ADVERTISEMENT

This area is available for advertisement. Please contact for details.

Arnivang
Get Adobe Flash player

Samson Killing arta ningkan 70 kepleng Taekwondo a thanbang

imageDen Arong, Phaikuni 8: Dokmoka asor, bonta non kedo bom ke Shillong. Alangli inut ningkan 70 arleng kesar Samson Killing alangli nonputa methang a ok apran kemesenji aphan mate kapathu ahin aning kehangpik ajoine taekwondo kapaklang, anparta kaprek-kaprek arleng kesar apharman kachepate along dun bom lang.
Alangli kapathu ahin aning kehangpik ajoine kaprek-kaprek state kachepate along dunsi chepate dun pen nong-eh long dun lo.
Non arta ningkan 70 pleng det aphita alangli arnivang adap porphai 4 thursi adap prang kekat asai che-oh eh lang. La-an chot kali taekwondo class alangli dam bom lang. Pinpurme, kedamtang Jakhong achiklo Darjeeling along taekwondo kachepate along alangli ta heavy weight category along chepate dun lo. Kekat ta alangli aning kehang ajoine nonputa oh eh lang. Laso ajoine nonhet jong Nongpoh Run alongta chepate dunsi kechengsi angdeng nong-eh long dun lo.
Alangli kaprek-kaprek kapathu kethek chot kali, alangli Assamese, Karbi, Khashi, Hindi, English lapen Bengali heihui akhei alamta alangli ningje thek pame. Pudam lote alangli ke inut kethek ason kedo-o abangphu binong.
Alangli sopi Matrimaya ta Nongmensong Taewondo School pen blackbelt longlo. Alangli somar kado kave bang trok do. Laso angbong ajahak atum kapathu anatsi lut dun lo lapen ajahak atum kaprek-kaprek asaisi klem lo.
Asomar bang trok do pusetame apo ason an kethek abang ke ave det lo. Asopo akleng abang ta apo asonsi black belt kachepalongji aphan klem lo seta alangli un dundet ajoine car kapamithu asonsi Semson Killing inut arnam aphanta kephere abangphu binong, pusi asopo Mawro than. Ne po aphan taekwondo ke isi kai kereng-i atovar asonsi man det lo. Ne kai along ne po ason taekwondo keklem lapen kerengji aphan keklem atovar keklem isi kachedan asonsi dokok lo. Laso ajoine
taekwondo aseke che-ohsi neli thanbang klem rong lo. Ne po ke taekwondo aphan aning kedok binong, laso ajoine alangli kaike ta kacharli mate kachepharang sangse puta Semson Killing asopo akleng Mawro than.
Car heihui along taekwondo athanbang arjan kapabon dun pen kelang along kedo-o along ongdung atum aning dok lapen kelang ta prekjek sonsi do.
Samson Killing amethang a ok apran kachepamesenji anparta kapathu ahin ajakong kachepabopbe detji aphan pu ajoine kecho-kijun ahin penang an kachere asonsi do. Laso ajok chana, thesere, roti lapen magur lang ok heihuisi kecho pathe lo. Hor ke alangli ajir dingklui aprang pensi oh bup lo puta Samson Killing chethan.
Aprang ke neli diabetes lapen high pressure akeso cholonglo seta non ke keso ing-ar pik lo puta alangli chethan.
Kedamtang 1943 Arkoi achiklo 5 arnisi alangli amathang theklo. Laso ateng alangli non anta ningkan 70 pleng tang lo seta taekwondo kethan lapen kachepatedun ke nonputa che-oh eh lang lapen ajakong ingtangkring khangjang lang.

Leave a Reply

Your email address will not be published. Required fields are marked *

November 2018
M T W T F S S
« Oct    
 1234
567891011
12131415161718
19202122232425
2627282930  
Archives