non aphong a Parliament Session kangni ahut BLT alamdon Clause paprai vek nangpo lapen Karbi Anglong pen Dima Hasao apharman article 244(A) autonomous state kapachunji aphanta cherai vek nangpo pusi District Press Club Karbi Anglong pherangke amai kangni ahut Simeon Rongphar pangdak.
La-an chot kali Matijong 8 arni pen kachesong ahut kaprek-kaprek ahavar pen kachesong arat atum kaprek-kaprek avarsai pen mate ajahak ke akeng penseta vangsi Diphu along nang pale po lapen Matijong 11 arni ongdung arat chingrum pen Karbi National Protest Day paman pen kachesong asai dengpo puta hamphang asong 16 pen KSA ameiphu Simeon Rongphar pangdak.

Leave a Reply

Your email address will not be published. Required fields are marked *

November 2018
M T W T F S S
« Oct   Dec »
 1234
567891011
12131415161718
19202122232425
2627282930  
Archives