ADVERTISEMENT

This area is available for advertisement. Please contact for details.

Arnivang
Get Adobe Flash player

BLT Clause-8 pen, Article 244(A) hemprek apharman Hamren along KSA armu kachejeng kachesong

imageHAMREN, Phaikuni 19: Kedamtang 2003 aningkan Thangthang 10 arni kachetok BLT Clause-8 aphuthak kekhamkhe lapen Article 244 (A) ateng pen kelong nangj ahemprek prapjin pen kapalong daprangji aphan pura pini KSA Richikip me thengtom-aro  Hamren District Committee patirpisi Hamren arongsopi along armu chejeng kachesong asai deng. Armu kacheng asai kedeng ahut Chief Minister Sarbananda Sonowal pen KAAC CEM Tuliram Ronghang aphan panongsi West Karbi Anglong District DC asaihem along ADC P.S Jahari arideng pinpur aloh tame pajir. 
Adap porphai 11 pen kecheng armu chejeng asai along KSA Hamren District Committee ameiphu Atursing Teron si jalin lapen laso ahut KSA tiri ameiphu Semeon Rongphar, KNCA ameiphi  Pratima Enghipi, HSDC tiri klembang Bina Rongpipi pen kechenglok KSA along kacherap dun abangphu bangphi atum chetong dun.Donkammukam, Jengkha, Kheroni, Jirikindeng, Amtereng pen ongdung armu chingrumsi pinpur aloh pajir det aphi puthot Hamren Rongsopi Multi Utility Building (MUB) athengno along mai ingni. Mai along KNCA ameiphi Pratima Enghipi kejaike kedamtang 2003 aningkan Karbi Anglong pen Dema Hasao arat kachesong kangtangkring ajok Parliament along  BLT Clause-8 accord kachetok khamkhe dun thip lo.  Setame non BJP kechari kejalin atum Karbi Anglong lapen Dima Hasao inglong hini aphan karjapthip asongja atum aphan inut pen inut parhi-etsi labangso asai puthot kapechun thuji aphansi bor-i thulo. Bodo akhei atum ke schedule tribe (plain) 1950 along ketok dak atengsi non kapaphihup akhei along avarsai nang kachepalong dunji aphan mate Inglong hini aarat a-an van nang kelong dun nangji abangkeke aron ave. Lason thotsi Karbi Anglong pen Dima Hasao Inglong hini aphan Union Minister Nitin Gadkari kedamtang 2016 anigkan Article 244(A) Hemprek nangpiji pu alamchak kachipi adunthu Union Minister Rajnath Singh sitame kedamtang 2014 aningkan Dokmoka kilik kapachethang ahut ta lamchak chepi lo.Non Assam Chief Minister Sarbananda Sonowal sitame 2013 kilik kapachethang ahut jongsi BJP aratpangri kevang lote Karbi Anglong pen Dima Hasao inglong hini arat akar-i Hemprek nangpipo pusi chechak  thulo setame non Delhi-Dispur-Diphu alongta BJP chari longdet aphita hemprek nangkipipe det abangke inglong hini arat aphan kachongthui binonglo pusi BJP jabang atum aphan Inghipi arbok.
Non Parliament along Clause-8 BLT accord aphuthak jongsi pasangse pulote pran mui kachesong asai anta dengji laso along BJP CM Sarbanada Sonawal pen KAAC CEM Tuliram Ronghang atumsi adai  che-en nangji puta Pratima Enghipi ther. Lason thak thaksi KSA tiri ameiphu Simeon Rongphar kejai ke ST(Hills) ajakong ke kapaphihup akhei aphan ador kesodak abor asonlo. Lasi matha pame pen kachesong along cheto dunpet nangji pusi Simeon Rongphar  choningrisi Hamren Rongsopi lapen atok ano arat NEC atovar kaheno kaningri aphuthak non anta pepleng pi thekthe lake therak meme binong pusi BJP aratpangri aphan arbok. Pini amai along bangpharo pho sose KSA klembangphu/phi atum pen kechenglok Hamren arat atum cheto dunsi laso ajaimek kedeng pachun.

Leave a Reply

Your email address will not be published. Required fields are marked *

November 2018
M T W T F S S
« Oct   Dec »
 1234
567891011
12131415161718
19202122232425
2627282930  
Archives