ADVERTISEMENT

This area is available for advertisement. Please contact for details.

Arnivang
Get Adobe Flash player

Six Months Karbi Language Certificate Course kacharli ahem CEM arideng kapangpu

Hem kikim aphan sika crore isi panong po: CEM

imageDiphu, Pre 15: Dibrugarh University pen Six Month Karbi Language Certificate Course kethanji aphan deng lo. Laso ateng Karbi Anglong Autonomous Council conference hall along ingpusi Govt. Boys HS School along kethan.
Laso aphi Programme Coordinator Longsing Teron kabor-i lapen SPKL atum cherap dunsi Karbi Language Certificate Course kethanji adim kave aphuthak KAAC CEM Tuliram Ronghang aphan pachini dam lo. Laso ateng CEM Tuliram Ronghang pen aban Addl. Executive Engineer (Irrigation) asaihem Karbi Language Certificate Course kapathanji aphan pek lo.
La-an chot kali aban ahem kasalok pruiji aphanta CEM Tuliram Ronghang cherap dun lo. Laso ateng kasalok asai lapen kaprek-kaprek kenangsot ahormu an thik et aphi pini ongdung EM, MAC, hamphang asong asongja lapen Programme Coordinator Longsing Teron anparta charli osomar atum athengno Karbi Anglong Autonomous Council a CEM Tuliram Ronghang arideng pen Six Months Karbi Language Certificate Course kacharliji ahem pangpu lo.
Laso kangpu amai along, CEM Tuliram Ronghang pen Dibrugarh Court member mate executive council member Longsing Teron aphan Six Month Karbi Language Certificate Course aphan lapuson Karbi alam kapachanji aphan kachepaduk apot kachoro pajir lapen jon kevangji budget ahut hem kikimji aphan sika crore isi panongpo puta chechak.
La-an chot kali, Karbi alam kapachanji aphan api-apo atum amethang asomar atum aphan methang api alamsi than paprang nangji. English alam kethekta kenangsot athe lake pirthe adang kirim alam, seta Karbi atum methang Karbi alam aphansi ardi chipi paprang nangji pusi KAAC CEM Tuliram Ronghang jai.
CEM Tuliram Ronghang pen Customary Law kapatang nangji alamta than. Laso ahut alangli kethan ke, Customary law pachanji pulote methang amatta aron kroi nangji, Karbi aron ateng pulote kur hijan chepachor longle, jongsi chepachor det pulote kursenem pusi pudet popu heihui alamta alangli mai along jai tekang.
Six Month Karbi Language Certificate Course a Programme Coordinator Longsing Teron pen kachoro alamthe pajir. Laso alangli kejai ke, Karbi Anglong Autonomous Council a CEM Tuliram Ronghang methang alam aphan kachinghon kethe pik ajoine alangli kado kave akerap nangpi dunsi pini mesen ahem along Karbi Language Certificate Course charli longpo puta kacharo kapajir ahut jai.
La-an chot kali, Longsing Teron pen Karbi Anglong Autonomous Council higher education EM Jagatsing Ingti aphanta kachoro pajir. Athe alangli ta laso language course kapachun along thedung akacherap dun puta Longsing Teron jai.
Mai along KAAC Chairman Longki Timung pen chenglok ongdung EM, MAC lapen hamphang asong asongja, Six Month Karbi Language Cetificate Course thanbang Saising Rongpi, Khorsing Teron lapen kaprek-kaprek atum chetong dun.

Leave a Reply

Your email address will not be published. Required fields are marked *

October 2018
M T W T F S S
« Sep   Nov »
1234567
891011121314
15161718192021
22232425262728
293031  
Archives