ADVERTISEMENT

This area is available for advertisement. Please contact for details.

Arnivang
Get Adobe Flash player

Boro akhei aphan pipot si ST(H) anghoi kipiji aputhak khamkhe nangji?

-Ramsing Ronghang
Assam lapen Karbi Anglong arlo kedo Boro akhei aphan kelang-selet mate kahijim pule ST(H) aman kipiji aputhak Karbi atum kekhamkhe kali. Karbi atum kipu damke lahelo, Jangphong arong pulote athe ta jangphong nangpo, Tharve arong pulote atheta tharve athevek nangpo. Tharve arong pen athe jangphong kalidet nangji, jangphong arong penta athe ke tharve kalidet nangji. Lake hako keplang penta lapuson si ove aphi a-ove penta nangkekroi lapen ketheklong pirthe aron lo. Jongsi athe kachekirla dokok pulote lake ‘aker’ pusi pu nangkok po. Lasi atiripi kopima halaso atengsi aro-arim, angkur-aphelong ta laso ateng si man po. Boro akhei helo nihang-nirep ahavar tribals atum angbong armu ke-ong, lak 50,00,000 sose armu lapen tok-lang ahin pen danglok asitin ahin ta kapaphrang nai akhei lo. Bonta laso akhei hako penta Inglong aso kalidet ajoksi  Sixth Schedule arlo pangrom ponpe det lo. Boro akhei atiripi ta ‘Inglong aso’ kalidet pu chinidet aphita BJP a sorkar pen non Karbi Anglong arlo kedo a Boro aphan ST(H) aman-peng pipon po. Inglong aso kalidet atum aphan si Inglong aso pu man-peng kipi jike ‘aker’ ason si man det. Kalidet abangphu aphan kapinchong bor-i aputhak si inglong aso akhei an khamkhe nangkok. Atheke lapuson sorkar pen kachomatha damke abinong Inglong aso atum aphan kapavirji abidi pinak lo.
Boro akhei atum kachingthurji aputhak Assam alongri arlo amat ABSU, BPAC akejalin pen Therepo 2, 1987 pen kachesong plut-ple pin ningkan throk aphi 20-02-1993 aningkan ‘MoS’ sorkar pen chetok lo. Boro akhei 1993 aningkan penke Bodoland Autonomous Council (BAC) chekim longlo. Bonta laso ajakong pen chotke Boro akhei kamatha ateng pen aprang chingjok ji ajakong ave pupen ajok 2000 aningkan pen an sose kachesong atir chipi thulo. Halaso abatai akachesong kejalin pon ke ‘Bodo Liberation Tigers’ risim ke-ot asong pen. Boro akhei kachingrum akachesong ajakong kapaklip ji aphan sorkar bidi do-an klem lo seta, paklip un-e det lo. Lasi detpi kachari a sorkar Boro akhei pen ‘ratchari’ (political benefit) ale kelong-i ji aphan si matha kirla-thu lo. Lapuson ajok si puthot 2003 aningkan Therepo achiklo niphai 10 arni Boro akhei aphan aprang ajakong pen themuchot pi thusi ‘Bodoland Autonomous Council’ (BAC) alar puthot ‘Bodoland Territorial Autonomous Council’ (BTAC) pipon thulo. Laso atengke Bodoland ahavar kedo a Boro akhei anta Sixth Schedule arlo si pangrom pon-et lo.  Bonta Karbi Anglong Autonomous District arlo kedo a Boro akhei ke Bodoland arlo kedo kalidet ajoksi ladak kedo a Boro akhei aphan ke Sixth Schedule arlo pangrom pon un-e det lo. Seta halaso kachekroi alo ingdeng 8, (clause-8) along avarsai biponkok lo. Halaso along kachekroi ateng ke “The Government of India agrees to consider sympathetically the inclusion of the  Bodo Kacharis living in Karbi Anglong and N.C Hills Autonomous Council area in the ST (Hill) List of the State of Assam.” pu helo. Boro akhei keplang-kiphi penta ST (Hill) kalidet. Bodoland along kedo atum ta ST (Hill) kalidet. Roitan pen Karbi Anglong kevang a Boro atum aphan ST (Hill) aman kipi ponji aputhak si  abinong Inglong aso atum kekhamkhe. Athe ke aron kalidet pen kapinchong bor-i ajoine. Laso aputhak Karbi Anglong arlo kedo-an inglong aso angbong ke Karbi helo ke-ongnai lo. Lasi laso aputhak Karbi atum pen jalinsi hamphang asong do-an ta khamkhe chepaklang lo. Laso ajoinesi 2003 aningkan Sixth Schedule a Constitution Amendment Bill along ke parlo ponpedet lo. Bonta kapapraidet kalidet lo. Karbi akhei ke ‘lomso hop-hop’ asai si klem thek chot. Bonta Boro akhei ke lapuson kalidet, bidi kre hini pen seta halaso kemang kapaplengji aphan kabor-i ardi pirep. Lasi arni arni kemang- ajoine non puthot kichunji angdeng an nangle thurok lelo. Pini laso angdeng nangkelethu anke Karbi hamphang asong penta kekroidun atum ta do tanglo. Karbi atum aphi-ong aboi jop-ong, aphi-ong pangkre-ong. Lahai kado kave atir kelangdam pen ajoksi detpi a sorkar penta BJP ‘ratchari ale’ aphan matha damsi Boro aphan ST (Hill) status kipiji aphan bor-i thu lo. Laso aputhak Prime Minister Narendra Modi salajong pen amat si BJP ale aphan pusi kedamtang Assam Legislative Assembly Election, 2016 Assam arat athengno pangdak det lo. Halaso angthun si kevangji Parliament Session ahut pachun po lapen Boro akhei akemang pajut po. Laso aputhak Karbi Anglong arat ning kachethenai BJP asong lapen KAAC kachari atum nonpu thangnat sai kedeng pon thek longle lang. Karbi Anglong Autonomous Council arlo si Boro akhei aphan ST (Hill) piji pulote KAAC penta lamdon pivek nangji. Jongsi pipedet pulote? Karbi Anglong Autonomous Council ke Assam State arlo si nonputa dobom. Lasi KAAC pen Boro aphan kekroikre pu alamthe Assam Government aphan palerok lapen Assam State Cabinet pen pi nangne pulote?  Boro akhei akemang non amat chunche det po. Bonta KAAC alam aphan bithukok si Assam Cabinet pen amat si ningkan hini aprang Boro akhei aphan ST(H) status kipiji aphan lamdon deng det lo. Laso alamthe Govt. of India aphan ta pachini-et lo. Karbi Anglong pen Assam Assembly arlo kachetoi-dun bang pli ST (Hill) a MLA atum laso aputhak lamthe avepin! Lake Karbi akhei aphan kopai kelangno pusi pudam nangpo.   Pinpurme, kedamtang Jangmi 1,1995 arni Karbi Anglong apharman ASDC/KSA/NCHSF pen sorkar angbong ‘MoU’ kachetok pen District Council alar Autonomous Council pelong lo. Ke-ongdung loh charli asong pen danglok, Boro atum pen kejalin khei 28 asong atum laso aputhak khamkhe ahir padojot anpin. Laso avarsai lapen si Boro atum Karbi aphan pran karmut pen danglok hem rit meh kekai ason asai anta klemdet lo. Bonta pini ‘MoU’ aphan kekhamkhe kedo-an hamphang asong atum Boro akhei aphan ST (Hill) ‘status’ kipiji pu aputhak pipot ingsamri ingsam dem? Halaso ahut ASDC pen kachari KAAC ahin pen Boro akhei aphan ST(Hill) ‘Status’ pinon pu sorkar aphan tokjir pen kelodet pu akoi pisi nongno kejo lapen kekhamkhe angtang chechak un-e rem anpin. Bonta abinong lapuson KAAC pen ketok doma? ASDC pen halaso ahut kipuke isi akhei aphan kethak mate keplak ke heno, atiripi keplang-kiphi ke Inglong aso pulote halaso akhei India arlo nahok adim le dosita ‘Status’ ke isivet nangpo. Laso atengke Karbi atiripi keplang-kiphi jongsi ST(Hill) pinak pulote Assam alongri nahok adimle do seta ST(Hill) a ‘Status’ si long nangpo. Boro akhei ke atiripi penta Inglong aso kalidet, ajoksi Boroland kedo a Boro jongsi ST (P) pulote Karbi Anglong kedo a Boro atum ta ST(P) nangpo, ST(Hill) kalidet nangji pusi kipudam. Laso aputhak kechokche konat? Bonta Karbi akethek-kere atum ke lahai katarlip aphan bor-i-e si nongno kejo pen ratchari ale aphan ansi lomso aphan klemchot, aphi aphan chematha damde. Ili jongsi mathadam pame pulote Boro Accord mate 2003 aningkan ‘MoS’ kachetok ‘Clause-8’aputhak aphan khamkhe chot kalidet nangji apot lo. Khei barim mate Sixth Schedule arat atum anke  “MoS” aphanta khamkhe dun nangji apot lo. Athe Sixth Schedule kalidet atum aphan si ‘Sixth Schedule to the Constitution of India (Amendment) Bill, 2003 (Bill No.39 of 2003) ateng penke  Sixth Schedule a status pidet lo. Ajoksi halaso a Bill 11 angdeng along kipu lahelo, “In Paragraph 20 in Part I of the Table after entry 2, the following entry shall be inserted namely 3. The Bodoland  Territorial Area District. Laso parlodet aphi ke BTAD ta Autonomous District  pu legal status dokok lo. Laso pen ajok si Sixth Schedule along kaparlo pon Para 20  ateng  Part-I, Part-II, Part-II (A) lapen Part-III a status pen kacheprek avedet lo. Ajoksi Boro akhei aphan ta Art. 244(A) ateng pen kelongji avarsai pi thudet lo. Laso pen ilitum aphan eprang katora kedoji ke Lok Sabha lapen State Assembly Election aputhak si kechengsi  kisung do-i po. Athe ke MP lapen MLA anghoi Karbi Anglong pen Dima Hasao Autonomous Council kaparlo ahavar anke ST(H) aphan anghoi kerai mate reserved seat pinak. Ladak ST(H) abangphu kalidet atum anke MP lapen MLA anghoi aphan chepate dun longle. Boro atum aprang pen ST a status  kelongle det pen ajok si laso anghoi aphan chepate dunji avarsai avedet lo. Bonta non ke Boro akhei atum ta Boroland penta Karbi Anglong lapen Dima Hasao ahavar aphan MP lapen MLA ta chepate dunji avar sai nang dokok lo. Kamatha meme alamthe ke puhelo Karbi Anglong District kelong ahut Karbi atum det si 82% aphai do lapen akaprek atum ke 18% ansi aphai dochot. Lasi Karbi atum kache mathadam ke District Council ke kai isi aphanta Karbi atum aphan det lo pusi chematha dam lo. Laso kachematha dam ke Karbi Anglong arlo khei kaprek a Inglong aso atum do seta aphai jumhak lasi Karbi akhei si ‘Champion’ ke kaike dover po pusi matha thip. Seta pini Karbi Anglong arlo Karbi akhei nangjum si 55% lapen khei kaprek atum 45% an nangbat tanglo. Lasi laso ateng pulote kevangji lang e-prang ke Dima Hasao lapen Karbi Anglong MP lapen MLA anghoi kachepate along ta Boro akhei atum si jakong cheparideng det longpo. Boro akhei aphan asitin ahin penle langdam seta kapaprang akhei pinak. Boro akhei helo Assam arlo tribal do-an angbong armu ke-ong nai atum lo. Latum khei kaprek aphan kemoi lapen kedongthip aphan kaiketa bor-i pik. Lapen khei kapangdangji aphan aning kehang kethe akhei pinak. Lason si Plain District pen Karbi Anglong Boro akhei nangchan-o po. Kijutsi ke Karbi Anglong ahemphu mononphi Boro atum si man rong po. Ilitum ning dohur jilang tahai, ASDC pen 1986 aningkan Hemprek aphan kachesong along Karbi Anglong arlo pam nangkeklo a Boro atum pen jalin si khei 28 aphan pangrom pon si Karbi atum aputhak khamkhe lo. Kekhamkhe anchot kalisi me-heno asai pen  Karbi atum aphan kapanahok asai anta klemdet. Seta laso asai along halaso ahut Cong-I pen kacherap Karbi akhei penta Boro atum akerap longpon. Pini Karbi atum amethang aphan halahai hui akhei pen pine akerap long pon loma? Lasonsi Karbi atumke amethang apran aphan ta kachematha-the atum pinak. Lasi kevangjilang e-prang ke Boro atum si puthot Khei kaprek aphan an parideng pen jalin pon lote Karbi Anglong ahemphu cheplang un-e det ji pu ilitum puthip unjima? Karbi Anglong lapen Dima Hasao ahavar Karbi lapen Dimasa akhei helo kapaphinei akhei lo. Laso ajoksi  laso akhei atum aphan ‘strong safe guard’ kipi kenangsot. Laso keraikom ke kethek-kere lapen kapaphrang non-Tribals atum pen anchot kalisi  plain Tribes atum penta kacheprek avelo. Inglong aso pente halahai akhei atum 80% paprang mulang. Lahaihui pen matha damsi areng kelok atum det kachari ahut seta laso ahavar arat aphan ke amethang amatsi kachari ajakong cheparideng lo. Inglong aso akhei aphan ‘safe guards’ keraikom kipiji aphan si ‘Excluded and Partially Excluded Areas’ keplak asai ta klem lo. Laso kapachun pon pameji aphansi Bengal Eastern Regulation, 1873 lapen Chin Hill Regulation, 1886 aron kapinchong ateng pensi ‘Innerline Regulation aron ta kim pon lo. Halahai aron alar ke aphithu Sixth Schedule aron kim thusi Inglong (Hill Tribals) aso atum amethang ahavar kaiketa keraikom kapathirhet ji aphan matha lo. Bonta nonke Karbi pente Bodo atum aphan si laso a ‘safe guard’ ardi pipon thurong po. Karbi Anglong arlo Karbi kethek-kere atum laso aputhak kachini avedet pusi ili chepuji ma? Kado kave alamta chini pame seta aprang pen kiputang ateng si alomso hop-hop akhei pinak. Kathirik ahut ansi mek prang chot laso aphijong pen puthot mek chejang thuklip abisar si mandet. Boro akhei ke bangphu tin ta khei aphan man chipi rinti lasi ratchari asong keklem le prekjam seta khei aphan kamatha ke isipet. Karbi atum ke amethang akhei aphan man-peng chipipe, khei alamsi ningjeji seta amethang salajong ale aphan khei kachepavirji abidi si klemji. Boro aphan ST(H) pi nangne pu aputhak i-hut isi Karbi Anglong adang kekhamkhe angtong sining longle pa-umplup anpin lo. Seta, pini inut bang hini arideng tangka-maha kedo atum aphai nangkebat lapen akerengme kachomat dunlong aphai kebat ajok si lahai tenedet tanglo. Pini anke laso aputhak chesong seta ale avelo pusi pudak atum ongmunak tanglo. Lake sorkar kachari ahin pen bidi langso ajakong asai ajoine lo. Lasi ilitum thek longlo, Hemprek kapalongji pura Detpi arlo Hemprek kehang asong pining 2018 aningkan kachingrum along Karbi Anglong penta penang asong atum Boro atum pen jok-jak pajirpo dunlo. Laso pen Boro akhei si ale chepalong i-lo. BJP a sorkar pen Boro aphan ardi pipon si Bodoland aputhak kedamtang pining aningkan Home Minister pen ajok Delhi rongsopi along kachingvai aphan phalo. Laso kachingvai ahut Karbi Anglong Hemprek kehang kejalin atum ta Boro pen chepajirpo ajoksi dun lo. Bonta kachingvai along Boro akhei alam ansi chingvaichot. Karbi Anglong kedo a Boro atum aphan ST(H) aman pi nangji puta Home Minister athengno Boro atum pen ningjedak lo. Halaso amai along Karbi Anglong pen Hemprek kehang kejalin atum ke manghu dun prong pen anpara ke thangnat ta thekthe det lo. Lason si Boro atum amena akhei ale aphan Karbi aphan pangrom ponsi chepalong i-lo. Halaso arni Home Minister athengno Bodo aphan ST(H) ‘status’ pi nangji pu alamthe ateng kedamtang Phre 10, 2018 arni Home Minister pen ajok puthot pangdak pon thulo. Karbi Anglong pen kachingvai along kidun atum laso aputhak rat aphan pipot chethan haihedet? Halabangso arni kachingvai angthun atengsi pini Karbi Anglong a Boro akhei aphan ST(H) aman kipiji aphan BJP a sorkar pen keklem ponke kamanghu nangji alam amat si kali lo. Laso ateng pulote Karbi Anglong arlo Boro, Karbi, Tiwa, Dimasa, Naga, Jaintia, Khasi, Garo pen danglok kedo-an a tribal ke Hill Tribals si cheplang-et po. Assamese, Bengali, Nepali, Bihari atum anchot si hill tribals kalidet chot po. Pini khei kaprek atum anta Hill Tribals si cheplang-et pulote Sixth Schedule aron pen keraikom ‘reserved’ ke Karbi aphan ardi pavedet po. Laso ajakong pen kelongji avarsai ason anta Boro akhei si cheparideng-et ver po. Kijutsi ke Hill Tribal pu Karbi atum amerthang amatsi chekrong ingtungte det po. Lake khei kangtui atum aprang pen bidi kanglim kedeng pon asai lo. Lapuson si abinong mate abarim Hill Tribals akhei ke Assam arlo pen amethang-methang amat chepavir-et po.

Leave a Reply

Your email address will not be published. Required fields are marked *

October 2018
M T W T F S S
« Sep   Nov »
1234567
891011121314
15161718192021
22232425262728
293031  
Archives