ADVERTISEMENT

This area is available for advertisement. Please contact for details.

Arnivang
Get Adobe Flash player

Beha-bepar klem dun rom-rom, longle phelangta cheraikom rom-rom

Kithurmi atum kiphi kimung a-ok kejor ahin kachihung

Sarjip Kathar, Diphu Rongchingri:
Beha-bepar ahin inglong aso atumta penang an kengkam chejor dunlo. Aprangke bang akhei Marovari, Bengali Bihari, Muslim pen danglok kaprek-kaprek akhei atumsi beha-bepar keklem ahin ke cherai det lo. Setame Inglong aso atumta halahai beha-bepar keklem-kedam atum along thekdun longsi nonke cheja-cheja pen asitin beha keklem alongta kengkam chejor dunsi kachihung thek dun long lo. Pe-ri, kaso- phole, nopak-noke, han parvo, aphak ok, langok, bi-ok pen danglok asontin ahinta beha keklem kengkam chejor dun tanglo. Inglong aso angbong pen Naga, Mizo, Kuki akhei atum beha keklem ahin lit chet. Karbi akhei atumke nonsi kecharli dunmi lang pudet ta henone. Aprang penta keklem dun atum do bonta hulaso ahut ke bang akhei pen pangbar dun pulote phant pharo (100%)  angbong pen phant pho (5%) anbaksi keklem dun do. Nonke Phant 40% 50% anke ledunlo. Beha kethele chejok dun abang jumpik lang pusetame behaso abangke penang an cherai dun theklo. Karbi akhei atum halahai beha-bepar along kachejok dunthek ajoine sika-isi sika hini anvetle long pusetame penang an atumke methang apiso-aso atum pen hemtun chepangreng thek lo. Komane atumke gari-motor kevek pen, komane atumke peh-ri kejor pen, komane atumke han-ok, phole-phukok kejor pensi chepangreng bomlo. Pudam sinang aprangke Karbi akhei angbongta ongdung atumke arni kangthim hor kijun kapathe munak ajok nahokta ledun thekthe hem apiso-aso atum pen kachebohong-kacharvo ansi dokhang janglo. Halaso ahutke kacheroktok kave lapen kecharli ahin katikuk lapen kachihung kave anparta beha-bepar keklem nangji ahin kacheroktok kadure ajoine lo.  Non halaso a-ove  abang penang nangchelarsi rong-rup arlota nonke arni kangthim hor kijun kangri-kangkrang ajutang abangke kethek long jumpik anlo. Kosonsi osomar aphan loh pacharli dun nangjima lapen kosonsi apiso oso pen hemtun chepangreng nangjima aphansi nonke keklem –kedam chonpro lo. kethek-thek atumke beha-bepar pen akaprek contract asai keklem penta kachepangreng atum dolo. Ajat pen pusetame kanghu-kanghi pen akaprek asai an klemsi chepangrenglo. Sok, kove-bikron lapen peh kar-om kejor abeha ahin penang an chihung dun lo. Lason thak thaksi asap-oh jakong kedo atumke devak (rubber), sah (tea) katiki ahinta chihung pik anlo. Halahai kado-kave abeha keklem ahinta kachihung dun ajoine methang alongri-phelang ta cheraikom long bomlo lapen hithi-kulat dim aklong tame cherai longbom lo. Lake monsam pen dim aklong kacherai abidi lo. Langdam sinang nonke Diphu arongsopi pen danglok nahok ahithi akulat alongta hum pharo isi akulat angbong pen hum ingkoi thong-kep ke Karbi akhei atum kulatkachobi dun do. Laso along jasemet petke so-arlo atum aphan choro nangji athe han parvo kejor pen danglok asitin kulat kibi along pusetame so-arlo atumsi kedo ongmu. Lake therakre-kapherere det ajoinelo. Lasonsi anutinta laso abang ning arlo thapthot asonte beha-bepar keklem ahin ilitumta penang an kengkam chejor dun longji. Kecharli ahin ardi kipi ajoine nonke Karbi akhei angbongta kachekhamkhe-kachelang selet ajutang abang penang an nangjumlo. Laso penta beha-bepar keklem ahin kejokvan ason dolo. Munthi hur senang aprangke komane inut bak jongsi alon domuchot lapen chingthur muchot ason thek dun long pulote halaphanke kosonsi kapavirjima aphansi kaiketa arlen e titi. La anchot ta kali aning kelangno, ning keter, ning keho atumke  tangka maha chepadam chot penta halaso keplang kiphi atum aphan keberji aphansi re rok titi. Laso ajutang langno virdet lo puke pudam thip un-eh lang setame penang anke nangvirlo. Methang-methang asai kacheklem-kachelang atumsi ke-onglo. Lasonsi kecharli ahin, beha- bepar keklem ahin, choklem chodam ahinta nonke kachihung lapen kachingbai ajutang kirim ajoine penang an paprang dun lo. Laso ajutang jongsi ilitum rimver thek pulote angsong kacheparje dun unji aphan der-oh elo. Non isi ning arong meme alam abangke ke-ongdung kithurmi Karbi ariso atum kiphi, kimung, ki-up a-ok kejor kachihung thek long. Phak-ok, lang-ok vo-ok pen danglok ason ason a-ok kejor thek long. Arnikangsam lote tovar ari nudeng chiitibin krai pen halahai a-ok kejor totren thek long.  Lata isi ale kedo abeha lo pu chethek longsi kejor cheto cheto lo. Athe kiphi-kimung lapen ki-up pu ahurmu ke maduta kecho aning kehang abang do lapen Jangthu pen karmu abangsi aning kehang abang kave thu. Karbi pen akaprek akhei atumta nonke lason kecho ahurmusi churi vung-vanglo. Lasonsi Karbi akhei atum kaprek-kaprek abeha ahin kengkam chejor dunpik nanglang lapen ning kachepaningding lamsam, lamdok-lamthu abangta kecharli dun kenangsot lang. Lalo pulote Karbi akhei atumta beha klem dun thek pamelo pu chipu dun unpo. Hithi kulat along kejor-kelan pen akaprek ahinta ilitum chihung dun nanglang. Athe Karbi Anglong alongri non amatke aphare-aphare longle ajat ason ta tikike lapu amatsi palom tan lang. Lasi halahai alongle along jongsi seletle pin pen longle ahemphu atum kalite komane kaseletle nai sai katiki aning kehang methang Karbi amonit hijan angbong aphan jongsi devak kalite, sah, nok, arphek, tharmit, hanso, nempo, kove –bikron patiki asonte me pikji. Katiki ason jongsi ilitum chelana dun pameka pulote ladak penta ilitum kereng avarsai chelong un. Karju dun long atengke, lahai katiki penta penang an atumke apiso-aso aphan kachelana det kali poka ahem arit kachikim lapen gari -motor, longle- phelang kachenam atumta dopiklo. Lasi ahut pen ahut ke lahai beha –bepar keklem –kedam ahin chethan-chepare kacheroktok asai kedeng along Karbi akhei atum kacheto dun kenangsot lapen methang angbongta chethan -chepare kenangsot. Non pirthe angkangpi arnivang lakh-lakh amonit aphai nangkebat bom along ilitum muthi dun parsik pame nangji athe. Monit nangkabat bom ajoine longle-phelang lapen chokomar avarsai ta nangjum bomlo. Lasi laso along koloso atovar kedamsi chepareng unjima halaso abangsi ardi pi nangj. Kerengji aphanke non apor ahut beha keklem henlo risim kethe nailo pusi neli matha dam. Lasi behaso-beha kethe tame eson ma esonke chirip dunvek nangji,. Eson abeha along chirp dunling pensi choklo puke lata chokche un pulote ko-anma ki-un laso atengsi klem nangpo. Non Marowari, Bengali, Muslim akhei atumke elong vet adimsi kijum naita son thom-sonpli abe do. elong adimke peh-ri akulat pulote along kaprek adimke sang, dali, phurui athe harsun kejorsi thek longji. Lasonsi alanglitum ke, elong sika isi-elong sika hini pangrum pensi chepang renglo. Bang aphu atarlok alongke chopho dunde lang setame keklem kedam along charli dun nangpo. Imithang alongri imithang adim phere therak jokplot pen anutinta beha-bepar keklem ahin chihung dunpo pusi ning thelo lapen keklem-kedam bom atum anparta keklemji aphan kachisik atum an aphanta arnam ahirjume hangpilo lapen beha bepar keklem pen khei longri pachingthur anparta paklar ponpo pusi ning thelo.   

Leave a Reply

Your email address will not be published. Required fields are marked *

November 2018
M T W T F S S
« Oct   Dec »
 1234
567891011
12131415161718
19202122232425
2627282930  
Archives