ADVERTISEMENT

This area is available for advertisement. Please contact for details.

Arnivang
Get Adobe Flash player

CEM arideng Mahamaya constituency angkang ongdung saideng a long-e kesom

Diphu, Phaikuni 4: KAAC kaparlo No. 15 Mahamaya MAC constituency angkang kaprek-kaprek adim along ason-ason kachingthur asai amo kedeng along KAAC CEM Tuliram Ronghang arideng long-e kesom.
Kachingthur asaimo ateng CEM Tuliram Ronghang keja Team Karbi Anglong cheto dunsi pini Mahamaya anglong angsong kedo Siva Mondir ahem pen Hanse arong adak kacheleng atovar SOPI saideng (scheme) 2018-19 aningkan apharman CC Topping kaselamji aphan CEM Tuliram Ronghang arideng long-e som lo. Laso aphi Dokmoka Town Committee angkang 5th ASFC 2017-18 aningkan sika 80.24 lakhs atangka panongsi kaprek-kaprek kachingthur asai kedengji aphan CEM arideng long-e som. Aphi Dokmoka Town Committee arlo dukdet arat aphan kangthurji aphan pura PMY-U ahemso hum ni adim kekim-kerangji aphan long-e som lo. Sonsi kaprek-kaprek adim Mahamaya constituency angkang long-e somlo.
Paklongkam erui pen kecho ahithi alongta Gram Kendra Rally amai ingni. Bangso amai along penang an SHG klembangphi atum cheto dun.
Block Mondol Committee ameiphu Chandrasing Ingti kachepahemphu amai along mai kepha alamthe Harsing Ingleng jai. Bangso amai along CEM Tuliram Ronghang alohi sarpo aman pen chetong dun. Man-peng alohi aman pen EM Amorsing Tisso, Torendra Brahma, Kache Rongpipi lapen Raju Tisso, MAC Lunsing Teron, Mongalsing Timung, Dorsing Ronghang lapen Ramsing Timung, BJP state dun meiphu Longki Phangcho atum pen chenglok penang an kethe-kiding atum chetong dun.
Bangso amai along kedamtang MAC kilik asonsi kevangji MP kilik ahut ta ke-ongdung a vote pen kapahaiji aphan choningri lo. Pini BJP aratpangri jabang PM Modi pen dukdet arat aphan kerap pale nangji pu ajoine pini kaprek-kaprek asaideng nangpale lo. Sonsi hemso, kachiti ahem, LPG gas, old age pension, SHG aphan vo-vokak, longhong, bi aso akejoi pen ron pajir lo, anparta school charli a osomar atum aphan amen kachethap pen chenglok kachingthang (Uniform), bohi, kitap heihui ta akejoi pen pajir bomlo. Son thakthaksi dukdet atum seh kachelangji aphan Atal Amrit Abhijan pen sika lakhs 2 panonglo lapen Ayushman Bharat pen sika lakhs 5 atangka, pangrum pet sika lakhs 7 atangkang ningkan isi angbong komane jongsi seh chelangji do pulote nahok a hospital alongle seh chelang ta chok. Lasi, CEM Tuliram Ronghang keja Team Karbi Anglong 26 constituency angkang plakple pin pen kachingthur asai kedeng along ningkapangsam thek aphuthak choro lo pusi MAC Lunsing Teron jai.
Ningkan isi along jongsi Ayushman Bharat a card pen lakh 5 atangka pen thedung akeso chelang long pulote ningkan pho angbong sika lakh 25 atangka pen dukdet arat atum seh chelang longpo pusi CEM Tuliram Ronghang jai.
SHG atum methang account, register choklim pulote ningkan isi angbongsi sika lakh 5 atangka pi pajirji pu dukdet arat atum mate town kaparlo arat atum aphan PMY-U ahemso kikim-kerangji aphan sika lakh 2 atangka ke akejoi lo puta alangli jai.  Mai along pinpur aloh kapajir ateng foot bridge, open stage, medical sub centre, Paklongklam along Karbi hemtun heihui anta sai kedengji aphan chesik lo lapen neli eson pen eson pachun bompo, anparta Paklongklam tourist lodge along ason-son kapachingthurji aphan sika 2.20 crore atangka pen ningkan hini angbong sai dengpo puta alangli Ronghang asangho chak tekang.
Mai ingni det aphi puthot Paklongklam LAMPS godown ahem CEM Tuliram Ronghang arideng pen ingpu. Laso aphi Dikrutpi alangsun a gate ingpusi piningkan 2018-19 aningkan apharman Paklongkam picnic spot CEM arideng ingpu.

Leave a Reply

Your email address will not be published. Required fields are marked *

November 2018
M T W T F S S
« Oct    
 1234
567891011
12131415161718
19202122232425
2627282930  
Archives