ADVERTISEMENT

This area is available for advertisement. Please contact for details.

Arnivang
Get Adobe Flash player

Matijong 5 pen 9 arni Assam Panchayat kilik dopo, 12 arni vote lakhapo

GUWAHATI, Phaikuni 5: Assam Panchayat kilik kapadoji aphan Assam State Election Commission pen arni pangdak lo. Laso atengsi labangso Panchayat kilik ingkung hini thak lo (Phase wise), kechengsi angkung Matijong 5 arni lapen adunthu angkung ke Matijong niphai 9 arnisi kilik dopo anparta vote kalakhaji ke Matijong 12 arnilo pusi pini Assam State Chief Election Officer Horendra Nath Bora pherangke amai pangnisi laso aphuthak pangdak. Pherangke amai along alangli kapangdak thuke Panchayat kilik kapachunji aphan keklem-kedam nangji aron-atang heihui ta pini pen amatsi denglo, lake kechengsi angkung kilikji aphan nomination aloh kejok kijutsi arni ke Phaikuni 15 arni henlo lapen adunthu angkung aphan ke kijutsi Phaikuni 19 arni henlo. Phaikuni 16 arni pen Phaikuni 20 arni ke Nomination aloh kelang katarlip-kapatini dopo. Nomination aloh kache-enji kijutsi arnike Phaikuni 20 pen 22 arni. Election Commissioner Horendra Nath Bora kaningje thuke state along long 26 district along kilik dopo lapen 420 District Council Member post, 2199 Regional Panchayat Member post, 2199 Village Panchayat Chairman post, 21990 Ward member post dopo puta ningjesi pangrum pet voter aphai bang 1,56,41,456 lapen laso angbong pinso aphai bang 8123835 lapen so-arlo aphai bang 7517621. Laso a voter aphan kedamtang Panchayat kilik aphante phant 21.89 an batlo. Kechengsi angkung kilik kapadoji a district ke Tnsukia, Dibrugarh, Shivsagar, Charaideo, Jorhat, Majuli, Golaghat, Nagaon, Dhemaji, Lakhimpur, Biswanath, Sonitpur, Darang, Morigaon, Kamrup (M), Kamrup lapen adunthu angkung kedoji a district ke Nalbari, Barpeta, Bongaigaon, Dhubri, South Salmara Mankchar, Goalpara, Cachar, Hailakandi, Karimganj lapen Hojai. Pherangke amai along election asaiphu Horendra Nath Bora kaningje thuke, kilik kapachunji aphan sika 149,91,40,905 atangka panonglo lapen laso kilik bang 156255 saiphu-saikhi atum aphan kenangsot tahai. Pangrum pet long 23,505 polling centre dopo. Laso angbong long 8243 polling centre ke phere meme lapen long 3665 ke ansose phere meme polling centre do puta ningjesi aprang ateng ballot ateng pensi vote jok po. Laso kilik along kachedan dunji abangphu-bangphi mate candidate atum tangka kapadam longji aphai aphuthak kapachini thuke District Council member anghoi aphan inut-nut candidate ke-ongnai sika 60,40,00, Regional Panchayat anghoi candidate atum sika 1,60,000, Village Panchayat Chairman anghoi candidate atum sika 1,60,000 lapen ward member atum sika 96,000 ansi padam un chotji unchotji.
Pinpurme non adihu Panchayat kilik ahut kachedan dunji candidate atum ratpangri pen laso aningkan kechengsi amendment kedeng Panchayat Act. along kehot aron ateng kechoklim atumsi kilik thur dun long chotji.

Leave a Reply

Your email address will not be published. Required fields are marked *

November 2018
M T W T F S S
« Oct    
 1234
567891011
12131415161718
19202122232425
2627282930  
Archives