ADVERTISEMENT

This area is available for advertisement. Please contact for details.

Arnivang
Get Adobe Flash player

Diphu-Dillai atovar komentusi kaselampo ma pusi rat kachonghong

imageDiphu, Thekar Phaikuni 21: Diphu, Dillai, Sarihajan (DDS) atovar kaselam bom ahut Diphu, Birla pen Rongplimplam adak Km 17 kaselamle det ajok arnivang tovar kachelang arat atum kisung ajok mentusi tovar selam puma pusi kaike ta cholangprong lo.
Chokihola, Deithor, Silonijan pen chenglok Duarbagori constituency anta kapale un KAAC PWD atovar ke Diphu-Dillai-Sarihajan (DDS road) henlo. Dillai pen Sarihajan adak kedamtang ningkan 2 aprang World Bank akerap pen tovar kaselam pangchengsi non an phant 70% anbak tang lo. Laso ajoine Chowkihola, Sarihajan kacheleng arat atum Diphu rongsopi an kedam-kevangji aphan akejoike longpo pusi ning cheparong rinti lo setame Dillai-Sarihajan adak tovar kaselam along Dillai adunghet kedo Rongplimplam pen Diphu rongsopi nangkepla thor FCI, Birla angdeng an nang kachetok atovar along selam asonte rat atum kachelengji aphan ansose mesen avarsai long po athe Rongplimplam-Manja-Diphu atovar ajak 28 KM an doji, setame Rongplimplam-Birla-Diphu atovar ajak Km 17 ansi dochot lo. Rongplimplam-Manja-Diphu an kacheleng atovar KAAC kacheparideng PWD saikam pen selam asonte kado kave arat atumsi mesen pen kacheleng varsai long po. Non abangke ratpangri pen thangnat asai kedengde det ajoine atovar ta vak etlo. Kedamtang MAC kilik aprang Roton Ingti KAAC PWD EM arpu kikhi bom ahut Diphu-Dillai-Sarihajan atovar kacheleng mesen nangji pu ajoine Dillai-Sarihajan kaselam alongsi Dillai-Diphu atovar ta aselam lo. Diphu-Dillai atovar mate Birla-Rongplimplam an kacheklo thor atovar kaselam along asai ke-oi ong ajoine athaksi black topping bang prui chot. Bangso ajoine ningkan isi angbong atovar amatsi heno etsi theklong. Halabangso apor ahut tovar selam tangdet pen Dillai-Diphu atovar ta mesenlo pu ajoine gariso pen chenglok bus lapen truck heihui anta bangso atovarsi cheleng lo. Bonta tovar kaselam tangdet pen ningkan isi angbong kevak-et ajoine Diphu-Manja-Dillai atovarsi cheleng etlo. Non abangke Manja-Dillai atovar ta kevak et pen ajoine kachelengji aphan kasiksak pen rat atum kaningri hangjo lo. Birla-Rongpliplam angkang rong 50 sose kaboche do lapen ratpangri  LP school lapen ME school tame penang an do, la-an chot kali methang jongjung pen kangpu school ta do, setame haladak kedo arat atum ta tovar kememe det ajoine kachelengji aphan penang an kasiksak chechak nang lo. Jasemepet keso ke-un-eh kacheponji aphan anta tovar kevak et ajoine kanglit-kangther angbong pensi chehelat nang lo. Langdamme seh kachelangji aphan Diphu Civil Hospital ke KM 10-12 anbaksi dochotlo. Sonsi chojor-cholangji aphan anta memen gari-motor ta ledam un-eh. Halapu Birla-Rongplimplam kekrongput Hapjan angkang penang an bikron katiki atum do-o, setame alanglitumta chojor-cholangji aphan kemesen atovar kave ajoine jirlo pensi Diphu rongsopi along adap prang nangkapaleji aphan nangbar nang lo. Birla-Rongplimplam adim an kacheleng atovar along kevak et adim along PWD Master Roll chokamar atum longle kethok kibuilun ajoine krengdang ahut longle abui-abui angbongsi cheleng nang, sonsi arve jang lote kanglit-kangther angbongsi rat atum kacheleng nang lo. Haladak arat atum Diphu rongsopi alongsi ke-ong dung atum ke sorkari asai punon, kachongdat punon ta kevang nang saide, la-an chot kali loh charli osomar atumta Diphu rongsopi along ansi vang nangdun rinti lo. Bonta arve kejang ahut pulote kanglit-kangther angbongsi gari-motor ta kedoi pensetame pacheleng nanglo lapen akeng pen kedam atum pusetame amethang akeng-op cheplok pensi Birla ahithi along an nangpale nanglo. Lasi haladak arat atum kachelengji aphan penang an akisung chechak nanglo puke ladak pensi angthek klangdaklo. Bangso atovar ke Diphu-Dillai-Sarihajan atovar pusi irlo, lasi Dillai-Sarihajan atovar kaselambom along Diphu-Dillai atovar ta selam pon rappet asonte mesenji pusi rat atum kehang.
KAAC CEM Tuliram Ronghang kipu Karbi Anglong angkang ningkan isi angbong PWD atovar pachetang-etji pu ateng pen pulote bangso Diphu-Dillai atovar ta kaselam kenangsot lo. Pinpurme, Diphu rongsopi along kapame mate Smart City aphan KAAC CEM Tuliram Ronghang kachepatirpi pen selam bomsi non an phant 90 anke tang lo, bonta Diphu arongsopi kachekoi not Diphu rongsopi pen kahelo Km 5 adim pen kapangcheng Diphu-Dillai atovar abangke kaselamle ajoinesi vak et lo. Jongsi bangso atovar KAAC pen prapjin pen selam pulote chojor-cholang pen chenglok chokam amo aphan penang an kachingthurji avarsai longpo puta haladak arat atum choningri.

Leave a Reply

Your email address will not be published. Required fields are marked *

November 2018
M T W T F S S
« Oct   Dec »
 1234
567891011
12131415161718
19202122232425
2627282930  
Archives