ADVERTISEMENT

This area is available for advertisement. Please contact for details.

Arnivang
Get Adobe Flash player

Ningkan 14 arta kangduk a-osopi aphan a-ok kapardi

Tangka ajakong pen alam kapangsamji aphan kabor-i

HOWRAGHAT, Phaikuni 7: Karbi Anglong pen Hojai district ahoi Murajhar police station angkang Debasthan pu adim along inut ningkan 14 arta kangduk a-osopi aphan a ok pardik det pusi birta longdun. Kachini dun atengke Debasthan ahithi hardware abeha klembang Tofjul Haque pu inut mek langno abangphu kedamtang penang an arni pen inut arta ningkan 14 mate ingdeng narkep kecharlibom arta kangduk a-osopi aphan kether-kehap lapen lamdok-lamthu pen baisi laso a osopi aphan ok-vi chepachoi bomsi aphithu oso aphili kedokok ansi alam klanglo. Laso alam kidipji aphan mek langno Tofjul Haque abang Debasthan asanchom ongdung dalal atum aphan tangka ajakong pen baisi kisung kephovek a osopi lapen ahem asor atum aphan Debasthan along pen terek pondetlo. Non amatke kisung kephovek ahemtun atum konatsi kedo lone lapen koson tong kedo lone mate chiklo jon nerkep oso aphili kedo a-osopi abang koson tong kedo lone ke manghu meme asonlo. Kachini dun atengke laso alamki along adai kedovek abangphu Tofjul Haque alangli hamphang along bang kethom-pli jabang atum athengno laso alam aphuthak chekobirlo lapen kosonsi laso alam kapangsamjima aphuthak sai denglo setame thangnat chunche detlo. Kedamtang arnita labangso abangphu lapuson alamki along kacherap dun dp-oh lapen non ephong tangka lapen jakong chepharangsi kisung kepho a-osopi pen-pen ahem asor atum aphan sai jokje pen patu joilo pusi penang an arat atum akoi van.
Halapu kedamtang chiklo jon ni pen school kedamde labangso a osopi aphuthak school principal lapen thanbang atumta kamatha batlo. Tangka ajakong pen Tofjul laso alamki kidipji aphan penang an bor-ilo setame laso along song-hamphang ason lapen keton-kelang chari atumta kedo dunjoi aphuthak ongdung cherotok abangphu bangphi atum munthi.

Leave a Reply

Your email address will not be published. Required fields are marked *

November 2018
M T W T F S S
« Oct   Dec »
 1234
567891011
12131415161718
19202122232425
2627282930  
Archives