ADVERTISEMENT

This area is available for advertisement. Please contact for details.

Arnivang
Get Adobe Flash player

HC alamtoi ke papleng vekpo: CEM Tuliram Ronghang

imageDiphu, Phaikuni 11: Bokajan LA angkang pini arnisivet constituency pli adim Sika crore 10 atangka mini stadium kaselamji aphan KAAC Tuliram Ronghang arideng long-eh kesom.
Karbi Anglong atok ano kapathu ahin kapachinthurji lapen kapathu kethek ariso okarjang atum aphan aprang kepon thekji aphan pu panongsi finance minister special package asaideng pen sika crore 10 atangka pen mini stadium, open stag, indoor stadium, gallary heihui kekim kerangji aphan pura non malom Karbi Anglong lapen West Karbi Anglong angkang kaprek kaprek constituency along-eh kesom dam bom asonsi pini Bokajan LA angkang constituency pli along CEM Tuliram Ronghang arideng long-eh som dam lo.
Borjan constituency apharman Dillai alongsi long-eh kesom pangcheng lo, laso Deopani constituency apharman Nambar Bagan along long-eh som lo, Sarupathar constituency apharman Kudam Singnar arong Donsuri pathu aklam along CEM arideng long-eh som tekang, laso adim along amat kikim ketangtang Open Stage ta CEM Tuliram Ronghang arideng pen pangpu lo. La-an kali Sarupathar constituency angkang Hanjanglangso English High School along additional classroom kikimji aphan MAC Lunsing Teron arideng pen long-eh som tekang.
Kejutsi Bokajan constituency apharman CCI pathu aklam along tame Sika Crore 10 atangka pen mini stadium kaselamji aphan long-eh som lo.
Long e kesom amai along CEM Tuliram kejai ke, ‘bangso stadium kikim kerang prapjin pen pangchengsi kevangji 2019 aningkan Phaikuni achiklo an patang vek nangji, jongsi patangte det pulote kikim kerang asai keklem a contractor atum aphan jail tame toi nangkok po’.
Anparta bangso kikim kerang along hadak sports committee lapen rat atum keklem kedam along langchari dun nangji puta alangli jai. Hemprek hangbom nangji seta laso esek kachingthur asai ta klem bom nangji, hemprek longle ako tame kapathu ahinta paprang dun bom nangji pusi CEM Tuliram Ronghang jai.
Pherangke atum pen kachingki ahut, CEM Tuliram Ronghang kaningje ke, hamphang asong 24 lapen Anil Toppo a group atum kachetonte ajoinesi lapuson inglong aso lapen inglong aso kalidet angbong lam klang lo. KAAC pen Drafting asai keklem ke High Court a lamtoi pinak lasi lake papleng vekpo puta Tuliram Ronghang ningje. Athe lake paplengple pulote Court alamrai aphan karkan asonsi man det po. Laso apot papleng det seta inglong aso atum ladak pen kat et nangji pu alam ave puta CEM Tuliram Ronghang ningje. Nonta inglong aso lapen inglong aso kali det angbong monsam pensi dolo lapen kevangji arnita lapusonsi dopo puta CEM Tuliram Ronghang ningje.
Pini kaprek kaprek adim along long-eh kesom lapen kangpu amai along KAAC chairman Longki Timung, EM Jagat sing Ingti, EM M.D. Phukon, MAC Mokut Mohanta, MAC Mongalsing Timung, MAC Lunsing Teron, BJP West Karbi Anglong a chunbang John Milik lapen kaprek kaprek man kedo atum chetong dun.

Leave a Reply

Your email address will not be published. Required fields are marked *

November 2018
M T W T F S S
« Oct   Dec »
 1234
567891011
12131415161718
19202122232425
2627282930  
Archives