ADVERTISEMENT

This area is available for advertisement. Please contact for details.

Arnivang
Get Adobe Flash player

Langhemphi goal 5-0 pen Mokoiram FC aphan kaparem

Kechengsi Umchera United Football Championship angdung kiti

Atok kedo pu penle kapaphiji kali, kabor-i pensi angsong ledunji: Arun Terang

HAMREN, Pre 16: Hamren pen km 20 kahelo Socheng constituency kaparlo Umchera along Umchera United Club patirpisi kechengsi Umchera United Football Championship kapathu angdung kiti. Pini angdung kiti along Langhemphi pen Mokoiram FC angbong angbongsi kapathu chepho lo.
Kedamtang Chiti achiklo 23 arni pen pangchengsi pini angdung kiti kapathu along alohi sarpo KAAC a EM Rupsing Teron chetong dun anparta BJP WKADC ameiphu Arun Terang, CBLCC Chairman Joysing Tisso, BJP WKADC chunbang Richardson Hanse, BJP Kishan Morcha dihin rimbang Chandrasing Ronghang pen danglok SGB, rong asar atum chopha alohi aman pen chetong dun.
Kapathu kehung lapen kabor-i angthek kethek long pen Umchera ahavar penta football kapathu angsong keledunji alamthe BJP WKADC ameiphu Arun Terang pen jai.
EM Rupsing Teron Umchera ahavar kithurmi a ove atum aphan kapathu ahin ansose kapachehungji aphan mesen kapathu aklam kipiji aphan rat angno lamchak chechak chipi tekang. Umchera Sports Association aphan KASA pen deng lo, bonta batai kethom jongsi pathu dunde pulote ingthan petji. Lasi kevangji lang arni kapathu asontin alongta kapathu dun petji aphan choningri.
Langhemphi FC pathu bangphu atum ketheksoi ajok Mokoiram FC aphan goal 5 pen parem lo. Kapathu apor ateng Mokoiram FC pathu bangphu atum kachetuji aphan penang cheting lo, bonta Langhempi pathu bangphu atum kitui dun thip ajok ball ipum ta chetu un-eh det lo.
Kechengsi Umchera United Football Championship kapathu angdung kiti along Langhemphi FC aphan nong-eh pen sika 10,000 atangka kachetong dun alohi sarpo EM Rupsing Teron arideng pensi pajir lo. Lasonsi runners-up anong-eh kelong Mokoiram FC aphan nong-eh pen sika 7000 atangka kachetong dun alohi arideng pensi pajir lo.

Leave a Reply

Your email address will not be published. Required fields are marked *

October 2018
M T W T F S S
« Sep   Nov »
1234567
891011121314
15161718192021
22232425262728
293031  
Archives