ADVERTISEMENT

This area is available for advertisement. Please contact for details.

Arnivang
Get Adobe Flash player

Constituency 26 angbong Hamren Constituency hen lo tovar kedeng ke-ongnai: CEM

imageDiphu, Phaikuni 19: West Karbi Anglong angkang Hamren Constituency angkang Dera Arlok along pini akimi BJP along kachingbe dun atum aphan kedeng amai pangni.
Inglong kekomchan Dera Arlok along kangni amai along Karbi Anglong Autonomous Council a CEM Tuliram Ronghang pen MAC Mongalsing Timung keklem kemesen apot ro tekang, la-an chot kali MAC Mongalsing Timung Hamren Constituency kapachingthurji lapen ladak arat atum tovar kacheleng joike nangji pu mathasi tovar kave adim tovar selamlo. Lason thakthak kaprek kaprek kachingthur asai ta klem lo. Pinpurme, Karbi Anglong district hini arlo kedo constituency 26 angbong pen tovar kaselamji aphan scheme kedeng ke-ongnai ke Hamren constituency hen lo, laso pen adunthu kidun ke Chinthong Constituency hen lo pusi CEM Tuliram Ronghang mai along jai.
Hemprek penap penapdik amat vandetji pu nang chakche seta hemprek longvekji, lasi hemprek hangbom ahutta kachingthur asai klembom nangji lapen non MP kilik ta nangle bomlo, lasi MP kilik ta chepahai nangji puta CEM jai.
BJP Local committee ajabang atum pen inut pen akijumnai seta bang 10 akaprek monit aphan BJP along van nangji pusi non kedobom Union Home Minister Rajnath Singh pangdak. Congress kejokvan adet kapinchongji aphan Rajnath Singh kaningje alam ateng anuttinta klemsi kaprek kaprek ratchari asong along kacherap dun bom atum aphan BJP along van nangpo puta CEM Tuliram Ronghang jai.
Tovar heihui kaselam along komatne atum kapasiksak dokok tahai, lasi lahai along rong arat atumsi lang dun nangpo, jongsi pasiksak dun bom pulote ketang nangji apor ateng pen kaselambom atovar amokha tang un-eh det po puta rat atum aphan CEM than pare tekang.
Don 108 ASDC, Congress lapen nahokta kacherap dunde atum pini BJP along kevang atum aphan CEM Tuliram Ronghang dengsi alangli kevang apot kachoro pajir tekang.
Mai along MAC Mongalsing Timung kejai ke, ‘netum kado kave tiki etlo, lasi non kecho apor chorappet nang pusi kado kave atum apha lo. Lasi kado kave ta vang pet noi, BJP atum along ke akimi aban pu alam ave, lasi BJP along kedo atum anke anuttinta isivet lo’.
MAC Mongalsing Timung pen BJP atum kachelar kevang alam aphuthakta mai along jai, laso ahut alangli kejai ke, ‘kachari along kave asong atum ke thangta kachelar ave pusi ningje bom seta lahai tovar kaselam, kaprek kaprek kachingthur avarsai kipi kachelar kali pulote kopi lo. Lahai ke kado kave aratta theklong prong lo’. Chitim alan, Longhong aso, Vokak aso keron pen chenglok kaprek kaprek kachingthur asai keklem bom hen lo kachelar lo puta MAC Mongal Sing Timung mai along jai.
Kedamtang MAC kilik ahut ASDC apharman karjap dun abangphu Mohan Terang lapen Congress apharman karjap dun Mohan Kathar atum kejai ke, kachingthur kelongji aphan rat atum kaike kachari bom ason alongsi donangji. CEM Tuliram Ronghang kejalin Karbi Anglong BJP atum kachingthur asai keklem keme kethek dun longsi netumta BJP along do dun lo pusi alangli tum jai.
BJP along kea ban akimi pu alam ave ladak ke komatsi kam keklem keme hala phansi kelang, sai keklem jongsi mesen pulote arpu kelong dunta joike pusi BJP West Karbi Anglong ameiphu Arun Terang jai.
BJP West Karbi Anglong a chunbang Jowel Tokbi kachari amai along KAAC Chairman Longki Timung, EM Jagatsing Ingti, MAC Prabhat Chandra Taro, MAC Horen Sing Bey, MAC Dorsing Ronghang lapen kaprek kaprek man kedo abangphu atum chetong dun.
Pini amai along Arson,  Dera Arlok, Inglongkejoi, Derajuri, Phongjangre lapen Ronghidi heihui local committee pen kado kave don 108 arat atum BJP along chingbe dun. Chunbang Jowel Tokbi kapangdak ateng ke, ‘lahai ahavar along kaprek asong ke inutta ave, kado kave he-rek lor anpin lo’.
Pini k.m. 73 angbong SH 35 pen Rongmandu an PMGSY 2017-18 apharman Sika crore 1.6 panong keselamji aphan long-eh som lo. 2017-18 abaha 14th Finance commission pen sika lakh 5 atangka tovar kaselampruiji aphanta CEM long-eh som tekang. Laso aphi Arsong pen Derajuri Killing kacheleng atovar kaselamji aphan PMGSY 2017-18 abaha Sika crore 4.8 panong pen kaselamji aphanta CEM Tuliram Ronghang arideng pen long-eh som lo.
Mai kapajut ahut Agriculture asaikam pen nang kapale plastic a ington lapen hoton rat atum aphan Karbi Anglong Autonomous Council a CEM Tuliram Ronghang rideng pen pajir tekang lo.

Leave a Reply

Your email address will not be published. Required fields are marked *

November 2018
M T W T F S S
« Oct   Dec »
 1234
567891011
12131415161718
19202122232425
2627282930  
Archives