ADVERTISEMENT

This area is available for advertisement. Please contact for details.

Arnivang
Get Adobe Flash player

Satlang ki-un, khei aphan nongme kevan atum aphan karcho

Diphu, Pre 16: Rongriso along pini satlang ki-un atum aphan lapen kedamtang Malaysia Penang along Asian Pacific Masters Games along chepate dun Karbi Anglong apharman nongme kevang atum aphan karcho.
Karcho amai along Karbi Anglong Autonomous Council a EM Roton Teron alohi sarpo aman pen chetong dun. Mai along Dhansiri VDC chairman Dilip Bey, Ward Commissioner barim Khorsing Terang, Rukmo Tokbi lapen rong asar pen chenglok kaprek-kaprek man kedo bangphu-phi atum chetong dun.
Mai along ason-ason akisung-kiduk lapen tovar kave, lang kave alam jong dunsi Rongriso pen Rongcheto arat atum pen KAAC EM Roton Teron arideng pinpur aloh pajir dun.
Netum kehang ason do-anta nangpiji seta nang amethang asomar atum aphan loh pacharli pamepo lapen raki ahormu kirim pajum po pu lamchak nang chipi nangji pusi mai along alohi sarpo EM Raton Teron jai.
Non hetjong kevang Marwari, Bihari atum ahem paka do, seta ilitum ke hako pen ladak kedo atum non puta tin hoprui ahemsi do nangbom lang. Lasi kamatha chelar nangpo lapen kaselet ajutang chelar nangpo puta alangli than.
La-an chot kali katherak seta chepavir nangpo, athe katherak pen ajok ongdung asai kichunche ta do, loh kacharli atumta ephong bak satlang un-eh detpo school dun haihe lo. Lasi kevangji arni pen ke lapuson kali det nangpo ajat ahin seta chelar dun thek nangpo puta EM jai tekang.
Kedamtang Congress kachari ahut lapen aprang Dr. Jayanta Rongpi kachari ahut Diphu ahithi along street light ameh kar loma? Karke, seta non BJP kachari ningkan isi ansi dolang seta Diphu ahithi solar street light ajoine ajo ta the-ang dang lo. Diphu ahithi pen chenglok constituency 26 alongta kachingthur asai dengsi penang an arje pachelar lo. Laso aphansi kachelar (Parivartan) pu kipu dam lo puta EM Roton Teron jai.
Dhonsing Rongpi kedamtang Malaysia Penang along Asian Masters Games along kachepate dun ahut alam mai along thihek pen chethan. Laso ahut kacharli anat kihung asonthotsi kapathu ahinta hung dun nangji athe non akai kapathu kethek pen ajok man ta long lapen tangka ta long puta alangli jai.
Mai along kachetong alohi atum arideng pensi Asian Pacific Masters Games along kehai kachepate dun pen nong-eh kelong dun atum aphan archo lo. Momento lapen Karbi apoho pensi khei apharman pirthe adang along nongme kevan atum aphan archo lo. Laso aphijong kaprek-kaprek angdeng asatlang along ki-un atum aphan Karbi apoho arvaksi archo lo.
Mai along nirmarli atum pen Karbi akekan paklangsi kado kave atum aphan anong parong lo. Laso aphi kacharo alamthe pajirsi mai ingsam pen pachekak lo.

Leave a Reply

Your email address will not be published. Required fields are marked *

October 2018
M T W T F S S
« Sep   Nov »
1234567
891011121314
15161718192021
22232425262728
293031  
Archives