ADVERTISEMENT

This area is available for advertisement. Please contact for details.

Arnivang
Get Adobe Flash player

Meghalaya-Karbi Anglong adui-ahoi alamki ke kejut un-e atemo

Ramsing Ronghang, Dongkamukam:
Assam-Meghalaya, State hini a Sorkar angbong 1971 pen nonpu arnita ‘Inter-State Border’ aphuthak ‘angkur-aphelong’ patiniji angring avelang. Seta, Sorkar hini angbong jongsi kachekroi lote alamthe ke arnisi petta pajut kok un. Seta kachekroiji angring kavedet ajoinesi kijut-kepleng patini thekthe det lo.  Meghalaya-Assam Border pulote jasemet ke Karbi Anglong lapen Meghalaya ahoi aphuthaksi ili chini dam lo. Karbi Anglong (Mikir Hills) District 1951, Jangmipo 13 arni Assam Government, Tribal Areas Department ahin pen kapaklang a ‘Notification’ helo Karbi Anglong District kapathir ahoi lo. Laso kapaklang along kapathir adui-ahoi (Boundary of the Karbi Anglong Autonomous District) helo Karbi Anglong a District ahoi lo.  Bonta laso aphuthak District kimtang ningkan throksi malom ke thangnat alamki nahok ahin penta ave. Laso aphi nichi Karbi Anglong jatsemet ke Meghalaya a Sorkar ahin pensi Karbi Anglong lapen Meghalaya adui-ahoi alamthe aphuthak ameh kekai nang pangcheng lo.  Meghalaya ahin pen ke Assam Government pen kakaplang Notification No.TAD/R/31/50/148 lapen Notification No.TAD/R/31/150  dt. 3rd October,1950  ateng, United Khasi-Jaintia Hill district arlo pen penang an alongle  United Khasi-Jaintia Hill district pen thansi Karbi Anglong ahoi arlo kapathir pon aphuthak ke kroikre pusi lamki padothu voiphit lo. Bonta 1951 aningkan Meghalaya arlo kedo CEM pen danglok, MLA, Minister lapen rat atum anta kachekroisar ateng pensi adui-ahoi keplak aphuthak lamki ave det lo. Nahok ahin penta thangnat alamki klangkle. Bonta ningkan throk aphi, 1956 -57 penke laso aphuthak ameh ade nangthe bom lo. Khasi-Jaintia ahin pen laso aputhak lamki kapadothu ajoinesi kechengsi ke laso aphuthak District hini, Karbi Anglong lapen United Khasi-Jaintia Hill District Council angbong chingvai lo. Bonta chingvai chingvai aphi seta laso alamki chepajut thekthe det lo. Lasi Assam-Meghalaya State cheplakdet aphi, 1971, Chiti 10 arni helo laso aphuthak ‘Meghalaya-Assam’ Chief Ministers angbong kachingvai cheng lo. 1971 pen 2010 angbong Chief Minister banghini angbong kachingvai batai-nerkep lo. Deputy Commissioner, Superintendent of Police lapen Officer angbong kachingvai ke abatai lakha un-e rem anpin lo.  Non lethot ta 22-11-2018 arni Ri-bhoi district arlo Deputy Commissioner, Superintendent of Police lapen District Officers atum pen kachingvai padothu le lo. Border mate adui-ahoi aphuthak ke Karbi Anglong Autonomous Council ajakong arlo kalidet, State arlo ajakong pinak. Lasi Council ahin pen jonghe le chejot dun seta chepho dam un-e seta, Delhi, Dispur lapen Diphu  isipet a Sorkar si kachari pinak ajoksi non Council ahin penta chejot dunji pulote chejot chepho dun-unji. Bonta aning kehang lapen kamatha avedet pulote lale kaprek alam lo.
1971, Chiti 10 arni ‘Assam-Meghalaya’, banghini a Chief Ministers, Sarat Chandra Sinha lapen Capt. W.A Sangma angbong kachingvai athengno Meghalaya pen kapaklang ke, Meghalaya alongle, Block-I, Block-II ahavar Karbi Anglong parlo pondet . Lasi halaso ahavar puthot Meghalaya aphan voi-thu nangji pu alam kapaklang aphuthak si chingvai lo. Halaso arni  kachekroi ateng ke Block-I, Block-II puthot Meghalaya kevoi-thuji aphuthak  Karbi (Mikir) lapen Jaintia arat armu ke-ong aphuthak mate ‘Census report of 1951-61’ ateng pen kapachiji aphan chekroisi arni kaprek kangniji amai along laso aputhak Meghalaya lapen Assam ahin penta kapaklangji aphansi chekroi lo. Bonta laso esek ta Meghalaya ahin pen ke Karbi Anglong lapen Meghalaya ahoi along ason-ason kachingthur asai heihui nang keklemtap ke ingtontesi ahut-ahut Karbi pen Jaintia angbong asap-asup kacharvo ta nangdo bom lo. Puthot Thangthang 22, 1976  Guwahati along banghini a Chief Ministers, kachingvai thu alongta puthot 1971 ‘official data’ amokha ta laso apharman pangrum akenangsot pusi ckekroi thu lo. Puthot kachingvai thu, Vosik, 26 1983, arni kachingvai thu kachekroi ateng ke laso aphuthak mesen pen kachingvai kejoiji aphan ‘Joint Official Committee’ keseng nangji kenangsot pu kachekroi ateng si  ‘Assam-Meghalaya’ State banghini a Chief Secretaries pen seng si Joint Convenor ke Meghalaya a Chief Secretary aphansi laso arpu pilo. Laso esek kachehilisai meme asai badu ahin penta halaso ahavar sai kedeng ponpedetji aphan chekroi ponthu. Joint Official Committee pen ajok kado kave choklim a kenangsot an ason Jakhong a Chiklo kejut arui angbong kapaklang ponji aphanta chekroi thu. Banghini a Chief Minister kachekroi atengsi ‘Joint Official Committee’ ahin pen Jakhong, 2, 22, Paipai 5, lapen Phaikuni 15, 1983 angbong ri-tarlipsi kenangsot risim ason an kelong ateng pen ‘Report of Joint Official Committee on Inter State Boundary of Assam-Meghalaya’ pusi banghini a Chief Secretaries pen methang methang a Chief Minister arideng Phaikuni 16,1983 arni chepirep lo. Joint Official Committee along Meghalaya ahin pen kapaklang 1951 a Notification ke kapaklar pame thekthe det pen ajoinesi Rongpli arong, Jatalong, Sabuda, Thadrang lapen Umwang ke Karbi Anglong mate Block-II  arlo kaparlo pusi paklang. Laso pen ajok East Khasi Hill District, Karbi Anglong District, Garo Hill District adui-ahoi aphuthak kapaklang Government Notification 1951 aputhak kapangching pen chingvai lo. Karbi Anglong arlo pen ‘Re-transfer of Block-I, Block-II’ aphuthak ke Joint Official Committee pen pachi un-e, lasi Political mate Chief Minister banghini kachekroi aphuthak pusi lamthe chekroi lo. Lasi Joint Official Committee pen laso aphuthak Assam-Meghalaya Survey klemrap si ‘demarcation’ ji apharman kejong ke non ateng Jaintia Hills, Meghalaya lapen Karbi Anglong District, Assam. East Khasi Hills, Meghalaya lapen Karbi Anglong District, Assam a Notification amokha maps lapen Survey of India pen kapaklang 1958 Topo Sheet heihui katarlip kangchapji aphan akenangsot puta paklang lo.
Puthot kachingvai thu Vosik 17, 1985 arni Guwahati along banghini a Chief Ministers  angbong laso aphuthak aprang angthun pen kachingvai thu lo. Halasao arni kachingvai athengno keklang ke Sixth Schedule, Constitutional expart abangphu penta bidisore ke-en akenangsot lapen the Assam Re-Organisation (Meghalaya) Act, 1969 lapen North-Eastern Areas (Re-Organisation) Act,1979 aphuthak expert atum pen chiklo jontrok angbong akenangsot lapen kengset aron atovar amokha kipiji aphan chekroi thulo. Meghalaya-Karbi Anglong ahoi, Meghalaya hin pen ason-ason asai nang keklem-tap kedobom aphuthak ta halaso arni pen lahin-hin a Sorkar penta kachekroisar kalidet ason anke aphrang kachekroi tang atengsi pathir thusi ‘Status quo’ ardi pipon nangji pu chekroi. Laso atengsi hin-hin a Deputy Commissioner lapen Superintendent of Police atum aphansi laso aphuthak kapachunji aphan arpu piponthu lo. Laso aphi kachingvai thu, Guwahati, 22 Matijong 2000. Halaso arni kachingvai ahut Block-I, Block-II adung-arai kedo, Khasi-Pnar atum aphuthak ta lamthe ke-enji lapen kelang-kangchapji aphan ta peklang ponthu lo. Laso aphuthak lahin-hin a District Deputy Commissioner aphansi arpu pipen prapjin pen kapachunji arpu sot lo. Halabangso arni Meghalaya a Chief Minister ahin pen kapangdak thu, Jongsi Block-I, Block-II ahavar Karbi Anglong pen puthtot parlo pon-thu long lote nahok ahinta Karbi Anglong arlo thangnat alamki pado dunde lo pusi paklang. Laso aphuthak Autonomnous Council ahin penta lamthe kedeng pon nangji aron akenangsot alamthe ta puthot chekroi thu lo. Laso aphi Aru a Chiklo, 18, 2002 Guwahati along Assam-Meghalaya Chief Minister angbong kachingvai abatai lapuson akaprek alamthe kachingvai pon ave. Bonta Vosik 5, 2010 arni Dispur along Assam-Meghalaya, Chief Minister atum kachingvai abatai adui-ahoi aphuthak prapjin kachekroi pen kapachundapji aphan lamthe puthot deng thu lo. Adui-ahoi aphuthak hini a Sorkarpi atum chingvaibom ahut seta ‘Status quo’ patepeksi Meghalaya ahin pen ahut pen ahut Karbi Anglong arlo ason-ason asai nang klemsi  kacharvoji abidi klemrok lo. Haladak arat, a Sorkar lapen Loh charli asong atum anta isipet alamthe, puthot Meghalaya parlothu long nangji. Lasi bidi do-an klem lo. Karbi Anglong ke kachingri kave det lapen methang longri aphan kachemathathe det ajoinesi laso aphuthak klem-rok abang avedet. Lasi Assam a sorkar aphan ansi amahang cholang dunlor anchot lo. Ilitum pen ketoidun MP, MLA lapen Minister atumta bang ajambili arlosi char-um dunvoi ajoksi ning kachethe ateng pen chethe nak lo. Laso ateng langdam lote mantu apor seta, Assam a Sorkar kachari atum jongsi Karbi atum aphan keho-kiphik long lote, Meghalaya pen Kamrup District ahoi apharman ke Karbi Anglong along le Meghalaya aphan pidet tahai. Pulote ilitum kipu dunji athai amatsi avedet po. Lasi ilitum arat ase non apor ahut angtong chepado dun serak nangji kenangsot.
Adui-ahoi aphuthak Officers atum angbong kachingvai, Deputy Commissioner lapen Superintendent of Police, kaprek-kaprek atum pen kachingvai ahut seta Meghalaya pen ke ‘Offensive’, nang katengkheng alamthe kaningje pen kachepahaiji si kaiketa kabor-i. Ilitum ahin penke aprang kedamji kalisi ‘deffensive’, pran kacherai dun asai anta thek dundet abataisi ke-ong. Laso ateng pulote ili kachikiji abangphu amatsi avedet lo.
Meghalaya pen nang katengkheng alamthe, Assam Government a Chief Secretary aridak pen kapaklang pon 13 April,1951 a Notification ateng pen Meghalaya ahavar ang-ang pakekjuksi aronre pen kaparlo bor-i ke chokche. Lasi, Notification No.TAD/R/31/148 dated 13-04-1951, TAD/R/31/50/149 dated 13-04-1951 lapen TAD/R/31/50/151 dated 13-04-1951, Jaintia Hill District pen Karbi Anglong kaparlo ahavar helo Block-I, Block-II lo pusi paklanglo. Laso ahavar Block-I, 537.54 Sq. Km lapen Block-II, 1009.88 Sq Km. adang angbong rong 13 Jaintia akhei atum do pusi chepaklang lo. Block-II arlo kedo Umwang arong ke Khasi Hills Autonomous District Council, Nongpoh District Council Constituency arlo pusi chepaklang. Laso arong Census report 1961 pen 1971 ke Nongpoh Police Station angkang don 33 do lapen armu bang 152 abangphu peklang. Adunthu, Khanduli lapen Psiar ahavar. Khanduli- 12.80 Sq. Km, Psiar- 64.00 Sq Km laso angbong rong 6 do. Khanduli ahavar, ahoi ang-ang kehot pon 1970-72 aningkan Assam Government pensi aronre parlodet puta paklang. Survey of India Sheet (83 C) 1951 lapen (83 C/NE) kapaklang  atengta Psiar ke Meghalaya arlo Anparta Jowai District Police Station, Census report 1961, lason thakthaksi 1971 ateng ta Psiar ke Meghalaya arlo pusi peklang. Khanduli ta Jowai District arlo, Census report 1951, 1961 lapen 1971 ta Khanduli, Psiar, Mookhoiram lapen Tapat anke Meghalaya arlo pusi chepaklang lo. Bonta laso aphuthak Assam lapen Karbi Anglong ahin pen adui-ahoi aphuthak kapangkreve ajoksi halahai aphuthak chini pameme det. Klardak alamvoi batai-tin kachingvai ahutta paklang thekthe det ajoine, pran kacherai abisar chot ansi klem dun thek-chot lo. Bonta ili Meghalaya aphan kipuji mate ketherji arisim do-o. Govt. of India pen ‘Mikir’ mate Karbi aphan ST(H) Status pidet aphita Vosik 9, 2001 pen kapaklang ateng ke Karbi aphan deng ponpe det (de-recognized).’Mikir’ pen ‘Karbi’ chelardet aphita Karbi aphan ke nonputa ‘Bhoi’ pusi pubom pipot? Meghalaya, Ri-bhoi District arlo 2001 aningkan Karbi atumdetsi vaikang isi angbong rong- 66 do. Halaso ahut Karbi atum detsi armu 13,000 sose MLA Constituency arlo,Nongpoh, Mawhati, Umroi, Raij Nongkharai, Raij Umwang, Raij Kharpati, Raij Marmain lapen Raij Kuswai. Lahai kadokave arong anke Karbi atum amethangsi rong kachari asai ta cheklem lo. ‘Meghalaya Land Transfer Act,1971’ ateng ke haladak kedo a Karbi atum aphan longle-phelang ahemphu pachekrong avarsai pipe. Sorkar ahin manglor pen varsai kipipon pu thek longle. Karbi Anglong ke lapuson badu aphan ta kethak mate keplak asai klemkle. Haladak kedo a Karbi atum aphan MDC, MLA lapuson karjap dunji aphan avarsai pipe. Medical lapen Engineering kacharliji pu ning kehang lapen kethekser a Karbi atum aphan avan kehot pavedet. Karbi Anglong pen cheraplok Ri-bhoi District along kedo a Karbi atum aphan Karbi Anglong kaparloji abidi ili klem no ma?  United Mikir & North Cachar Hills District kikim ke Phaikuni 17, 1951, laso ahutsi Karbi-Dimasa kedo ke-ong adim, Nagaon, Sibsagar, United Khasi & Jaintia Hills Districts, Karbi ke-ong ahavar Block-I, Block-II ta chekroisar atengsi parlo lo. Block-I,Block-II ahavar, 1546.92 Sq. Kms angbong kado kave bang suri 6000 sosechot Khasi a khei atum do, Karbi, Tiwa lapen Chainong kivi akhei pangrumpet bang suri 40,000 sose armu laso ahavar angbong do. Lasi 1971 kachekroi, armu ke-ong ateng pusita Meghalaya pen kipuji alamthe amatsi ave det nangpo. Bonta Karbi Anglong adui-ahoi alongle-phelang kelang officers atum jongsi 1951 kepathir adui-ahoi aphuthak chinine det pulote kechokche komat po?
‘Inter State Boundary’ alamthe bithukjoksi ‘Inter District Boundary’ aphuthak ta Karbi Anglong Autonomous Council kecharipon a officers atum klardak pen kachini ave det. Kachiniji aphanta kabor-i ilitum thekdam longle. ‘Inter District Boundary’, Nagaon District ahoi aphuthak nonputa api-alo patini pame thek-thelang. Laso pen ili mantu apor seta kacharvo thedung kedothuji angring thetan lo. Mantu apor seta laso aphuthak arni ke-ong ako’ pen chesikding nangji, ‘Ingnar vang tanglo Hemtap’ pu asai ke ili klem nangne lo. Adui-ahoi aphuthak Karbi Anglong Autonomous Council kechari asaikhi atum anchotle kachini nangji kalidetsi Karbi Anglong arat ta angkur-aphelong kachini dun nangji akenangsot do.

Leave a Reply

Your email address will not be published. Required fields are marked *

November 2018
M T W T F S S
« Oct   Dec »
 1234
567891011
12131415161718
19202122232425
2627282930  
Archives