ADVERTISEMENT

This area is available for advertisement. Please contact for details.

Arnivang
Get Adobe Flash player

Boro aphan ST(H) kipiji pu aphuthak Phaikuni 12 arni ahir ingtangrak chesongji: ASDC, KSA, KNCA

imageDiphu, Phaikuni 5: Karbi Anglong, West Karbi Anglong lapen Dima Hasao district arlo kedo Bodo atum aphan ST(H) angdeng kipiji aphan tiri ratpangri keklem bom aphuthak Autonomous State Demand Committee, Karbi Students Association lapen Karbi Nimso Chingthur Asong atum pen sodak khamkhe pusi pini pherangke amai along ASDC ameiphu Holiram Terang jai.
1950 Constitution (schedule tribe) Order pachunsi Bodo Kachari atum aphan list 1 along thapsi Bodo atum aphan ahokpet inglong akhei binong 15 atum ason kapinchongji aphansi ratpangri atum non kevangji session along bill keponji aphan klem bom lo.
Pinpurme, inglong ahavar along kedovek a inglong akhei lapen kaprek ahavar along kedo inglong akhei atum pen kacheprek thetan khangjang. Laso kacheprek chot kali choki-chokam, hamphang lapen charli ahin ta kapaphi dunhup asonsi do.
Laso ajoine Britist atum kado kave alam matha pamesi inglong ahavar thak pen Excluded pen Partially excluded area pu selam lo. Laso atengsi India jokvan longdet aphita pado thotsi laso ahavar aphan autonomous district pinchong lo. Article 330 (1) (b) pen C palutsi autonomous district atum apharman Assembly pen Parliament along anghoi rai pi lo.
Constituency Part II (Schedule Tribes) Order, 1950 ke Assam aphansi panong lo, laso along hini kaprek-kaprek a list do List-1 ke Karbi Anglong pen North Cachar Hill aphan lo. Laso angbong Kuki sub-tribe 37 pen pen kado kave khei 15 do, seta laso along Bodo kachari atum aphan parlo ponpe. Assam state arlo List II along autonomous a district Karbi Anglong pen North Cachar Hill bikok pen Bodoland Territorial Areas District anparta laso along khei 14 Boro, Boro kachari heihui hen lo.
Bodo atum aphan list I along kaparlo ponpe det ke kethek longle kali, seta laso akhei atum kedo-kethak kamatha pen chenglok kaprek-kaprek aphuthak matha pame aphisi list II along bikok lo, athe 1950 malom ke Boro atum thoi alongsi kedo aning kehang. Boro akhei atum kedamtang 1960 aphisi inglong ahavar along nang arlu lo.
Jongsi Boro atumta inglong aso binong pu asonte Constituent Assembly a klembangphu Kt. Rupnath Brahma, Boro atum aphan ST(H) alongsi palut dunji apot lo puta pherangke amai along ASDC ameiphu Holiram Terang jong.
BJP kachari ratpangri Boro aphan ST(H) angdeng kepekji aphan keklem ke ratchari ale aphan chot. La-an chot kali BJP atum pen inglong aso Karbi, Dimasa, Hmar, Kuki, Khasi, Jaintia, Man, Naga heihui inglong aso akhei atum aphan kijum apar kapajum thuji aphan matha pame pen keklem asai.
Inglong aso binong atum aphan keraipi ajakong Boro atum aphan ST(H) kipiji puke Article 330 (1) (b)(c) kaphalangno asonsi man lo.
Jongsi kapaprang oh Bodo akhei atum aphan laso angdeng pi det pulote isivet Parliamentary ahoi ke inglong aso binong 15 atum aphan keraipi pu kali det po. Lason pulote inglong aso atum hala kapaprangpik akhei atum pen chedan nangkok po. La-an chot kali chokamar promotion alongta katora dokok po.
Laso aphuthak inglong aso atum chelangpetsi ingtangkring pen kedamtang 2016 aningkan Chiti achiklo 16 arni laso a bill kapachunji aphan ratpangri atum keklem aphuthak khamkhe lo. Laso kachesong ateng ratpangri atum laso ateng ratpangri atum halaso ahut bill ponpe det lo, seta non aphong ratpangri atum aprang ason ruithusi bill keponji aphan klem lo. Lasi Bodo atum aphan ST(H) kipiji pu aphuthak ASDC, KSA, KNCA atum pen sodak pinrem lapen laso a bill keponji pu alam che-en thu nangji puta hang paso.
Laso kekhamkhe angthek kachepaklangji aphan non kevangji Phaikuni 12 arni adap porphai 11 pen porphai 2 apor an Diphu Semson Sing Ingti Memorial Park athengno along kachesong asai dengji. Laso along inglong aso binong akhei do-an atum kacheto dunji aphansi ASDC, KNCA, KSA atum choningri.
Laso kachesong along ratchari kacheprek, dhorom kacheprek alam chipupe pinsi ajakong thedung pen kekhamkhe asai dengsi ardi doklong pen tiri ratpangri aphan birta pale nang po puta pherangke amai along ASDC ameiphu Holiram Terang pangdak.
Pherangke amai along ASDC ajabang Jotson Bey, Sonjay Killing, Daniel Teron, KSA ameiphu Suren Hanse, KNCA ameiphi Merina Beypi atum pen chenglok kaprek-kaprek man kedo abangphu atum chetong dun.

Leave a Reply

Your email address will not be published. Required fields are marked *

November 2018
M T W T F S S
« Oct    
 1234
567891011
12131415161718
19202122232425
2627282930  
Archives