ADVERTISEMENT

This area is available for advertisement. Please contact for details.

Arnivang
Get Adobe Flash player

Nomati MAC constituency angkang nokbe kekat kachebai

Den Arong-Dokmoka, Phaikuni 8: Karbi Anglong Autonomous Council a CEM kapinkhat ateng Nomati MAC constituency arlo kechengsi nokbe kekat kachepate.
Karbi akhei atumta eson son ni anchot kalisi pirthe adang kaprek-kaprek kapathu kachepate along ta nongme kelong dun thekji aphan pu akemang pensi lapuson kapathu ahin aprang kedoji aphan bor-i lo. Laso kekat kachebai along sopinso atum aphan Km 15 ajak kiding lapen so arlo atum aphan mtr 100 ajaksi pakat lo. Bangso asai ke Nomati MAC mate deputy chairman Ritesh Inghi alanglisi dorplup akerap pidun lo. CEM kaheman amang kapapleng dunvekji aphan pura Namati Block Mondol atum pensi patirpi lo.
Atumi Phaikuni adap porphai 5 apor pen Den Arong pen Sivo Bazar adak Km 15 ajak kidding pakat. Laso kekat kachebai along sopinso bang 65 lapen so-arlo atum bang 15, kado kave bang 70 atum kekat chebai dun.
Kekat kachebai along so-arlo angbong Sima Mech kechengsi anong-eh longsi tangka sika 5000 pen ser alek long lo, Mina Hansepi adunthu nong-eh sika 3000 pen rup alek lapen kethom angdeng anong-eh ke Pomki Kemprai tangka sika 2000 pen tam alek deng lo.
Pinsomar atum angbong Prasonjit Basumatary kechengsi anong-eh tangka sika 5000 pen ser alek, adunthu anong-eh Wiliam Ronghang tangka sika 3000 pen rup alek, kethom angdeng anong-eh Hidit Swargiary tangka sika 2000 pen tam alek deng lo.
Nong-e kapajir amai along alohi sarpo aman pen KAAC deputy chairman Ritesh Inghi chetong dun. Laso ahut alangli kijai ke, pining ke kecheng lo lapen pini nang kachepate dun atum anke alanglitum aphan dak amatsi seke-en pen police, army pen chenglok kaprek-kaprek kapathu anat varsai tho pidun po. Sonsi aningkan vangta pado verpo pusi than. Chopha alohi aman pen block mondol meiphu Probin Teron, KASA dun meiphu Borsing Kro, DSA Dhoromsing Kro lapen Den Arong bazar commttee pen Prodip Ingti atum chetong dun.

Leave a Reply

Your email address will not be published. Required fields are marked *

November 2018
M T W T F S S
« Oct    
 1234
567891011
12131415161718
19202122232425
2627282930  
Archives