ADVERTISEMENT

This area is available for advertisement. Please contact for details.

Arnivang
Get Adobe Flash player

Bang 3 inglong aso kalidet atum aphan nominated MAC kepon che-en thu nangji: Hampang 24

imageDiphu, Phaikuni 18: Governor pen Karbi Anglong Autonomous Council aphan bang 4 nominated MAC kipi along netum hamphang asong 24 atum chedon dun thekthe, athe sixth schedule aron ateng pulote Karbi Anglong Autonomous Cuncil nominated MAC inglong aso kalidet atum aphan pon longle.
Council along pharman bangphu kave inglong aso akhei atum Karbi Anglong arlo dopik lang seta lahai inglong aso atum aphan ponpesi inglong aso kali det abangphu Ajit Dey, Chandra Bahadur Chhetry lapen Baburam Kisku atum nominated MAC keponji aron ave pusi pini pherangke amai kangni ahut hamphang asong 24 abidisar J.I. Kathar pangdak.
Hamphang asong 24 atum pen kedamtang Chiti achiklo bang 4 nominated MAC papleng serak nangji pu jong dunsi Assam ratpangri lapen Karbi Anglong Autonomous Council a CEM aphan pachini lo.
Halaso ahut Karbi Anglong arlo kedo khei barim mate inglong aso Rengma Naga, Kuki, Shyam (Tai), Garo lapen Khasri atum angbong pensi apun achak kechok abangphu atum aphan nominated MAC pek nangji puta jong dun.
KAAC along lahai inglong aso akhei atum aphan nominated MAC pipon lote lahai atum kosonsi village council kacheseng lapen kosonsi kachari kachelon ma kado kave chini pamepo puta jong pini pherangke amai kangni ahut hamphang asong 24 atum jong.
Non kapangdak ateng ke council along pharman bangphu kave pin kijumhek inglong aso akhei atum aphan ponpe det asonsi thek long.
73 amentmend ateng Karbi Anglong Autonomous Council atum Ser Van Kep, Tulsong Vaisa, Salaiyaro, Durbor Shnong pu heihuisi village council aphan en nangji puta Hamphang asong 24 abidisar J.I Kathar IAS retd pangdak.
Lapuson kijumhet inglong aso akhei atum aphan KAAC along nominated MAC keponpe det ke CM Sarbananda Sonowal kejalin state ratpangri lapen CEM Tuliram Ronghang kejalin a council atum pharman bangphu kave kheiso atum a democratic ajakong kithi sonsi man lo puta jong.
Sixth Schedule Paragraph 20 ateng inglong aso atum aphan kapanong pivek ahoi Assam ratpangri lapen KAAC atum pen keponpe det lapen inglong aso kalidet atum aphan kepon rong ke Banga Sena atum akemang Karbi Anglong aphan Bangabhumi kapinchongji along tovar ketho dun asonsi man lo. Netum Banga Sena lapen Bangabhumi aphauthak sodak pinrem lo, seta ratpangri atum pen laso aphuthak amek selokjok asonsi cheplang bom lang puta Hamphang asong 24 abidisar J.I. Kathar jai.
Lasi Assam ratpangri lapen Karbi Anglong Autonomous Council atum pen bang kethom inglong aso kali det atum aphan nominated MAC keponji aphuthak che-en serak nangji lapen laso alar non amat KAAC along pharman bangphu kave lang kijumhek inglong aso Rengma Naga, Kuki, Shyam (Tai), Garo lapen Khasi akhei atum angbong pensi pon nangji. Jongsi kehang ateng inglong aso kalidet atum aphan Nominated MAC pon rong pulote Democratic aron ateng pen sodak kachesong asai dengji pusi Pherangke amai along hamphang asong 24 a bidisar J.I Kathar jai.
Pherangke amai along hamphang asong 24 a klembang UKSA ameiphu Ratan Terang, KFA ameiphu Rajesh Tisso, KRAA amei Ruben Hanse, hamphang asong 24 ajabang Angtong Ingti atum chetong dunsi inglong aso akhei atum aphan nominated MAC keponji pu alam aphuthak sodak khamkhe. La-an chot kali Karbi Anglong Autonomous Council kilik aron kaselamji aphan High Court pen chiklo jontrok apor kipi ateng non chiklo ejon ansi dochot lo seta council kilik aron kaselam ketang angring thek longle pin lang puta alangli tum pherangke amai along jai.

Leave a Reply

Your email address will not be published. Required fields are marked *

November 2018
M T W T F S S
« Oct   Dec »
 1234
567891011
12131415161718
19202122232425
2627282930  
Archives