ADVERTISEMENT

This area is available for advertisement. Please contact for details.

Arnivang
Get Adobe Flash player

Jutang Jubat kachepachoi pen ahoi aphuthak kapachingthurji aphan Langhemphi along mai kangni

MLA Saideng 2019-20 abaha ahoi arat kapachingthurji aphan pidet po: CEM

HAMREN, Phaikuni 7: Karbi Anglong Autonomous Council (KAAC) pen West Karbi Anglong district administration chelangsi Meghalaya ahoi kedai Langhemphi (Khanduli) along kedamtang Phaikuni niphai 6 arni jutang-jubat kachepachoi lapen Karbi Anglong ahoi kedo arat aphan kapachingthur asai kedengji aphan thedung amai ingni. KAAC EM Rupsing Teron kachepahemphu amai along alohisarpo aman pen KAAC kachari CEM Tuliram Ronghang, KAAC chairman Longki Timun, MLA Dr. Mansing Rongpi pen danglok Team Karbi Anglong EM, MAC atum aparta Karbi Richo Ramsing Ronghang, West Karbi Anglong Deputy Commissioner Devajyoti Hazarika-ACS, SP Mrinal Talukdar-APS, BJP-West Karbi Anglong District Committee ameiphu Arun Terang, East Karbi Anglong ameiphu lapen EM Raton Teron, Socheng Amreng Border Development Adhoc Committee ameiphu Augustin Hanse, Hyniewtrep National People Fesederation- Jaintia Circle ameiphu anparta Khasi Jaintia Karbi Border Peace and Development Committee (KJKBP&DC) dun meiphu Lone K. Laloo pen chenglok rong asar sarphi- sarphu riso-ejang aklim-angphar atum chetong dun.
Mai along ahoi kedo kaprek-kaprek akhei Karbi atum pen chenglok Khasi-Pnar, Nepali, Sangkechep, Garo, Hajong, Adivasi, Bengali atum methang ajutang kilun-kekan heihui paklang.
Lahei akaprek akhei kilun-kekan kapaklang ke Karbi Anglong arlo kaprek-kaprek asong do pusetame netum ke ning isipetsi kedo pu kachepaklang angthek lo pusi mai along EM Rupsing Teron jai.
KAAC CEM Tuliram Ronghang kevangji arni ahoi kapachingthur asai klemji pu ningjesi ahoi kapachingthur asai aphan nonhetjong krong-6 ahoi kedai mesen atovar kaselamji aphan sai-deng-et lo pusi ningje. Alangli kaningje thuke kevangji aningkan MLA Saideng (Scheme) kedo-an ta Block-I, Block-II alongsi sai klem lap po puta rat angno chechak. Vothatlangso-Hamren-Khanduli NEC atovar prapjin pen kapatangji aphan KAAC penta penang an sai deng lo puta alangli ningje. Nangkeleji 2019 aningkan Jangmipo achiklo angbong NEC atovar kapatangvekji aphansi DC, MLA lapen EM Rupsing Teron angno amatsi contractor atum pen loh chetok etlo puta Rupsing Teron mai along jai. Alangli chepaduksi West Karbi Anglong pen Meghalaya ahoi along kedo Karbi akhei pen kechenglok aprang pen kedothip akhei atum aphan longle a patta pak suri isi kipiji aphan rong asar arideng pipapjir lo puta EM Teron asangho jai.
Mai along suri-suri arat cheto dunsi mai ardi pidun lapen ahoi along akisung kachetong do-an alamthe klardak pen KAAC kachari CEM Tuliram Ronghang lamthe kachechak along aning chepathesi tovar cholang.

Leave a Reply

Your email address will not be published. Required fields are marked *

November 2018
M T W T F S S
« Oct   Dec »
 1234
567891011
12131415161718
19202122232425
2627282930  
Archives