ADVERTISEMENT

This area is available for advertisement. Please contact for details.

Arnivang
Get Adobe Flash player

Niranjan Karmakar aphi Dr. Numal Momin si karjap dun: ASDC-DHD

Diphu, Pre 31: Bokajan District Demand Committee ameiphu Niranjan Karmakar aphi Bokajan MLA Dr. Numal Momin si karjap dun puke Dima Hasao a Autonomous State Demand Committee chini pame pusi ASDC Dima Hasao District ameiphu Monjit Kharigapsa pangdak.
Karbi Anglong arlo kedo lapen angtan kedo atum chini pame alangli koloso asong alongsi kacherap dun ma. Kedamtang hemprek apharman kachesong kangtui ving angdeng kele ahut alangli phi Congress atum arjap dunsi kachesong asai along pasiksak dun lo. Niranjan Karmakar kopi lapen konat amonit ma ke maduta chinidakde, lasi honthe meme binong. Lasi ASDC Dima Hasao district atum pen alangli karju kangtung ke Niranjan Karmakar mentusi Karbi Anglong kevang lo, api-apo akai ahutma mate aphi-aphi akai ahut lo? La-an chot kali NRC alongta alangli men doma avema ta ASDC Dima Hasao district pen chini ingtung.
ASDC Dima Hasao district pen Karbi Anglong pen Dima Hasao along kedo Bodo akhei atum aphan ST(H) kipiji pu aphuthak ta sodak khamkhe puta Monjit Kharigapsa pangdak. Bodo atum thoi along kedo akhei, laso ajoine alangli non amatta phant 7 keraipi longbom lo. Jongsi alanglitum aphan ST(H) pithu det pulote alanglitum aphan akaprek phant 5 keraipi ta pithu lipo. Lapuson pulote alangli kado kave phant 12 an keraipi dokok po. Lason pulote inglong aso akhei binong Karbi pen Dimasa atum aphan ke kelang kapachingbar ponpe asonsi mandet po.
Karbi Anglong pen North Cachar Hills atum aphan ST(H) angdeng kipi lapen India angdang kaprek adim along laso angdeng kipi det ke aphurkimo dinglen khangjang puta ASDC Dima Hasao district atum jong.
Bodo atum ke inglong aso kali, lasi latum aphan ke ST(H) angdeng pi un-eh seta lake BJP atum ratchari ale kelongji aphansi klem lo athe parliamentary kilik tebok lo puta Autonomous State Demand Committee Dima Hasao District pen jong pusi meiphu Monjit Kharigapsa pachetak.

Leave a Reply

Your email address will not be published. Required fields are marked *

November 2018
M T W T F S S
« Oct    
 1234
567891011
12131415161718
19202122232425
2627282930  
Archives