ADVERTISEMENT

This area is available for advertisement. Please contact for details.

Arnivang
Get Adobe Flash player

Ahoi kapathirji aphan kachingthur asai kapachini dam

imageDIPHU, Phaikuni 1: Hojai alongri ahoi pen kacharchak dun kluk Karbi Anglong alongri arlo Pranprilangso, Lang-etso lapen Mijung ahavar akisung alam kachini damji aphan BJP EKADC sankur chunbang Ajit Dey kejalin Lumbajong Block Mondal ameiphu Rajesh Hanse, Town Mondal klembang Ram Krishna Guha, rat sai klembang Tingkreng Rongpi lapen Lumbajong ST Morcha ameiphu Bidya Phangcho, VDC klembang Rustom Kramsa lapen arisangho atum chetong dun.
EKADC-BJP jabang atum Karbi Anglong ahoi akisung alam havar kahumri dam ahut ahoi arat kaningje ke, Karbi Anglong ahoi apaisong ke Pranprilangso henlo lasi laso havar aphan kidui dunthip ajakong prapjin pen varsai nang kipiji aphan ahoi along nang kahumri jabang atum aphan choningri dun. Lasonsi langtuk, keso kachelang ahem, ME pen High School, school ahoi apaisong, tovar, marat longri anampi pen kapajokji aphan pen danglok ason-ason ratpangri pen kadure det arat aphan kapanong asaimo nang kapaleji aphan choningri dun.
BJP kejalin ratpangri ke kadure det arat pachingthur lonang pen danglok havar arlo akisung keboi kedo-an nang kapajokji aphansi nang patebok lo.  Non kikhi bom prime minister Narendra Modi akai alammo pangbar damsi kadure det arat aphan kapachingthurji akemang pensi rong rup arlo anta varsai nang kele kelele alam birta nang en lo. Lasonsi keso ki-un-eh pen danglok ason-ason akisung pen kapajokji aphan varsai cho-en dun nangpo pusi BJP EKADC sankur chunbang Ajit Dey jai.
Karbi Anglong pen Hojai ahoi along EKADC BJP sankur chunbang Dey kejalin Pranprilangso, Lang-etso lapen Mijung ahavar akisung alam kachini damji kahumri dam ahut rat sai klembang Tingkreng Rongpi kejai ke, kedamtang MAC kilik ahut rat athengno kachechak ahut rem det ta tovar pen langtuk nangpiji pu atengsi tongsekot pen 5 kilo pen Karbi Anglong pen Hojai ahoi Civil ahithi an tovar nang pale lo. Laso along non kikhi bom CEM Tuliram Ronghang aphan choningri damsi laso ahavar aphan nang kanghon pen akematha keme ateng lapen ekanghon si laso atovar nang pilo puta alangli jai. Lasonsi Hemari Kramsa LP School ahoi apaisong kehang anparta ME pen High School nang kapaleji aphan akangtui angdeng along nang pale pi dun po. Puthot Mijung Ingti arong alongta sanchom amai kapangni along rong arat akisung aputhak chethan chemum si kevangji Matijong achiklo angbong kijun alang langtuk long trok nang-eh po puta chechak tekang. Anparta bangso Phaikuni achiklo angbong Arlong Pharla along isi thedung rat amaipi kibiji aphuthak KAAC CEM Tuliram Ronghang aphan alohi sarpo chopha si rong akisung aputhak chethan chemum lonang. Puthot Lang-etso Dengja Teron arong ta vur damsi rong arat akisung aputhak mai dolin si rong arat atum pen community hall kalite mai hongjai nang kipiji aphan Rongpi asangho athengno choningri dun pen kevangji CEM Tuliram Ronghang aphan kechohang ahutle lahui avarsai alamthe chohang dun lonang lapen nang kepapi ponlap ji aphan nelihin choningri dun po puta Rongpi chechak tekang.
Pranprilangso along ta sanchom amai kibi along kachetong arat atum pen nelitum ke Hojai District kedai dunklok kedodun ajok kaike sitame kachekomrom asonsido lasi KAAC chari kethe keding atum prapjin pen ahoi alam nang kepaklar lapji aphan tame bangso arong arat atum pen choningri anparta non amat Diphu pen nang kesuipet a tovar iksip nangkeselam dap prangji aphan ta rong arat atum pen Rongpi sangho athengno choningri. Kachoningri alam Tingkreng Rongpi kejai ke, laso ahavar akisung arat atum do-an ta neli nang chesong nang arjap dun thipji pu kachechak tekang atengsi non pini sitame neli lamthe chevar vepin pen nangchehumri lo.

Leave a Reply

Your email address will not be published. Required fields are marked *

November 2018
M T W T F S S
« Oct    
 1234
567891011
12131415161718
19202122232425
2627282930  
Archives