ADVERTISEMENT

This area is available for advertisement. Please contact for details.

Arnivang
Get Adobe Flash player

Ulukhunchi along Langkhon arong-aje katalon

imageBORGAON, Pre 31: Ulukhunchi Tiwa Cultural Complex along ingdeng 11 Langkhon arong-aje alir-alon pen Pre 31 arni katalon.
Tiwa akhei atum aningkan vang katalon asonsi pining aningkan ta kerot-kirim kachibi apharman katalon ingdeng 11 Langkhon arong-aje West Karbi Anglong Amri constituency angkang alir-alon pen talon lo.
Pini ingdeng 11 Langkhon rong-aje kapajut arni Karbi Anglong Autonomous Council Cultural Affairs a EM Rupsing Teron alohi sarpo aman pen chetong dun. Mai along MLA Dr. Mansing Rongpi, Amri MAC D. Uphing lapen kaprek-kaprek man kedo atum chetong dun.
Mai along EM Rupsing Teron kejai tekang ke, CEM Tuliram Ronghang kejalin KAAC pen Karbi Anglong arlo kedo akhei atum ajutang do-an aphan kangthur ponji aphansi klem bom lo. Karbi atum ajutang kangcholim ason thakthak Tiwa akhei ajutang ta ingcholim khangjang. Laso kangcholim ajutang aphan aprang keponji aphan kabor-i apot EM Rupsing Teron rong-aje kachepatirpi atum aphan kachoro pajir tekang.
Karbi Anglong arlo lapuson jutang kangcho lim akhei kedo ke ning arong meme binong lo. Tiwa alam lapen jutang aphan aprang keponji aphan un-an nang cherap dunji pusi MLA Dr. Mansing Rongpi ta mai along jai tekang.
Ove kimi atum pen la-an sose Tiwa ajutang aphan aprang keponji aphan klem nangpo lapen laso along Tiwa atum do-an cherap-cheto nangpo pusi MAC Maslai choningri. Assam lapen Meghalaya state along kedo Tiwa Cultural Unit atum kaprek-kaprek adim pen vangsi Langkhon arong-aje along jutang akekan kilun lapen kapathu heihui chepate dun.
La-an chot pini ingdeng 11 Langkhon arong-aje along angtan adet amonit Croatia pen bang hini atum Langkhon arong-aje kelang dun aning cheparong. Alanglitum bang hini pherangke pen kachingki ahut kaningje ke, ‘kevangji arni alangli Amri ahavar puthot nanghumri pen lahai kangcho pik ajutang lang tarlipji’.
Ongdung Tiwa Cultural Unit atum pen jutang akekan kilun lapen kapathu heihui chepate arong chipisi ingsamjin pen pachekak lo.

Leave a Reply

Your email address will not be published. Required fields are marked *

November 2018
M T W T F S S
« Oct    
 1234
567891011
12131415161718
19202122232425
2627282930  
Archives