ADVERTISEMENT

This area is available for advertisement. Please contact for details.

Arnivang
Get Adobe Flash player

Bodo atum aphan ST(H) kipiji pu alam tiri ratpangri atum che-en vek nangji: ASDC, KSA, KNCA

Suri-Suri armu chingrum dunsi kekhamkhe ase angton pathe dun

imageDiphu, Phaikuni 12: Karbi Anglong lapen North Cachar Hills Autonomous District along kedo Bodo atum aphan ST(H) kipiji aphan non kevangji session atum ratpangri atum pen bill ponpo pu birta kelong ateng ASDC, KSA, KNCA atum patirpisi pini kekhamkhe angthek chepaklangsi Karbi Anglong arongsopi Diphu ahithi par-omplup kekhamkhe asai deng lo.
Laso kachesong along Karbi Anglong atok ano arat atum cheto dunsi rongsopi along suri-suri chingrumsi kekhemkhe ase angtong pathe lo. Laso kachesong along ratchari asong kacheprek alam mathathe lapen khei akisung pen kejok nangji pu alam mathasi AGP pen chenglok kaprek kaprek asong along kedo Karbi mate inglong aso arat atum kachesong asai along cheto dun.
Karbi Anglong, West Karbi Anglong lapen Dima Hasao district arlo kedo Bodo atum aphan ST(H) angdeng kipiji aphan tiri ratpangri keklem bom aphuthak Autonomous State Demand Committee, Karbi Students Association lapen Karbi Nimso Chingthur Asong atum pen sodak khamkhe alam jong dunsi Union Tribal Affair Minister Jual Oram aphan kapanong apinpur aloh Karbi Anglong a Deputy Commissioner arideng pajir.
Pinpur aloh along, 1950 Constitution (schedule tribe) Order pachunsi Bodo Kachari atum aphan list 1 along thapsi Bodo atum aphan ahokpet inglong akhei binong 15 atum ason kapinchongji aphansi ratpangri atum non kevangji session along bill keponji aphan klem bom lo.
Pinpurme, inglong ahavar along kedovek a inglong akhei lapen kaprek ahavar along kedo inglong akhei atum pen kacheprek thetan khangjang. Kacheprek chot kali choki-chokam, hamphang lapen charli ahin ta list-I along kedo inglong aso atum paphi dunhup asonsi do.
Laso ajoine Britist atum kado kave alam matha pamesi inglong ahavar thak pen Excluded pen Partially excluded area pu selam lo. Laso atengsi India jokvan longdet aphita pado thotsi laso ahavar aphan autonomous district pinchong lo. Article 330 (1) (b) pen C palutsi autonomous district atum apharman Assembly pen Parliament along anghoi rai pi lo.
Constituency Part II (Schedule Tribes) Order, 1950 ke Assam aphansi panong lo, laso along hini kaprek-kaprek a list do List-1 ke Karbi Anglong pen North Cachar Hill aphan lo. Laso angbong Kuki sub-tribe 37 pen pen kado kave khei 15 do, seta laso along Bodo kachari atum aphan parlo ponpe. Assam state arlo List II along autonomous a district Karbi Anglong pen North Cachar Hill bikok pen Bodoland Territorial Areas District anparta laso along khei 14 Boro, Boro kachari heihui hen lo.
Bodo atum aphan list I along kaparlo ponpe det ke kethek longle kali, seta laso akhei atum kedo-kethak kamatha pen chenglok kaprek-kaprek aphuthak matha pame aphisi list II along bikok lo, athe 1950 malom ke Boro atum thoi alongsi kedo aning kehang. Boro akhei atum kedamtang 1960 aphisi inglong ahavar along nang arlu lo.
Jongsi Boro atum aphan schedule Tribe along palut dun chok pulote aprang penta kijumhek akhei Karbi, Dimasa, Garo, Hmar, Kuki, Thadou, Jaintia, Hrangkhawl, Biate, Paite, Chakma/Reang lapen Naga atum aphan ke kapavirdet asonsi manpo. Bodo atum aphan ST(Hills) kipi ke Constitution along kedo Article 330 pen 332 aphan kaprek ahin katevar asonsi man det po lapen List-II angbong pen ajahak inglong ahavar along kedo akhei atum aphan ke kapave ason lo puta jong dun.
Kedamtang 2003 aningkan Bodoland Liberation Tiger lapen State pen tiri ratpangri angbong kachetok MoS alamdon Clause 8 along laso alam kedo kok ajoine halaso arnita inglong aso akhei binong atum sodak chesong lo.
Kedamtang 2016 aningkanta tiri ratpangri atum pen laso Clause kapachunji aphan klemlo, halaso ahut rat thurpak kachesong asai dengsi ghonta 7 anbak train ahor rangkha lo. Kachesong ahut Assam chief minister Sarbananda Sonowal pen kachingvaiji aphan kachechak ajoinesi karankha asai che-en lo, laso ateng tiri ratpangri atum penta laso bill ponpe det lo pu heihui alamta jong dun.
Bodo akhei atum aphan ST(hills) kipiji puke inglong aso aphan hamphang, ratchari lapen angkang keraipi do-anta kecham lorji asonsi man detpo.
Jongsi kapaprang oh Bodo akhei atum aphan laso angdeng pi det pulote isivet Parliamentary ahoi ke inglong aso binong 15 atum aphan keraipi pu kali det po. Lason pulote inglong aso atum hala kapaprangpik akhei atum pen chedan nangkok po. La-an chot kali chokamar anghoi kaparlu alongta katora dokok po.
Laso aphuthak inglong aso atum chelangpetsi ingtangkring pen kedamtang 2016 aningkan Chiti achiklo 16 arni laso a bill kapachunji aphan ratpangri atum keklem aphuthak khamkhe lo. Laso kachesong ateng ratpangri atum laso ateng ratpangri atum halaso ahut bill ponpe det lo, seta non aphong ratpangri atum aprang ason ruithusi bill keponji aphan klem lo. Lasi Bodo atum aphan ST(H) kipiji pu aphuthak ASDC, KSA, KNCA atum pen sodak pinrem lapen laso a bill keponji pu alam che-en thu nangji puta hang paso.
La-an chot kali inglong aso khei barim atum ajutang lapen kachepangthek heihui kacheraikomji aphan anta ajakong kithi asonsi manpo pu heihui alam jong.
Lasi Karbi Anglong, Dima Hasao lapen West Karbi Anglong district arlo kedo Bodo kachari atum aphan ST(H) kipiji pu alamrai ratpangri atum che-en thuvek nangji pusi pinpur aloh along kejong dun paso.
Karbi Anglong a DC alar pini election commissioner pensi pinpur aloh deng lo, laso ahut kehang alam kejong apinpur aloh GOI a Tribal Affair Minister Jual Oram along nang pale pipo pusi alangli chechak tekang.
Todap porphai 11 pen anerlo porphai 2 apor an kachesong ase pathesi ghonta 3 kachesong pachekak lo.
Laso kachesong ahut Lunsepo Chandra Kt. Terang pen chenglok Garo akhei atum kilun kekan paklangsi kachesong along ning parung dun lo.

Leave a Reply

Your email address will not be published. Required fields are marked *

November 2018
M T W T F S S
« Oct   Dec »
 1234
567891011
12131415161718
19202122232425
2627282930  
Archives