ADVERTISEMENT

This area is available for advertisement. Please contact for details.

Arnivang
Get Adobe Flash player

Bodo aphan ST(H) kipi ninghang vek pulote aprangsi Art. 244(A) pachun det tha: ASDC

imageDiphu, Pre 30: ASDC, KSA-KNCA Diphu District Committee (DDC) atum chingrumpet pini Diphu ASDC asaihempi along kangdang amai ingni.
Mai along ASDC-DDC meiphu Daniel Teron kachepahemphu amai along ASDC-DDC chunbang Hemsing Tisso mai kepha alamthe lapen alohi pachini. Mai along alohi aman pen ASDC meiphu Holiram Terang, ASDC dun meiphu Chomang Kro, ASDC asongjapo Ramsing Bey lapen KNCA sankur chunbangphi Kajek Tokbipi atum chetong dun.
Pini chingrumpet pen kangdang amai along jasemetpet 2003 aningkan Bodo Accord along kedo Clause 8 ateng pen Karbi Anglong pen Dima Hasao along kedo Bodo akhei atum aphan ST(H) kipiji aphuthaksi kachingvai ardi pi. Mai along penang an chingvai-chingsai det aphi inglong alongri kedo Bodo akhei atum aphan ST(H) pilongle lapen ASDC Tiripi Amei pen bangso alam aphuthak kekhamkheji aphan pura asaimo le deng setame cherap-cheto dunpo pusi mai along cherai.
Bodo akhei ke thoi aso lapen kedo ta thoi alongsi boche bomlo, sonsi ST(P) avarsai cho-en long bomlo. Lasi Bodo atum ke ST(H) avarsai kacho-enji a ot amatsi ave. India aron (Constitution) penle langdam pusitame Bodo akhei atum aphan ST(H) pi nangji pu nahok ta ketok dak ave. Bodo atum ke ST(P) avarsaisi cho-en long bomlo lapen lapen inglong hini alongri along kedoprong a Bodo atum aphan jongsi ST(H) avarsai pidet pulote lake ST(P) lapen ST(H) hini avarsaisi cho-en longlok po, lasi lake aron kali. Ratpangri pen kedengji aning kehangvek pulote India aron along ketokdak Article 244(A) aron ateng pen autonomous state abangsi pachun nangpo, seta aron kavepin Bodo atum aphan ST(H) kipiji puke kapachunji akenangsot amatsi avelo. Lasi ratpangri pen Bodo akhei atum aphan ST(H) kipiji pu alam aphuhak ASDC, KSA lapen KNCA asong chingumpet pen khamkhe dun nangpo lapen anparta rat pangrum pensi khemkhe dun thip nangpo pusi mai long ASDC meiphu Holiram Terang jai.
Pini Diphu along ASDC, KSA lapen KNCA-DDC atum chingrumpet pen kangdang amai kangni asonsi Bakalia pen Hamren District Committee atum mai ingni lo. Lapuson kangdang amai Bokajan District Committee atum kevangji Phaikuni niphai 2 arni Sarihajan along lapen Kaziranga District Committee atum Phaikuni niphai 3 arni Bagori alongta kangdang a mai kangniji aphan chesik pusi birta pachini.

Leave a Reply

Your email address will not be published. Required fields are marked *

October 2018
M T W T F S S
« Sep   Nov »
1234567
891011121314
15161718192021
22232425262728
293031  
Archives