ADVERTISEMENT

This area is available for advertisement. Please contact for details.

Arnivang
Get Adobe Flash player

Chengberi polling station along Horensing Bey constituency kahumri kapajut

Bang 26 atum Congress asong che-ohsi BJP along kachingbe dun

Harlongsora, Phaikuni 4: West Karbi Anglong district angkang kaparlo No. 5 Rongkhang constituency arlo kado kave polling station 28 along Rongkhang MAC Horen Sing Bey ingtonte pin kachehumri. Kachehumri chimitme pin aphi Phaikuni 3 arni Chengbiri polling station humri damsi constituency kachehumri asaimo pajut lo.
No. 5 Rongkhang constituency BJP Mondal Committee patirpisi Chengberi LP School pathu aklam along mai pangni. Sarding Timung kachepahemphu amai along Doleshwar Timung mai kepha alamthe jai.
Chengbiri polling station angkang kado kave rong krehini ke Chengbiri (Phusang), Timung Phusang arong, Inglong Er-pi, Parboli, Long-ehpi, Rong Check, Tirkim, Rongpi Okhi, Umdap, Jok Anso, Phudurpi, Ronghang Rongbong heihui arong hen lo.
Mai along alohi sarpo aman pen KAAC MAC Horensing Bey, VDC chairman Dhiren Bordoloi, Ranjit Teron, Mansing Teron, Bikash Boro, Prodip Rongpi, Kabon Tokbipi atum pen chenglok kaprek-kaprek man kedo abangphu atum chetong dun.
Constituency MAC Horensing Bey kejai ke, BJP a ratpangri ke jasemetpet kadure arat aphan kanghon-kangjinso akerapsi ke-ong saide athema prime minister Narendra Modi, chief minister Sarbanonda Sonowal lapen Karbi Anglong Autonomous Council along CEM Tuliram Ronghang abangphu atum kamatha atengsi nelitum EM, MAC atumta kemesen keklem-kedam meh lang, tovar pen chenglok ongdung ratpangri pen nang kapale akerap do-an rat aphan pajir lo.
KAAC No. 5 Rongkhang constituency along ajir dingklui pen rat atum akar-i mesen kachelang longji aphan tovar kenangji pu ateng MAC Bey asangho chedon dunsi tovar aphan ardi pi paprang po puta jai tekang.
La-an chot kali rat atum kar-i ateng eson-eson pensi kapaplengji aphanta MAC Horen Sing Bey mai along chechak tekang.
Kevangji ningkan pli angbong constituency angkang ongdung atovar black topping selamsi rat aphan mesen kacheleng atovar pipo puta chechak. Mai along non amat PMGSY saideng (Scheme) pen kaprek-kaprek atovar kaselam bom aphuthak ta mai along MAC Horen Sing Bey jai lo.
Loh kacharli ahin kapaprang dun nangji alam pen chenglok ongdung BJP atum keklem-kedam alam rat aphan pachini tekang.
Pini MAC Horen Sing Bey constituency kachehumri kapajutsi arni bang 26 atum Congress asong pen che-oh dunsi BJP along kachingbe dun.

Leave a Reply

Your email address will not be published. Required fields are marked *

November 2018
M T W T F S S
« Oct   Dec »
 1234
567891011
12131415161718
19202122232425
2627282930  
Archives