ADVERTISEMENT

This area is available for advertisement. Please contact for details.

Arnivang
Get Adobe Flash player

Private Tuition kapathe ajok kadure charli osomar kapaphi dun

Danielson Bey, Diphu:
Assam arlo kedo a district angbong kacharli ahin kapaphihup alongri Karbi Anglong arlo jasemetpet Diphu angkang private tuition kapathe ajok kadure det charli osomar atum paphi dun.
Diphu ahithi angkang along phant 70-80 a osomar atum private school alongsi loh charli dun bom. Phant 70-80 charli osomar angbong anuttin osomar atum ta akhi-adat kedo ahemtun pensi kevang lapu kali, bonta laso angbong ongdung atum ke kadure det ahemtun pensi kevang.
Private school kidun pen lahai osomar atum mesen loh charli long lo ma ? Anuttin osomar atum ke mesen loh charli longle. Athe ongdung private school along kethan athanbang atum private tuition si kapathe. Laso ajok school ahem along kapatang nangji a syllabus anta tuition alongsi kapatang. Laso ajok kadure det loh charli osomar atum mate tuition ke-en dun thekthe osomar atum syllabus patang dun lim longle. La-an chot kali, syllabus ateng than puseta school ahem along ke than plir kali than prui-prui pensi kapatang. Laso ajok ko-an ma giyan kelong nangji osomar atum school ahem along longle.
Lason ahut private tuition kethan a thanbang atum aphan jongdam varet ta chokche. Athe private school along kethan athanbang atum bainong kelong jumpik khangjang. Ongdung private school thanbang atum kaporhi le B.A, M.A, B.Sc, M.Sc puseta non puta Sika 5,000 abersi
chiklo abainong kachodeng ke-ong. Laso ajok private tuition thanthe te chepador un-eh.
Karbi Anglong arlo private tuition kapathe varet along government education asaikam atumsi kechokche kethe. Government school along kacharli osomar atum pen apar private school along kacharli atum giyan kelong ongmuchot. Bainong ahin pangbar dam pulote government school along a thanbang atum ke akijumnei seta Sika 15,000-20,000 kedeng atumsi ke-ong. Seta government mate education asaikam atum kelang dun kapangkre ajok loh kethan ahok kave ajok, asapso ajakong kedo api-apo atum government school along methang asomar aphan ketoi dunji ninghanghe. Government atum pen charli osomar atum aphan kacharli avarsai kipi dopik khangjang. Uniform pen chenglok kitap, bohi, kecho kijun avarsai anta pilo. La-an avarsai pidet aphi ta api-apo atum methang asomar atum government school along ketoi dunji aphan aning hanghe. Athe matric asatlang along angthek aningkan vangle langdam puseta government school along kacharli osomar atum pen apar private school kacharli osomar atumsi satlang ki-un aphai ke-ong.
Laso ajok saijokje api-apo atum methang a osomar atum aphan private school alongsi chotoi dun nangkok lo. Lasi anuttin osomar atum kacharli long nangji ateng kacharli kapaplenglim longji aphan private tuition abang ardi pajum nangji. Laso kapajumji aphan education asaikam atum kachelar kenangsot. Private school pen apar government school along loh kethan mate osomar atum aphan giyan kipi memu nangji. Private school kachepahemphu mate ahemphu atum abang private tuition kapathan longle detji aphan khang dun nangji.
Private school thanbang atum aphan chiklo bainong kipi memu chot nangji, government atum pen private school aphan ta ajahak ahin cherap dun nangji.
Lahai kado kave asai along loh charli ahamphang atum kelang dun nangji arpu thetan khangjang, kali pulote Karbi Anglong kedamtang aningkan an asonsi kevangji aningkan ta Assam angkang along kijutsi angdeng alongsi amen dodun bom po. Jongsi kachelar ave pulote private school along kacharli private tuition ke-en atumsi mesen asatlang angthek vangthek chotji. Kadure det tuition ke-en dun thekthe lapen government school along kacharli osomar atum ke satlang undun chit seta kado kave pen aphisi dodun bom po.
Private tuition aphuthak Karbi Anglong arlo kedo loh charli ahamphang asong atum kelang dun kenangsot, tuition fee heihui chelonchit pen kappa-enji anparta school along tuition ke-en aosomar lapen tuition ke-en eh aosomar atum angbong keplak kapave detji aphanta loh charli asong atum lang dun nangji.
La-an chot api apo atumta tuition pa-en lo pu amat tangka pidun chot tuition fee pidun chot amat aosomar kacharli along kachelar doma avema lang dunde pulote chokche detji. Lasi api apo atumta osomar aphan chelang dun bom nangji lapen school along ningkan kangthim angbong kaprek kaprek asatlang ke-en do, lahai angthek alongta osomar atum kethek anat paprang ma paprangpre ma cherok dun tok nangji.
Government school kapadun atumta lapuson thakthak government atum pen kado kave aosomar ta loh thek et nangji pu akemang pen ning 6 pen ningkan 14 arta aosomar atum aphan free & Compulsory pinchong lo. Laso ateng kitap pen chenglok uniform anparta an essan akejoi pen pacho lo. Angton pen akejoi kelong et pu ajoine api apo atum lapen osomar anta ardi pipe det asonsi thek long.
Laso ajoine osomar toi plot po school ahem along osomar atum kopisi keklem lone api apo atum chelang dunde. Laso kelang dun abang kave det ajoine thanbang atumta osomar aphan loh kethan kapangkre dokok lo. Government avarsai kipi ahut along kachepado dunji kali osomar aphan panahok rong asonsi plang det lo.
Private along kethan ason thakthak a thanbang atumsi government school alongta loh kethan lo, seta government school along satlang ki-un aphai aningkan vangta jumpikpik, athe api apo atum ardi ke-en dunde apot pusi jong dun nangji.
Diphu malom kedo ajahak government school athanbang atum kethekpikpik ajoine private school along kacharli aosomar atum anta lahai athanbang atum along tuition cho-en dam lo.
Private lapen government school angbong kacheprek ke thanbang lapen school infrastructure kali bonta kacheprek ke api apo atum ardi ke-en dun hen lo.
Lasi lahai along jongsi api apo atum ardi endun lapen aosomar kacharli along chelang dun pulote tuition en eh seta satlang ki-un eh detji alam ave.

Leave a Reply

Your email address will not be published. Required fields are marked *

November 2018
M T W T F S S
« Oct   Dec »
 1234
567891011
12131415161718
19202122232425
2627282930  
Archives