ADVERTISEMENT

This area is available for advertisement. Please contact for details.

Arnivang
Get Adobe Flash player

Karbi-Kuki kacharvo along apran kedam atum apharman ingdeng 15 ‘Martyr Day’ kachikimo

imageDiphu, Phaikuni 2: Kedamtang 2003 aningkan Karbi-Kuki angbong kacharvo ahut adai kave bang 18 a Karbi atum apran kedam nang aphuthak Longnit, erui pen kecho ahithi (Market shed) along Karbi Students Association (KSA), KAASDCOM, KLA, KARSA, KRA lapen LMVC atum patirpisi pini ingdeng 15 ‘Martyr’s Day’ chikimo asaimo kedeng.
Sai amo ateng pini adap porphai 8 apor malom rong asarthe Soron Sing Rongphar jalinsi KAAC chairman Longki Timung, EM Amarsing Tisso atum pen-pen karlitang bang 18 atum aphan chikimo amelur kai rinti. Laso aphi rat amaipi ingni.
KSA Longnit Aro ameiphu Robinson Kro kachepahemphu amai along KLA chunbang Harsing Tokbi alohi pachini lapen mai kepha alamthe KAASDCOM chunbang Sarsing Kramsa jai. Bangso amai along alohi sarpo aman pen KAAC chairman Longki Timung chetong dun. Pha pangjang alohi aman pen EM Amarsing Tisso, MAC Richard Tokbi, anparta KAAC secretary Nirola Phangchopi-ACS, KAASDCOM chunbang Sing Timung, KARSA dun meiphi Basanti Killingpi, KSA ameiphu Bijoy Bey, KSA dun meiphu Mirjeng Kro, VDC chairman Trinol Rongphar, ward commissioner barim Khorsing Terang atum pen chenglok Karbi-Kuki kacharvo ahut kisung kepho dun vek ahem asor (Victims family), adon-arap lapen rong asar, rong asarthe atum chetong dun rinti.
Mai along song trok chelang pet pen KAAC CEM Tuliram Ronghang aphan panongsi pinpur aloh KAAC chairman Longki Timung pen EM Amarsing Tisso atum arideng pajir dun. Laso aphi kisung kephovek arat (Victim family) atum apran kedam nang aphuthak halaso ahut kisung alam aphuthak rat athengno chepaklang rinti.
Bangso amai along kedamtang 2003 aningkan Karbi-Kuki kheini kacharvo aphuthak than pajirmisi kevangji arni lapuson atemon langno kapajapje detji aphan pachini. Anparta pinpur aloh along kejong ateng pachun po pusi EM Amarsing Tisso lamchak pi. Sonsi Longnit along KSA asaihem (Building) kikimji aphan chaklo. Mohendijuwa along Khorsing Terang pen Ru Semson Sing Ingti atum akumlin parjap po lapen alanglitum amen pen kijui-kelang adim mesen pen isi park selam po, anparta Longnit along 30 bedded hospital kapangniji aphan sai dengpo lapen Langklangvong model village lapen kaprek-kaprek adim along kijun alang kipiji aphan varsai pipo pusi EM Amarsing Tisso chak.
Mai along victim family atum aphan ratpangri pen kerap kipi thekji aphan bor-i po. Singhason angkang high school pen college avelang lapen university anta kapangniji aphan kado kave cherap-cheto dun nangpo puta alangli Tisso asangho jai. Thekerejan pen chenglok Longnit lapen kaprek-kaprek kapaphihup ahavar an black topping atovar kaselamji aphan lamchak pilo puta alangli Tisso asangho jai.
Kuki akhei aphan ilitum alongle kepek varet ajoine komane angbong kachejok dun atum nangpa charvo lo, Karbi atum ke ron aso kalidet mate kachechok dun thekthe akhei lapen ningkeme pu ajoine lapuson atemon japlo. Lasi kevangji arni rong asar, rong asarthe Karbi pen akaprek akhei aphan longle kepek tapte detji aphan KAAC chairman Longki Timung choningri. BJP ratpangri pen pini penang an adim kachingthur asai deng lo, lasonsi Singhason constituency alongta ason-ason kachingthur asai amo theklong lo, anparta non ningkan kethom dolang sai amo kedeng aphan. Lasi EM Amarsing Tisso along Singhason arat kacheto dunji aphan KAAC chairman Longki Timung choningri alam paklang.

Leave a Reply

Your email address will not be published. Required fields are marked *

November 2018
M T W T F S S
« Oct    
 1234
567891011
12131415161718
19202122232425
2627282930  
Archives