ADVERTISEMENT

This area is available for advertisement. Please contact for details.

Arnivang
Get Adobe Flash player

Garden ajo anta keter ahormu kevar dam

Diphu, Thekar Phaikuni 21: Diphu Lumding atovar Km 5 along kedo Botanical Garden arlo komatne pangthekthe atum kithu-ki-ui kaheno tang ahormu thok dam lun.
India adang ingthir-et nangji pu akemang pen ajok prime minister Narendra Modi jalinsi Swachh Bharat Abhiyan asaideng ensi kapangthir etji aphan kaprek-kaprek asaimo pen pachethang lo. Lason ahut Karbi Anglong ta ingthir et nangji pu mang dunsi Karbi Anglong Autonomous Council pen Clean Karbi Anglong Mission (CKAM) ta seng lo. Laso ateng pen penang an kapangthir aphuthak kapachethang asai klem lo, seta Jayshree Daulagophu kedo esek ansi CKAM ta dochot asonsi thek long.
CKAM le jutkok puseta kapangthir asai kapachethang ke ingtontesi pachethang bom lo. Non apor ningduk meme alam ke la-an pachethang det aphi anta rongsopi arlo kedo arat atum cheroktok thekthe lapen kapangthir akenangsot alam nonputa chinine det asonsi man lo. Laso ajoksi Garden arlo amat ke-en eh kaheno tang ahormu vardamsi pamenthu prung lo. Lahai kevar damthip aphuthak Karbi Anglong Autonomous Council pen Diphu Town Committee lapen n Ingnam saikam atum lang dun nangji. Ladak ingnam raikom asaikhi atum dokok aphita lapuson kithu ki-ui ahormu kevar longpop ke manghumeme pusi haladak arat atum ningduk chepaklang.
Hithi arlo kapangthirji lapen adung-arai ahavar along kapangthir etji aphan Town & Country Planning atum pen keter kevarji adim pathik pame nangji. Ahok Diphu Town Committee atum Sorsuri along keter kevar adim thik lo seta elongvet ke dorde detsi thek long. Laso ajoine keter ahormu varthap varet asonsi thek lo. Pinpurme, laso atheksi Lumding kedam atovar km 5 along kedo a Aboretum along anta aketer ahormu kevar dam atum dokok lo. Lason thak ward No. 9 Birla Diphu alangroi adoloi adung Chatt karkli adim along anta aketer ahormu varsi arje palangno dak thek long. Lasi non det adang kapangthir asai kedeng kesangse pin apor ahut methang ahavar longri-longpat kapangthir etji aphan Karbi Anglong Autonomous Council pen ardi ensi DTC aphan lahai aphuthak palang dun nangji pusi ongdung kacheroktok arat atum ningje.

Leave a Reply

Your email address will not be published. Required fields are marked *

November 2018
M T W T F S S
« Oct   Dec »
 1234
567891011
12131415161718
19202122232425
2627282930  
Archives