ADVERTISEMENT

This area is available for advertisement. Please contact for details.

Arnivang
Get Adobe Flash player

Hamren along Rukasen Hirjir Amai paman

Diphu, Phaikuni 8: Phaikuni 7 arni Hamren Hirbang Amei patirpi along Jambili Literary Foundation cherap dunsi Hamren Fishery Training hall along ‘Lammet apharman cheto lonang’ cherappet pen lammet ingthur lo nang’ pu athepi ensi Rukasen Hirjir Amai kapangni.
Hamren Hirbang amei meiphu Mohonsing Terang kachepahemphu amai along chunbang Prasanta Ingti mai kepha alamthe jai. Mai along alohisarpo aman pen Custom Reform Board chairman barim Richardson Hanse chetong dunsi mai ingpu.
Hirjir kihir kachepate asaimo amai along KAAC EM barim Surya Rongphar mai chepahemphu lo. Laso amai along hirbangpo/pi atum amethang ketok hirjir hir rinti lo. Hirjir kihir kachepate amai along KAAC EM Rupsing Teron chetong dun.
Mai along Jambili Literary Foundation (JLF) meiphu Welsing Hanse pen sankur chunbang On Teron atumsi cherap-cheto dun. Mai along alanglitum pen amatta hirjir hir dunsi kachetong dun arat atum aphan aning kapaklovi anpin hirjir parju lo.
Hirjir kihir kachepate along kado kave bang 59 hirbangpo/pi atum chepate dun. Laso angbong Volongkom Aji asor Monush Ingti kechengsi anong-eh, Harlong Juve asor Mohen Rongpi adunthu anong-eh lapen Amtereng asor Maloti Teron kethom angdeng anong-eh deng lo. Laso along bang pli atum aphan ningkangsam anong-eh pajir lo. Hirjir ketok kachepate along Patradisa asor Hakimsing Teron kechengsi nong-eh, Hamren Amselem asor Sangita Kramsapi lapen kethom angdeng anong-eh ke Hamren Rongchingdon asor Mirlin Phangchopi atum deng lo.
Hirjir kihir amai jutdet aphi rat amaipi ingni. Tokbang Joysing Tokbi kachepahemphu amai along alohi aman pen KCS ameiphu Chandra Sing Kro, sankur chunbang Bidyasing Rongpi, KTMCRI principal Dilip Kathar, AUDC thanbang Mindar Rongphar, hirbang Khagen Ingti, hirbang Karon Hansepi, tokbang Monju Teronpi, HTL convenor Saising Rongpi atum pen chenglok Kamsong Ingti, Dhansing Terang lapen kaprek-kaprek ove kimi hirbang, tokbang atum chetong dun.
Non malom Jambili Literary Foundation (JLF) kacherap dun pen along-along hirjir amei kapado thek apot mai along KCS sankur chunbang Bidyasing Rongpi kachoro pajir. Pini nanglitum kihir an ahirjir ta kechoklim ahirjir saidelo athe hirjir ketok ke methang angbong ningklarsap pensi ketok lo, lasi ansose hirjir ketok kachehung thu thekji aphan ta alangli hirjume pi dun.
Non malom kithurmi a ove atum methang akhei alam kachetene dopik tanglo, lasi bangso alongke api-apo atumta adai do, lammet le kangbolote khei ke kangbolo. Lasi ansose kengsang alam kaningje pajujera kechoklim alammet cheningje rep nangpo pusi KCS meiphu Chandrasing Kro jai.
Hamren arongsopi arlo ta lammet anatthu kapaphi do-oh tang lo, lasi koson pensi kapaprang nangji bangso alam mathasi Jambili Literary Foundation atum kacherap pen Hamren Hirbang Amei pen tirikam amei sengsi Rukasen Hirjir Amei ingsamjin pachun lo.

Leave a Reply

Your email address will not be published. Required fields are marked *

November 2018
M T W T F S S
« Oct    
 1234
567891011
12131415161718
19202122232425
2627282930  
Archives