ADVERTISEMENT

This area is available for advertisement. Please contact for details.

Arnivang
Get Adobe Flash player

Longkam Teron auditorium along KSA BDC atum mai kangni

Den Arong-Dokmoka, Phaikuni 12: Bodo akhei atum aphan ST(H) kipiji pu aphuthak todap porphai 11 apor KSA Bakalia District Committee atum Dokmoka Longkam Teron Auditorium hall along mai kangni.
Mai pangche aprang Bodo atum aphan ST(H) kipiji pu aphuthak kekhamkhe angthek chepaklangsi Dokmoka ahithi angkang armu chejeng lo. Laso ahut Karbi Anglong, Dima Hasao lapen West Karbi Anglong arlo kedo Bodo akhei atum aphan ST(H) pilongle pu jong dunsi Dokmoka Police station a O/C Ronjit Hazarika arideng pinpur aloh pajir dam.
Laso aphi Birsing Tokbi mai chepahemphusi rat amaipi ingni, mai along alohi sarpo amanpen AICCTU klembang Semson Killing chetong dun, manpeng alohi aman KSA ameiphu Semion Rongphar, chunbang Thomson Rongpi, chopha alohi amanpen Korkanthi Youth Development committee meiphu Bidya Ingti, Ramsing Tokbi, Mohon Ingti, Reka Terangpi, Sarthe Kro atum pen chenglok kaprek kaprek man kedo atum chetong dun.
Non kevangji winter sesion along Assam arlo kedo inglong a district kethom arlo kedo Bodo akhei atum aphan ST(H) kipiji aphan bill keponji alam kachini dunsi, pini laso aphuthak khamkhe dun nangkoklo, kali pulote ilitum a anvansi bodo akhei atum aphan thakdak po. Lasi kapapi longle detji aphan pini ameipen ilitum khamkhe dunlo.
Sapka sath sap ka vikash pu ke BJP atum pinisi kaningje seta ilitum ke ha 1986 aningkan pensi kaningje, athe netum aphanta hemprek nangpi non anlote rengrappetpo pusi ilitumsi ningje papranglo, ST(H) Bodo akhei aphan pilongle pu alamthe ke, jongsi Bodo akhei aphan ST(H) pidet pulote MP anghoi along, chokomar anghoi keraipi along pen chenglok kaprek kaprek ilitum inglong aso akhei aphan nang kithik pi ason do-an alangli pensi chithi nangkok po. Ilitum ke kapaphihup akhei seta Bodo atum kethek pen chenglok ajat ahin tame ilitum pen nang kapaprang asonsi do.
Kekhamkhe asai ke Karbi Anglong Autonomous Council atum pensi klem nangji apot lo, KAAC atum tokjir pen kekhamkhe aloh Parliament along pale dun nangji seta pipot CEM Tuliram Ronghang kejalin KAAC atum klem haihe det lo pusi KSA ameiphu Semion Rongphar arju.
BJP atum 40, 00,000 chokomar anghoi kipiji aphan pen chenglok kaprek kaprek alam chobai pensi Karbi Anglong arlo BJP atum nang cherai lo. Seta non apor thangnatta alangli tum kachechak alam isinatta chepaplengple si, Bodo atum aphan ST(H) kipiji pu pen chenglok inglong aso atum aphan kapavirji asaisi klem rong lo.
BJP atum kechokche alam pen chenglok Congress atum akechokche alam heihui pinpursi mai along Semson Killing jai.

Leave a Reply

Your email address will not be published. Required fields are marked *

November 2018
M T W T F S S
« Oct   Dec »
 1234
567891011
12131415161718
19202122232425
2627282930  
Archives