ADVERTISEMENT

This area is available for advertisement. Please contact for details.

Arnivang
Get Adobe Flash player

Disobai along daini kahonthe pen inut arleng kesar aphan apran karmut

BAKALIA, Phaikuni 18: Digital India ateng pen ratpangri atum Information & Technology ahin kangthurji aphan penang an bor-i lo setame sankur amonit atum aning arlo pen non anta kitin thap lapen kahonthe thap ason kaparaiji aphan un-eh detlo. Laso ajoine state angkangpi kaprek-kaprek adim along daini kahonthe pen adai kave ongdung abangphu bangphi atum areng keso pen danglok apran kedam nang atumta dolo.
Nonhetjong Bakalia police station angkang Klurdung along penanso aphan daini pu akoi pisi areng kapaso lapen kachenek aphuthak bang trok atum police arideng chingnanglo. Laso alamki praipre aprang-aprang puthot Bakalia police station avaikang along amat Disobai pu along daini kahonthe pen inut arta ningkan trokep asarbura aphan apran endetlo. Daini kahonthe pen apran karmut det asarbura ke Disobai Langtuk Terang arong amekar Socheng Teron (Longki Teron) pusi pangthek. Birta kelong dun atengke Disobai atalom malom kedamtang arni ajahak atum thang bakbe pen kithi nang lake halabangso asarbura ajoine lo pu hadak arat atum honthelo lapen alangliphan Kali Sadhan pusi akoi pilo. Laso kahonthe pen ajok kedamtang Phaikuni niphai 17 arni arnikangsam apor Lunse Timung arong asar ahem achatai along kangsaiji aphan Socheng Teron ahem asor atum aphan hang dam det lo. Karlitang Socheng Teron ahem asor atum kapachini atengke Dhaniram Rongpi pen Tom Ingti pu bang hini abangphu atumsi Langtuk Terang arong along methang ahem along pen amatsi Socheng Teron aphan hang pon det lo. Laso aphi Lunse Timung arong asar ahem achatai along Socheng Teron aphan daini kahonthe pen ingsai lo setame ajahak abangphu atum Socheng Teron aphan areng ahu pasolo. La anchot ta kali ok kitur-i alan penta perhetsi kaibong ita achet heihui pen kevar karbu ajoine dim along amat Socheng Teron apran damjuilo. Halapu Socheng Teron asopo Bimal Teron (35) aphanta areng ahu pasosi seh pachelang nangset anlo. Bimal aphan areng kapaso ahut asopi Ka-et Teronpi kerap dunji aphan kabor-i dun ahut Ka-et aphanta areng paso pusi chini dun. Kahonthe thap lapen kitinthap araki kijum halahai abangphu atum arideng pen Socheng Teron asu arta ningkan hini Raje Teronpi ta jok dunde det lo. A-oso akeng along areng keso angthek ta klanglo. Penang an atumke alanglitum aphan rong pen che-oh nangji pusi kether-kehap ta dolo. Laso alamki karju long pen Bakalia police station along nonghetjong arpu arpu kedeng OC B Baruati jalinsi police abitung atum lam kedo adim humri damlo lapen Socheng Teron kithi arpum humsi alangli ahem asor atum an aphanta pajok lo. Laso aphi Lunse Timung arong asar pen pen bang 19 aphan nepsi jail toilo. Police arideng kachingnang atumke Lunse Timung arong amekar Kangjar Timung asopo Dilipsing Timung (23), Rajen Timung asopo Jirsong Timung (19), Ramsing Timung asopo Kamal Timung (20), Joysing Timung asopo Gobin Timung (24), Dorsing Timung asopo Sankar Timung (21), Sing Timung asopo Arun Timung (20), Sarsing Timung asopo Birensing Timung (28), Goutom Hanse asopo Sarthingri Hanse (20), Tara Timung asopo Khiram Timung (23), Longki Timung asopo Jen Timung (35), Dorsing Timung asopo mate SGB Longri Timung (25), Tara Timung asopo rong asar Riso Timung (42), Khoyasing Teron asopo Ananda Teron (28), Longki Timung asopo Jirsong Timung (17), Semson Ingti asopo Babuchan Ingti (30), Dhaniram Singnar asopo Rajit Singnar, Joysing Timung asopo Barun Timung (30), Dorsing Ingti asopo Mirjeng Ingti (18) lapen Longbi Rongpi asopo Kamalsing Rongpi (54) pusi pangthek. Nilbagan pen inut thek-kere kevan ahut bidi sore kipi ajoinesi laso alam kepho nanglo pusi chini dun.
Pinpurme ratpangri ahin pen lapuson kahonthe thap lapen kitinthap ajutang pen kachepaheloji aphan sodak kangsai aron denglo setame atok-ano adim malom non anta laso kacheroktok asai chepho damde lang. laso ajoine non an lapuson alamki pho nang bomlo. Lasi arpu kedo atum prapjin pen atok ano adim malom anta cheroktok asai deng damde pulote kevangji arni lapuson alamki phophe deetji puke maduta puthip un-eh.

Leave a Reply

Your email address will not be published. Required fields are marked *

November 2018
M T W T F S S
« Oct   Dec »
 1234
567891011
12131415161718
19202122232425
2627282930  
Archives