ADVERTISEMENT

This area is available for advertisement. Please contact for details.

Arnivang
Get Adobe Flash player

Chiklo jon thom pen ephong KCS pen kapaklangji ‘Barika’ kangpu

Diphu, Pre 16: Karbi Cultural Society pen jutang kapangcho asonthotsi lammet ta ingcho nangji pu mathasi kedamtang arni aphongtin jutang rong-aje amai Karbi Youth Festival along kapaklang bom ‘Barika’ non ke chiklo jon thom pen ephong paklang po pu kacherai ateng ketok-kelang lapen kangchap anparta kasonse patangsi pini Pre 16 arni Taralangso KCS tiri asaihem along ingpu lo.
‘Barika’ chapbang Jorsing Bey kachari amai along KCS tiri ameiphu Chandra Sing Kro, dun meiphu Humsing Bey, sankur chunbang Bidya Sing Rongpi lapen Sunil Tokbi anparta kaprek-kaprek tiri amei klembangphu-phi atum chetong dun.
Mai along KCS ameiphu Chandra Kro arideng pen chiklo jon thom pen ephong kapaklangji ‘Barika’ kechengsi aloh pharchak pini ingpu lo.
Mai along KCS sankur chunbang Bidya Sing Rongpi kejai ke, jutang lapen lammet isivet akrongsi dam rapchom lo. Lasi lammet le avete jutang doseta ale ave detji, lasi jutang kapangcho asonthotsi lammet ta pangcho nangji pu akemang pensi ‘Barika’ chiklo jon thom pen ephong kapaklangji aphan cherai lo pusi jai.
Lammet pen jutang ke isivet apoisa apum hin-hin arje ason lo. Lasi jutang kapangtang asonthotsi lammet pangtang nangji. Lammet le kivir lote jutang do seta ale ave lo pu heihui alam jai KCS ameiphu Chandra Sing Kro ‘Barika’ aloh pharchap ingpu lo.
Barika aloh pharchap along kado kave pharo isi ra phar 36 ando seta kevangji aphong pen ke phar 70 sose chot abaksi dopo puta than. Laso aloh pharchap along kemesen a lamjir, temo pen chenglok kaprek-kaprek keporhi meme ason do puta than.
Kevangji arni Arkoi achiklo malom kapaklang thuji a Barika along aphan komatne jongsi lamjir, temo heihui kipi dunji aning kehang do pulote nangpi dun tame pusi chapbang Jorsing Bey pen thansi ‘Barika’ kangpu amai pachekak lo.

Leave a Reply

Your email address will not be published. Required fields are marked *

October 2018
M T W T F S S
« Sep   Nov »
1234567
891011121314
15161718192021
22232425262728
293031  
Archives