ADVERTISEMENT

This area is available for advertisement. Please contact for details.

Arnivang
Get Adobe Flash player

Swachh Bharat Yatra kapachethang cycle kevek atum Diphu nang kele

imageDiphu, Phaikuni 8: Food Safety and Standards Authority of India (FSSAI) kachepatirpi pen Ingdeng 150 Mahatma Gandhi mahang kethek katalon pen pachetonsi India angkangpi mesen lapen kangthir-et kedo kethak dun thekji aphan mangsi Swasth Bharat Yatra akemang ‘Eat Rights India’ asaimo Pre 16 arni ‘World
Food Day’ pen pacheton dunsi India angkangpi long 6 arongsopi along pensi pangcheng lo. Sonsi Nihang Nirep ahavar along Tripura arongsopi Agartala along pen pangcheng lo. Lasonsi alongtin adim alongta pachethangsi Dimapur pale det aphi pini Karbi Anglong arongsopi Diphu along an nangpale lo.
Pini Swasth Bharat Yatra aphan Dimapur pen cycle kevek atum bang 40 Diphu rongsopi an nangpalesi district administration pen ingthum-arnesi Diphu Club along archo.
Saimo ateng pen Phaikuni niphai 9 arni adap apor ahut akeng pen damsi anarlo apor malom Diphu ahithi lapen GNM Training Centre along Swasth Bharat Yatra ateng pen ‘East Right India aphuthak cheroktok amai pangni damji. Laso Phaikuni 10 arni adap porphai 7:30 apor KAAC Secretariat along pen puthot Hojai an cycle kevek atum bar thu po.
Dimapur pen nangkidun bang 40 cycle kevek atum pini Diphu an nang pale dunsi alanglitum aphan puthot amethang adim toi thusi Diphu pen cycle kevek atum pensi kaprek alongri along an pale dun thu po.
Pini ladak Diphu rongsopi along nang pale pen mesen lapen kangthir-et pen kecho-kijun lapen kedo-kethak thekji aphan aphan ‘Eat Right India’ aphuthak pachethang lo. Lapusonsi longri angkang penang adim along ‘Eat Rights India’ aphuthak pachethang pon bomsi kevangji 2019 aningkan Arkoi achiklo 27 arni Delhi rongsopi alongsi India angkangpi pen cycle kevek atum chetong dunsi ‘Eat Right India’ aphuthak pachetang po pusi Swasth Bharat Yatra along Master of Ceremony, Chandrika Das pachini.
Pini cycle kevek atum aphan kangthum-karne asai along alohi asarpo aman pen KAAC EM i/c H&FW Khonsing Rongpi, FSSAI Asst. Director Prasanta Kr. Mishra, Joint Director of Health Services Dr. Kareng Rongpipi atum pen chenglok ongdung man kedo abangphu-phi atum chetong dun.

Leave a Reply

Your email address will not be published. Required fields are marked *

November 2018
M T W T F S S
« Oct    
 1234
567891011
12131415161718
19202122232425
2627282930  
Archives