ADVERTISEMENT

This area is available for advertisement. Please contact for details.

Arnivang
Get Adobe Flash player

Alir-alon pen ingdeng 10 KAMSFC mahang kethek katalon

Diphu, Phaikuni 8: Karbi Anglong Morning Star Football Club (KAMSFC) pini Diphu Rongnihang along kedo methang asaihem along Ingdeng 10 mahang kethek arni talon.
Sai angdeng ateng todap apor malom alohi sarpo KAAC CEM Tuliram Ronghang chetong dunsi KAMSFC asaihem ingpu lo. KAMSFC meiphu Sengkan Ronghang KAMSFC alama pachipur lo lapen KAMSFC Ingdeng 10 mahang kethek a him KAMSFC klembang meiphu lapen KAAC deputy chairman Ritesh Inghi si ingthan lo.
Bangso aphi KAMSFC meiphu Sengkan Ronghang mai chepahemphusi mahang kethek katalon rat amai pangni, mai along KAAC CEM Tuliram Ronghang pen chenglok alohi aman pen Team Karbi Anglong, KASA sankur chunbang Pankaj Teron, KAMSFC sankur chunbang Bikram Teron atum pen chenglok ongdung man kedo abangphu atum chetong dun.
KAMSFC mahang kethek arni pen pachetonsi Bor-ih FC meiphu Diganta Teron pen Bor-ih FC ke pave detsi KAMSFC alongsi chingbe dun lo lapen Bor-ih FC along kapathu bangphu atum do-an ta KAMSFC alongsi papathu dun po pusi pangdak lo.
Football kapathu anat KAMSFC pensi ingthur pon nangpo lapen bangso a club ke Assam alongta nongnam kachethangklong abang lo. Lasi kapathu anat kangthur ponji aphan keklem-kedam nangji ason anta cherap-cheto dun bomji lapen anuttinta bor-ih hur nangji pusi mai along KAAC CEM Tuliram Ronghang jai.
KAMSFC ke kedamtang 2008 aningkan Mizi Kro si mahang pathek lo lapen laso along George Rongpi, Mukul Kathar, Damien Hanse, Angela Ingtipi, Biswajit Rongpi lapen ajirpo atumsi cherap-cheto dun lo. KAMSFC kangthur pon along kado kave amen le en un-eh det pusi tame KASA sankur chunbang barim Dhansing Rongpi, Assam Football Association sankur chunbang Ankur Dutta, Prodip Timung-ACS atum aphan choro vek nangji lapen anparta KAAC CEM Tuliram Ronghang ta Karbi Anglong Morning Stars FC keseng ahut penta alangli do dunsi cherap-cheto dun lo, lasi alangli aphanta choro vek nangji.
KAMSFC kedamtang ningkan 10 angbong penang kisung-keboi do lo, setame laso angbongsi arjap thipsi do bom lo.
Kevangji arni an ta KAMSFC kangthurji aphan anuttinta bor-ih pon hur nangji pusi KAMSFC meiphu Sengkan Ronghang mai along jai.

Leave a Reply

Your email address will not be published. Required fields are marked *

November 2018
M T W T F S S
« Oct    
 1234
567891011
12131415161718
19202122232425
2627282930  
Archives