ADVERTISEMENT

This area is available for advertisement. Please contact for details.

Arnivang
Get Adobe Flash player

Constituency hini along mini stadium kaselamji aphan long-eh kesom

1986 akachesong ason ke puthot ruithu nangne: CEM

imageDiphu, Pre 15: Karbi Anglong Autonomous Council a constituency 26 angbong kedamtang 1951 pen kapaphinai a constituency ke Singhason hen lo, seta laso a constituency along arlong, sangti, koila lapen Diphu eplang amonit aphan kapadorplup alang ta laso a constituency pensi longlo. Lasi constituency 26 angbong kangtui nai ta laso a Singhason hen lo. Laso a constituency along Siloni ason kemesen kijui kelang adim pen chenglok kaprek-kaprek kelang meme ason do-oh pusi pini special package pen kapanong sika crore 10 atangka pen mini stadium kikim-kerangji aphan Longnit Harche Teron arong along long-eh kesom amai along KAAC CEM Tuliram Ronghang jai tekang.
Laso kapathu aklam jongsi tangdet lote Singhason ahavar penta Hema Das lapen Pokhila Ingti ason pathu bangphu-phi nang klang po. La-an chot kali non kithurmi ave atumta kapathu ahin paprang dun thekpo pusi alangli jai. Laso ahut Harche Teron arong arat pen kerai along chiri 25 Singhason Sports Complex mate KAAC aphan kepek apot Harche Teron arat atum aphan CEM Tuliram Ronghang kachoro pajir.
KRAA atum tongsekot amai kangni ahut kacherai lapen KAAC mate Team Karbi Anglong atum aphan ka boycott pu alam aphuthak ningduk chepaklang. Netum amatta sixth schedule kapangtangji, sixth schedule kapachunji aphan ninghanglo lapen chedon dun lo. Seta keklem-kedam atum aphan jongsi boycott pen rong palongle pulote Karbi Anglong kapachingthurji aphan kosonsi keklem thekjilangma puta CEM Tuliram Ronghang jai.
Lapuson kether netum Team Karbi Anglong atum ke acherso puta pherere, seta lapuson kache boycott ke nangne lo. Karbi atum chingrumsi chinghon nang po, Karbi atum ning isivet dosi hemprek hang nangpo puta alangli jai.
Hamphang asong 24 atum kopi lo keklem thek? Thangta klem thekthe puta alangli jai, lapuson khei angbong kedamtang 1986 akachesong ahut ason hem-rit kapachipri, rong isi kache boycott, don rap kachedam longle asai kaparui thuji abidi ke klem nangne lo pusi hamphang asong 24 abidisar J.I. Kathar aphan sunglor pen CEM Tuliram Ronghang jai.
Hemprek hang nangji seta hemprek amen pen chebohong nangne, pran charmut nangne, hemprek amen pen che boycott nangne lapen kithithe lang amonit aphan pathi bor-i nangne puta CEM jai.
Non kevangji ningkan isi angbong Longnit pen Siloni kijui kelang adim an krongni atovar selampo pusi jai tekang. 2019 aningkan Diphu along kedo Assam Hills Medical College ingpupo, laso alongta penang an atum chokamar ahoi long dunpo pu heihui alamta alangli ningje.
Karbi Anglong arlo kedo constituency 26 angbong pen Singhason along henlo kelong ason ke-ongnai seta kapaphinai ta laso a constituency hen lo. Karbi Anglong Autonomous Council a CEM Tuliram Ronghang nang kanghon pik ajoine non pejo-pejo pen chingthur dun bom lo pusi EM Amarsing Tisso jai.
Lapuson a constituency tin aphan kapachingthurji pu CEM Tuliram Ronghang kabor-i bom aphuthak KAAC chairman Longki Timung pen kero pi. La-an chot kali non a constituency tin apharman sika crore 10 pen mini stadium kaselamji aphan keklem kedam apotta langli kachoro pajir.
Mai along Amarsing Tisso amethang atangka pen Longnit alangroi arei han kachojor asarpimar atum aphan kerap atangka pajir. La-an chot kali ratpangri pen nang kapale chitim alanta pini amai along rat atum aphan pajir tekang.
Longnit along mai pachekak det aphi Lumbajong constituency apharman Diphu-Manja atovar Chutianala 5 mile nihang Rongkethe along kedo SAI stadium adung mini Stadium kaselamji aphanta KAAC CEM Tuliram Ronghang arideng pen long-eh som tekang.
Laso ajaimek along KAAC chairman pen chenglok EM, MAC lapen Principal secretary, secretary lapen BJP asong jabang atum chetong dun.

Leave a Reply

Your email address will not be published. Required fields are marked *

October 2018
M T W T F S S
« Sep   Nov »
1234567
891011121314
15161718192021
22232425262728
293031  
Archives